મહારાષ્ટ્રમાં મોટો ધડાકો: અજિત પવારના નિધન બાદ NCPમાં ભંગાણ, ભાજપની ઊંઘ હરામ

Maharashtra Politics: મહારાષ્ટ્રના રાજકારણમાં જે વાતનો ડર હતો, આખરે એ જ થયું છે. બુધવારે બારામતીમાં થયેલા પ્લેન ક્રેશમાં નાયબ મુખ્યમંત્રી અજિત પવારના આકસ્મિક નિધન બાદ રાજ્યના રાજકારણમાં મોટો ભૂકંપ આવ્યો છે. અજિત પવારની ગેરહાજરીને કારણે તેમની પાર્ટી NCP (નેશનાલિસ્ટ કોંગ્રેસ પાર્ટી) હવે વેરવિખેર થતી જોવા મળી રહી છે. આ આંતરિક ખેંચતાણ માત્ર NCP પૂરતી સીમિત નથી રહી, પરંતુ તેના કારણે ભારતીય જનતા પાર્ટી (BJP)ના નેતાઓના કપાળે પણ ચિંતાની લકીરો ખેંચાઈ ગઈ છે.

NCPમાં બે ભાગલા: કોણ કોની સાથે?

સૂત્રો પાસેથી મળતી માહિતી મુજબ, અજિત પવારના ગયા પછી પાર્ટીમાં સ્પષ્ટપણે બે જૂથ પડી ગયા છે.

પહેલું જૂથ: પાર્ટીના કેટલાક ધારાસભ્યો અને નેતાઓનું માનવું છે કે હવે ઘરવાપસી કરવાનો સમય આવી ગયો છે. તેઓ ફરીથી શરદ પવાર સાથે જોડાઈને પક્ષનું વિલીનીકરણ કરવા માંગે છે.

આ મતભેદને કારણે કાર્યકરોમાં ભારે અસમંજસની સ્થિતિ સર્જાઈ છે.

8 ફેબ્રુઆરીનો એ પ્લાન જે અધૂરો રહી ગયો

આ ઘટનામાં સૌથી ચોંકાવનારી વાત તો એ છે કે અજિત પવાર અને શરદ પવાર જૂથ વચ્ચે સમાધાનની તૈયારીઓ લગભગ પૂર્ણ થઈ ગઈ હતી. અહેવાલો મુજબ, ફેબ્રુઆરીના બીજા અઠવાડિયામાં એટલે કે 8 ફેબ્રુઆરીના રોજ બંને પક્ષો એક થવાની જાહેરાત કરવાના હતા.

પૂણે અને પિંપરી ચિંચવડની સ્થાનિક ચૂંટણીઓ સાથે લડ્યા બાદ આ મર્જર (વિલીનીકરણ) પાકું માનવામાં આવતું હતું. પરંતુ કુદરતને કંઈક બીજું જ મંજૂર હતું. અજિત પવારના અકાળે નિધનને કારણે આ આખી યોજના પર પાણી ફરી વળ્યું છે અને હવે એકતાની વાત તો દૂર, પાર્ટીના અસ્તિત્વ પર જ સવાલ ઉભા થયા છે.

ભાજપ કેમ છે ટેન્શનમાં?

અજિત પવારના જૂથમાં પડેલા ભંગાણથી ભાજપની ચિંતામાં મોટો વધારો થયો છે. ભાજપનું ગણિત એવું છે કે અજિત પવારનું જૂથ અકબંધ રહે અને મહાયુતિમાં જ ટકી રહે. જો NCPના ધારાસભ્યો તૂટીને શરદ પવાર સાથે જતા રહે, તો સરકારમાં મુખ્યમંત્રી એકનાથ શિંદેની શિવસેનાનું પલ્લું ભારે થઈ જાય. શિંદે જૂથની તાકાત વધે તો ભવિષ્યમાં ભાજપ માટે રાજકીય સમીકરણો બગડી શકે છે અને બાર્ગેનિંગ પાવર ઘટી શકે છે. તેથી, ભાજપ કોઈપણ ભોગે આ ભંગાણ રોકવા હવાતિયાં મારી રહ્યું છે.

હવે NCPની કમાન કોના હાથમાં?

પાર્ટીમાં નેતૃત્વને લઈને અત્યારે મોટો શૂન્યાવકાશ સર્જાયો છે. અજિત પવારના ઉત્તરાધિકારી તરીકે કોણ આગળ આવશે તે અંગે અટકળો તેજ બની છે. સૌથી ચર્ચિત નામ અજિત પવારના પત્ની સુનેત્રા પવારનું છે, જેમને નવા અધ્યક્ષ બનાવવામાં આવે તેવી પ્રબળ શક્યતા છે. બીજી તરફ, પ્રફુલ પટેલ અને સુનીલ તટકરે જેવા સિનિયર નેતાઓ પણ રેસમાં છે. જો પાર્ટી જલ્દી કોઈ સર્વસંમત નિર્ણય નહીં લે, તો ધારાસભ્યો અને કાર્યકરોમાં અસંતોષ વધશે અને પાર્ટી તૂટવાની શક્યતા વધી જશે. આવનારા દિવસો મહારાષ્ટ્રના રાજકારણ માટે ખૂબ જ મહત્વના સાબિત થવાના છે.

આ પણ વાંચો- Economic Survey 2026: દુનિયા પર મોટા આર્થિક સંકટનો ખતરો! શું 2008 કરતાં પણ ભયાનક મંદી આવશે? જાણો ભારત પર શું અસર પડશે