‘ભાજપ આતંકવાદીઓનો પક્ષ છે’, અર્બન નક્સલના જવાબમાં પીએમ મોદી પર ખડગેના આકરા પ્રહાર

કોંગ્રેસ અધ્યક્ષ મલ્લિકાર્જુન ખડગેએ વડાપ્રધાન નરેન્દ્ર મોદીની ટિપ્પણી પર તીખી પ્રતિક્રિયા આપી છે કે કોંગ્રેસ "અર્બન નક્સલવાદી" પાર્ટી ચલાવી રહી છે. તેના જવાબમાં ખડગેએ ભાજપને આતંકવાદીઓની પાર્ટી ગણાવી હતી. તમને જણાવી દઈએ કે પીએમ મોદીએ 5 ઓક્ટોબરે કહ્યું હતું કે કોંગ્રેસ અર્બન નક્સલવાદીઓના જૂથ દ્વારા નિયંત્રિત છે. તેમણે લોકોને કોંગ્રેસના "ખતરનાક એજન્ડા" ને હરાવવા માટે સાથે આવવા વિનંતી કરી.

વડાપ્રધાન નરેન્દ્ર મોદીના દાવાને ફગાવી દેતા ખડગેએ કહ્યું, "મોદી હંમેશા કોંગ્રેસને અર્બન નક્સલવાદી પાર્ટી કહે છે. આ તેમની આદત છે. પરંતુ તેમની પોતાની પાર્ટીનું શું? ભાજપ આતંકવાદીઓની પાર્ટી છે, જે લિંચિંગમાં સામેલ છે. મોદીને કોઈ અધિકાર નથી આવા આક્ષેપો કરવા.’

મહારાષ્ટ્રમાં એક રેલીને સંબોધતા પીએમ મોદીએ કહ્યું હતું કે, "કોંગ્રેસનું સમગ્ર ઇકોસિસ્ટમ, અર્બન નક્સલીઓની આખી ગેંગ... જનતાને ગેરમાર્ગે દોરવામાં વ્યસ્ત હતી પરંતુ તેમના તમામ ષડયંત્રનો નાશ કરવામાં આવ્યા હતા. તેમણે દલિતોમાં જૂઠાણું ફેલાવવાનો પ્રયાસ કર્યો પરંતુ દલિત સમાજે તેના ખતરનાક ઈરાદાઓને સમજી લીધા. દલિતો સમજી ગયા કે કોંગ્રેસ તેમની અનામત છીનવીને તેમની વોટબેંકમાં ભાગલા પાડવા માંગે છે.

પીએમ મોદીએ કહ્યું કે ખેડૂતો અને યુવાનોને 'ઉશ્કેરવામાં' કોઈ કસર બાકી રાખવામાં આવી નથી, પરંતુ હરિયાણાના લોકોએ બતાવ્યું છે કે તેઓ હવે કોંગ્રેસ અને અર્બન નક્સલીઓના નફરતના ષડયંત્રનો ભોગ બનવાના નથી.