બે વોટર આઈડી રાખવી ગુનો! જેલ, દંડ અને મતદાનનો અધિકાર ગુમાવવાનો ખતરો, જાણી લો નિયમ

Two Voter IDs: બિહારમાં હાલમાં ચાલી રહેલા વોટર લિસ્ટના સ્પેશિયલ ઇન્ટેન્સિવ રિવિઝન (SIR) હેઠળ ડ્રાફ્ટ વોટર લિસ્ટમાં અનેક ગરબડોની ફરિયાદો સામે આવી રહી છે. આ દરમિયાન એક જ મતદાતાના બે વોટર આઈડી (EPIC) હોવાના કેસ પ્રકાશમાં આવ્યા છે. ચૂંટણી પંચના નિયમો અનુસાર બે વોટર આઈડી રાખવું એ ગેરકાયદેસર છે, જેના માટે જેલ, દંડ અને મતદાનનો અધિકાર ગુમાવવાની સજાનો પ્રાવધાન છે. નોંધનીય છે કે RJD નેતા તેજસ્વી યાદવને પણ બે વોટર આઈડી રાખવાના આરોપમાં ચૂંટણી પંચ દ્વારા નોટિસ મોકલવામાં આવી છે.

ચૂંટણી પંચની કડક નજર

ચૂંટણી પંચ દ્વારા SIRનું સતત મોનિટરિંગ કરવામાં આવી રહ્યું છે. દરેક ફરિયાદ અને ખોટી માહિતીનું ફેક્ટ-ચેકિંગ કરવામાં આવે છે. બિહારમાં SIRના પ્રથમ તબક્કામાં ગણતરી ફોર્મનું વિતરણ અને સંગ્રહ પૂર્ણ થઈ ગયું છે. હવે બીજા તબક્કામાં દાવા અને વાંધાની પ્રક્રિયા શરૂ થઈ છે.

બે વોટર આઈડી હોય તો એક તાત્કાલિક રદ કરો

જો કોઈ મતદાતાના બે અલગ-અલગ સ્થળે વોટર આઈડી બનાવેલા હોય, તો તેમણે તાત્કાલિક એક આઈડી રદ કરાવવું જોઈએ. આ માટે સંબંધિત વિસ્તારના બૂથ લેવલ ઓફિસર (BLO) પાસે જઈને ફોર્મ-7 ભરીને નામ નીકાળી શકાય છે. ફોર્મ-7નો ઉપયોગ મૃત્યુ કે સ્થળાંતર જેવા કારણોસર નામ હટાવવા માટે કરવામાં આવે છે. આ ઉપરાંત, ચૂંટણી પંચની ઓફિશિયલ વેબસાઈટ પરથી પણ ઓનલાઈન રદ કરાવી શકાય છે.

શું છે કાનૂની જોગવાઈ?

ચૂંટણી પંચના જણાવ્યા અનુસાર બે વોટર આઈડી રાખવું એ જનપ્રતિનિધિત્વ કાયદો, 1950ની કલમ 17 અને 18 હેઠળ ગુનો છે. આના માટે મહત્તમ એક વર્ષની જેલની સજા અને દંડ થઈ શકે છે. આ ઉપરાંત, મતદાતાને મતદાનનો અધિકાર પણ ગુમાવવો પડી શકે છે.