'હું સસ્તો રાજકારણી નથી, કોણ ખાડા પાડે છે ખબર છે': નીતિન પટેલના આકરા પ્રહારથી ગુજરાતના રાજકારણમાં ગરમાવો

Gujarat Politics: ભારતીય જનતા પાર્ટીના વરિષ્ઠ નેતા અને ગુજરાતના પૂર્વ નાયબ મુખ્યમંત્રી નીતિન પટેલનું એક નિવેદન ફરી એકવાર રાજ્યના રાજકારણમાં ચર્ચાનું કેન્દ્ર બન્યું છે. મહેસાણા જિલ્લાના કડી ખાતે ભાજપ દ્વારા આયોજિત સ્નેહમિલન કાર્યક્રમમાં મંચ પરથી નીતિન પટેલે પોતાની જ પાર્ટીના ધારાસભ્યો, મંત્રીમંડળ અને વર્તમાન વ્યવસ્થા પર સીધા આક્ષેપો કર્યા હતા. તેમના આ આકરા પ્રહારોથી રાજ્યના રાજકારણમાં અચાનક ગરમાવો આવી ગયો છે.

કડીના રાજકારણ પર સ્પષ્ટ નિવેદન

નીતિન પટેલે કડીના સ્થાનિક રાજકારણનો ઉલ્લેખ કરતાં સ્પષ્ટ શબ્દોમાં કહ્યું હતું કે, "ધારાસભ્ય બહાર ગામના છે, હું બહાર ગામનો નથી. હું કડીને 50 વર્ષથી ઓળખું છું." આ નિવેદન સ્થાનિક નેતૃત્વ પરના તેમના અસંતોષને છતો કરે છે. કાર્યકરો અને નેતાઓને સંબોધતા તેમણે પોતાના અનુભવનો હવાલો આપીને કહ્યું કે, "કડીને 50 વર્ષથી ઓળખું છું, કોણ ખાડા પાડે છે, કોણ પૂરે છે, તેની બધી ખબર છે." આ સાથે જ તેમણે કાર્યકરોને ચેતવણી આપતાં કહ્યું હતું કે, "મને છેતરતા નહીં, એમને છેતરજો."

ગ્રાન્ટ, ભ્રષ્ટાચાર અને પોતાનું મહત્ત્વ

મંત્રીમંડળ અને આંતરિક સંઘર્ષ પર કટાક્ષ

નીતિન પટેલ અહીં અટક્યા ન હતા. તેમણે મંત્રીઓના રાજીનામા અને મંત્રીમંડળમાંથી પોતાની બાદબાકી પર પણ આડકતરો કટાક્ષ કર્યો. તેમણે કહ્યું કે, "હમણાં બે-ત્રણ મંત્રીઓને રાજીનામા આપવા પડ્યા. એમના ટેકેદારોમાંથી બે-પાંચ જણાએ ખોટું કર્યું હોઈ શકે... એટલે એમને (મને) મંત્રીમંડળમાં ના લીધા." તેમણે પોતાની નારાજગી સ્પષ્ટ કરતાં કહ્યું કે, "હું બોલું છું તો ઘણાને ગમતું નથી, મારે તો બે બાજુ તકલીફ છે." જોકે, તેમણે કડીના લોકોને આશ્વાસન આપતાં કહ્યું કે, "કડીમાં હું બેઠો છું ત્યાં સુધી ખોટું નહીં થવા દઉં."

કોંગ્રેસની તીખી પ્રતિક્રિયા: 'ભાજપમાં સત્તાની સાઠમારી'

નીતિન પટેલના આ નિવેદનો પર કોંગ્રેસે તરત જ પ્રતિક્રિયા આપી. કોંગ્રેસના પ્રવક્તા મનીષ દોશીએ કહ્યું કે નીતિન પટેલે જે કહ્યું તે સ્પષ્ટપણે ભાજપના જ નેતાઓ સામેના ચાબખા છે.

મનીષ દોશીએ ભાજપના આંતરિક રાજકારણ પર પ્રકાશ પાડતાં કહ્યું કે, "નિશ્ચિતપણે, નીતિન પટેલ જાહેર જીવનના વ્યક્તિ છે. ભાજપમાં સત્તાની સાઠમારી અને વરિષ્ઠોને પૂરા કરવા માટેની જે આખી લાંબા સમયથી પરંપરા ચાલે છે, તે જ સ્થિતિ અત્યારે નીતિનભાઈ પટેલની છે." તેમણે આ સંઘર્ષને 2001માં નરેન્દ્ર મોદીના આગમન પછી થયેલા રાજકીય ફેરફારો સાથે સરખાવ્યો હતો, જેમાં એ.કે. પટેલ સાહેબ, રાજેન્દ્રસિંહ રાણા અને સ્વર્ગસ્થ કેશુભાઈ પટેલ જેવા વરિષ્ઠ નેતાઓની સ્થિતિનો ઉલ્લેખ કર્યો.

ભ્રષ્ટાચારના મુદ્દે સરકારને ઘેરી

ગ્રાન્ટના મુદ્દા પર નીતિન પટેલના નિવેદનને ટાંકીને મનીષ દોશીએ કહ્યું કે, "નીતિન પટેલ કરોડો રૂપિયા ક્યાં વપરાય જાય છે તેની વાત કરીને ભાજપ સરકાર ભ્રષ્ટાચારમાં ગળાડૂબ છે, તેની જ વાત કહી છે." તેમણે આશા વ્યક્ત કરી કે ભૂપેન્દ્ર પટેલ સરકાર આ મુદ્દાને ગંભીરતાથી લેશે અને જનતાને રાહત મળે તે માટે કામ કરશે.

નીતિન પટેલના આ નિવેદનથી ગુજરાત ભાજપમાં આંતરિક જૂથવાદ અને વરિષ્ઠ નેતાઓની નારાજગી ફરી એકવાર જાહેર મંચ પર આવી હોવાની ચર્ચાએ જોર પકડ્યું છે. તેમના આ પ્રહારો દર્શાવે છે કે પાર્ટીની અંદર બધું બરાબર નથી, અને આ નિવેદનો આગામી સમયમાં રાજ્યના રાજકારણને અસર કરી શકે છે.

આ પણ વાંચો- ગાંધીનગરમાં ITની મોટી કાર્યવાહી: ત્રણ સ્થળોએ દરોડા, બિનમાન્યતા પ્રાપ્ત રાજકીય પક્ષ પર સકંજો