Monsoon Session 2025: પહેલગામ-ઓપરેશન સિંદૂર પર વિપક્ષનો હલ્લાબોલ, બિહાર ચૂંટણી પહેલાં BJPનો જોરદાર જવાબ

Monsoon Session 2025: સંસદનું માનસૂન સત્ર આવતીકાલથી એટલે કે 21 જુલાઈથી શરૂ થવા જઈ રહ્યું છે, જેમાં વિપક્ષી ગઠબંધન ‘ઈન્ડિયા’ સરકારને પહેલગામ આતંકી હુમલા અને ઓપરેશન સિંદૂર સહિતના મુદ્દાઓ પર ઘેરવાની તૈયારીમાં છે. આ સાથે બિહાર વિધાનસભા ચૂંટણી પહેલાં વિપક્ષ પોતાની તાકાત બતાવવા માટે આ સત્રને મહત્વનો મોકો માની રહ્યું છે. બીજી તરફ, ભાજપે સ્પષ્ટ કર્યું છે કે તે વિપક્ષના દરેક સવાલનો જવાબ આપવા તૈયાર છે.

વિપક્ષની રણનીતિ: પહેલગામ અને ઓપરેશન સિંદૂર પર ચર્ચાની માંગ

વિપક્ષી ગઠબંધન ‘ઈન્ડિયા’એ 19 જુલાઈએ વર્ચ્યુઅલ બેઠક યોજીને ચોમાસુ સત્રની રણનીતિ ઘડી હતી. રાજકીય ગરમાગરમીના માહોલ વચ્ચે આ સત્રને લઈને તેમની રણનીતિ તૈયાર કરી છે. કોંગ્રેસના નેતા જયરામ રમેશે જણાવ્યું હતું કે, પહેલગામ આતંકી હુમલા અને ઓપરેશન સિંદૂર અંગે ઓછામાં ઓછા બે દિવસની ચર્ચાની માંગ કરવામાં આવશે. આ ઉપરાંત, ચીન સાથેના સંબંધો અને અમેરિકી રાષ્ટ્રપતિ ડોનાલ્ડ ટ્રમ્પના મધ્યસ્થી નિવેદનો પર પણ વિપક્ષ સવાલ ઉઠાવવાની તૈયારીમાં છે.

વિપક્ષે એમ પણ માંગ કરી છે કે વડાપ્રધાન નરેન્દ્ર મોદીએ સંસદમાં આવીને આ મુદ્દાઓ પર સીધો જવાબ આપવો જોઈએ. જયરામ રમેશે ભારપૂર્વક જણાવ્યું હતું કે, સંસદમાં ગતિરોધ ટાળવાની જવાબદારી સરકારની છે, વિપક્ષની નહીં.

ભાજપે વિપક્ષના આક્રમણનો સામનો કરવા માટે પોતાની તૈયારી દર્શાવી છે. પાર્ટીના નેતાઓએ જણાવ્યું છે કે, ઓપરેશન સિંદૂર એ રાષ્ટ્રની સુરક્ષા અને આતંકવાદ સામેની લડાઈનો એક મહત્વનો ભાગ હતો, જેની સફળતાને વિશ્વભરમાં સ્વીકૃતિ મળી છે. ભાજપે એમ પણ કહ્યું છે કે, વિપક્ષના તમામ સવાલોનો જવાબ આપવામાં આવશે અને કોઈ પણ મુદ્દે ચર્ચાથી પીછેહઠ કરવામાં નહીં આવે.

બિહાર ચૂંટણી પહેલાં રાજકીય ગરમાગરમી

બિહાર વિધાનસભા ચૂંટણીની તૈયારીઓ વચ્ચે આ સંસદીય સત્ર રાજકીય રીતે ખૂબ જ મહત્વનું છે. વિપક્ષ બિહારમાં વોટબંધી અને ચૂંટણી પ્રક્રિયા પર પણ સવાલ ઉઠાવવાની તૈયારીમાં છે. આ સાથે, ઓપરેશન સિંદૂરની સફળતાને ભાજપ દ્વારા રાષ્ટ્રવાદી એજન્ડા તરીકે રજૂ કરવામાં આવી રહ્યું છે, જે બિહારના મતદારો પર અસર કરી શકે છે.

માનસૂન સત્રની અન્ય મહત્વની બાબતો

આ સત્ર દરમિયાન અન્ય કેટલાંક મહત્વના બિલો પર પણ ચર્ચા થવાની સંભાવના છે. આ ઉપરાંત, વિપક્ષ દ્વારા તપાસ એજન્સીઓના દુરુપયોગનો મુદ્દો પણ ઉઠાવવામાં આવશે. 21 જુલાઈથી 21 ઓગસ્ટ સુધી ચાલનારું આ સત્ર રાજકીય દૃષ્ટિએ ખૂબ જ રોમાંચક રહેવાની અપેક્ષા છે.

આ પમ વાંચો-Mumbai Local Train: મુંબઈમાં લોકલ ટ્રેનની ભીડ ઘટાડવા રોપ-વે, પોડ ટેક્સી અને વોટર ટ્રાન્સપોર્ટની યોજના