ધર્મ બદલીને અનામત લેનારાઓ સાવધાન! સરકારી નોકરી જઈ શકે છે, દેશભરમાં શરૂ થશે મોટું અભિયાન

Reservation Policy India: જે લોકોએ પોતાનો ધર્મ બદલીને, ખાસ કરીને ખ્રિસ્તી ધર્મ અપનાવીને અનુસૂચિત જાતિ (SC)ના અનામતનો લાભ લીધો છે, તેમની સરકારી નોકરી હવે જોખમમાં મુકાઈ શકે છે. રાષ્ટ્રીય અનુસૂચિત જાતિ આયોગ (NCSC) આવા લોકોને શોધવા માટે દેશવ્યાપી અભિયાન શરૂ કરવાની તૈયારીમાં છે, જેનો મુખ્ય હેતુ અનામતના દુરુપયોગને રોકવાનો છે.

શા માટે આ અભિયાન શરૂ કરવામાં આવ્યું?

ભારતના બંધારણ મુજબ, અનુસૂચિત જાતિ (SC) માટેનું અનામત ફક્ત હિન્દુ, શીખ અથવા બૌદ્ધ ધર્મનું પાલન કરતા લોકો માટે જ છે. જો કોઈ વ્યક્તિ અન્ય કોઈ ધર્મ, જેમ કે ખ્રિસ્તી કે ઇસ્લામ, અપનાવે છે, તો તે કાયદાકીય રીતે SC અનામતનો લાભ મેળવવા માટે અયોગ્ય બની જાય છે.

છેલ્લા કેટલાક સમયથી NCSCને ઘણા રાજ્યોમાંથી એવી ફરિયાદો મળી રહી હતી કે મોટી સંખ્યામાં લોકોએ ખ્રિસ્તી ધર્મ અપનાવ્યા પછી પણ પોતાના જૂના જાતિ પ્રમાણપત્રનો ઉપયોગ કરીને સરકારી નોકરીઓ અને શૈક્ષણિક સંસ્થાઓમાં પ્રવેશ મેળવ્યો છે. આ ગેરરીતિને રોકવા માટે આયોગે આ કડક પગલું ભરવાનો નિર્ણય કર્યો છે.

એક રિપોર્ટ અનુસાર, NCSC તમામ રાજ્ય સરકારોને પત્ર લખીને તેમના સરકારી વિભાગો અને શૈક્ષણિક સંસ્થાઓમાં જાતિ પ્રમાણપત્રોની સઘન તપાસ કરવા માટે નિર્દેશ આપશે. આયોગના અધ્યક્ષ કિશોર મકવાણાએ જણાવ્યું કે, "અમે રાજ્યોને રેકોર્ડ તપાસવા અને ધર્મ બદલ્યા છતાં અનામતનો લાભ લેનારા લોકોની ઓળખ કરવા માટે કહી રહ્યા છીએ."

આયોગ લાંબા ગાળે એક એવું 'રિપોર્ટિંગ સિસ્ટમ' બનાવવા માંગે છે, જેનાથી રાજ્યો સતત આવી ગેરરીતિઓ પર નજર રાખી શકે અને તેનો ડેટા આયોગ સાથે શેર કરી શકે.

કોર્ટનું કડક વલણ

તાજેતરમાં, અલ્હાબાદ હાઈકોર્ટે પણ ઉત્તર પ્રદેશ સરકારને એવા લોકો સામે કાર્યવાહી કરવાનો આદેશ આપ્યો હતો જેઓ ખ્રિસ્તી ધર્મ અપનાવ્યા પછી પણ SC અનામતનો લાભ લઈ રહ્યા છે. આટલું જ નહીં, 2024માં સુપ્રીમ કોર્ટે પણ એક મહત્વપૂર્ણ ચુકાદો આપ્યો હતો. એક કેસમાં, એક મહિલાએ સરકારી નોકરી મેળવવા માટે ખ્રિસ્તી ધર્મમાંથી હિન્દુ ધર્મ અપનાવ્યો હતો. સુપ્રીમ કોર્ટે તેના દાવાને ફગાવી દેતા સ્પષ્ટ કહ્યું હતું કે "ફક્ત અનામતનો લાભ લેવા માટે કરવામાં આવેલું ધર્મ પરિવર્તન બંધારણ સાથેની છેતરપિંડી છે."

બંધારણીય જોગવાઈ શું છે?

બંધારણના આર્ટિકલ 341 હેઠળ રાષ્ટ્રપતિના 1950ના આદેશમાં સ્પષ્ટ લખેલું છે કે, 'કોઈપણ વ્યક્તિ જે હિન્દુ, શીખ કે બૌદ્ધ ધર્મ સિવાય અન્ય કોઈ ધર્મ પાળે છે, તેને અનુસૂચિત જાતિના સભ્ય ગણવામાં આવશે નહીં.' આ નિયમના આધારે, ધર્મ પરિવર્તન કરનાર વ્યક્તિ અનામત માટે અયોગ્ય ઠરે છે.

આ અભિયાનનો હેતુ એ સુનિશ્ચિત કરવાનો છે કે અનામતનો લાભ ફક્ત તે જ સાચા હકદારો સુધી પહોંચે જેઓ બંધારણીય રીતે તેના માટે પાત્ર છે.

આ પણ વાંચો-  ચીનને ભારતનો સણસણતો જવાબ: 'અરુણાચલ પ્રદેશ અમારો અભિન્ન અંગ છે અને રહેશે', જાણો વિદેશ મંત્રાલયે બીજું શું કહ્યું