ભાજપમાં મોટો ફેરફાર: નીતિન નવીનની નવી ટીમ જાહેર, વસુંધરા રાજે અને સ્મૃતિ ઈરાનીને મળી મોટી જવાબદારી

ભારતીય જનતા પાર્ટીના સંગઠનમાં એક મોટો અને મહત્વપૂર્ણ ફેરફાર જોવા મળ્યો છે. ભાજપના રાષ્ટ્રીય અધ્યક્ષ નીતિન નવીને પોતાની નવી ટીમની સત્તાવાર જાહેરાત કરી દીધી છે. સોમવારે સવારથી જ અટકળો ચાલી રહી હતી કે નવી ટીમમાં કોને સ્થાન મળશે, જેનો હવે અંત આવ્યો છે.

આ નવી ટીમમાં રાજસ્થાનના પૂર્વ મુખ્યમંત્રી વસુંધરા રાજે અને પૂર્વ કેન્દ્રીય મંત્રી સ્મૃતિ ઈરાનીને પાર્ટી દ્વારા ખૂબ જ મહત્વપૂર્ણ જવાબદારીઓ સોંપવામાં આવી છે. ચાલો જાણીએ કયા દિગ્ગજ નેતાને સંગઠનમાં કયું પદ આપવામાં આવ્યું છે.

કોને કયું પદ મળ્યું? જુઓ સંપૂર્ણ લિસ્ટ

નીતિન નવીનની આ નવી ટીમમાં અનુભવી નેતાઓ અને યુવા ચહેરાઓનો શાનદાર સમન્વય કરવામાં આવ્યો છે.

રાષ્ટ્રીય મહામંત્રી : સ્મૃતિ ઈરાની, વિનોદ તાવડે, સતીશ પુનિયા, ગજેન્દ્ર પટેલ, હરીશ દ્વિવેદી અને સંજય ભાટિયાને મહામંત્રી તરીકેની મોટી જવાબદારી સોંપાઈ છે.

રાષ્ટ્રીય કોષાધ્યક્ષ : વરિષ્ઠ નેતા પીયૂષ ગોયલને પાર્ટીના રાષ્ટ્રીય કોષાધ્યક્ષ બનાવવામાં આવ્યા છે.

સંગઠન મહામંત્રી: બી. એલ. સંતોષ તેમના જનરલ સેક્રેટરી ઓર્ગેનાઈઝેશનના પદ પર યથાવત રહેશે.

भारतीय जनता पार्टी की राष्ट्रीय टीम के सभी नवनियुक्त पदाधिकारियों को हार्दिक बधाई एवं शुभकामनाएं। अनुभव और ऊर्जा से समृद्ध यह टीम आदरणीय प्रधानमंत्री श्री @narendramodi जी के मार्गदर्शन में संगठन को नई गति प्रदान करेगी। मुझे पूर्ण विश्वास है कि टीम के सभी सदस्य, कार्यकर्ता भाव… pic.twitter.com/bvSxIZIRtW

— Nitin Nabin (@NitinNabin) August 17, 2026

યુપી અને ગુજરાતના નેતાઓને પણ મળ્યું મહત્વ

આ ટીમમાં ઉત્તર પ્રદેશ અને ગુજરાતના નેતાઓને ખાસ ધ્યાનમાં રાખવામાં આવ્યા છે. આવતા વર્ષે યુપીમાં ચૂંટણી હોવાથી બસ્તીથી આવતા હરીશ દ્વિવેદીને બ્રાહ્મણ ચહેરા તરીકે પ્રમોટ કરી મહામંત્રી બનાવાયા છે.

જ્યારે ગુજરાત માટે મોટા સમાચાર એ છે કે વડોદરાના લોકસભા સાંસદ હેમાંગ જોશીનું મોટું પ્રમોશન થયું છે. યુવાનોને પાર્ટીની વિચારધારા સાથે જોડવાની અને પાર્ટીની નજીક લાવવાની મોટી જવાબદારી હેમાંગ જોશીને સોંપવામાં આવી છે. આ ઉપરાંત સુનીલ બંસલ પણ આ ટીમનો હિસ્સો રહેશે. હરિયાણાથી આવતા અને મનોહર લાલ ખટ્ટરના નજીકના મનાતા ABVP ના પૂર્વ કાર્યકર સંજય ભાટિયાને પણ મહામંત્રી બનાવાયા છે.

2027 થી 2029 સુધીની મોટી અગ્નિપરીક્ષા

ભાજપે પોતાના આગામી મિશન માટે અત્યારથી જ નીતિન નવીનની આગેવાનીમાં ફોજ તૈયાર કરી દીધી છે. 7 મહિના પહેલા જ પાર્ટીની કમાન સંભાળનાર નીતિન નવીન સામે હવે મોટા પડકારો છે.તેમની સૌથી પહેલી અને મોટી અગ્નિપરીક્ષા વર્ષ 2027 માં થશે. વર્ષ 2027 માં ઉત્તર પ્રદેશ સહિત 7 રાજ્યોમાં વિધાનસભા ચૂંટણીઓ યોજાવાની છે. યુપીમાં જીતની હેટ્રિક લગાવવી એ પાર્ટી માટે સૌથી મોટો પડકાર રહેશે.

ત્યારબાદ વર્ષ 2028 માં મધ્યપ્રદેશ, રાજસ્થાન, કર્ણાટક અને તેલંગાણા સહિત કુલ 9 રાજ્યોમાં ચૂંટણીઓનો સંગ્રામ જામશે. આ તમામ રાજ્યોની ચૂંટણીઓ પાર કર્યા બાદ નીતિન નવીનની ટીમ સામે અંતિમ અને સૌથી મોટો પડકાર વર્ષ 2029 ની લોકસભા ચૂંટણીનો રહેશે.

આ પણ વાંચો-ઉજ્જૈનમાં નાગપંચમી પર નાગચંદ્રેશ્વર મંદિરમાં ભીડ બેકાબૂ, નાસભાગ મચતા 3 શ્રદ્ધાળુઓ ગંભીર રીતે ઘાયલ