Punjab Assembly Elections 2027: જીત માટે ભાજપે ચલાવ્યું ‘બ્રહ્માસ્ત્ર'! રાઘવ ચઢ્ઢા સહિત AAP છોડીને આવેલા 5 સાંસદોને સોંપી મોટી જવાબદારી
Punjab Assembly Elections 2027: પંજાબમાં 2027ની વિધાનસભા ચૂંટણી પહેલા ભાજપે મેનિફેસ્ટો અને ચાર્જશીટ કમિટીની જાહેરાત કરી છે. જેમાં રાઘવ ચઢ્ઢા સહિત પૂર્વ AAP સાંસદોને મોટી જવાબદારી સોંપાઈ છે. જાણો સંપૂર્ણ યાદી.
Punjab Assembly Elections 2027: પંજાબમાં વર્ષ 2027ની શરૂઆતમાં યોજાનારી 117 બેઠકોની વિધાનસભા ચૂંટણીને લઈને અત્યારથી જ રાજકીય ગરમાવો શરૂ થઈ ગયો છે. ચૂંટણીના મેદાનમાં બાજી મારવા માટે ભારતીય જનતા પાર્ટી એ પોતાની રણનીતિ તેજ કરી દીધી છે. રવિવારે પંજાબ ભાજપના પ્રદેશ અધ્યક્ષ કેવલ સિંહ ઢિલ્લોને રાજ્ય સ્તરની બે અત્યંત મહત્વપૂર્ણ સમિતિઓ—'મેનિફેસ્ટો કમિટી' (ચૂંટણી ઢંઢેરો સમિતિ) અને 'ચાર્જશીટ કમિટી'ની સત્તાવાર જાહેરાત કરી છે.
ભાજપ કાર્યાલય દ્વારા જારી કરવામાં આવેલા નિવેદન મુજબ, આગામી ચૂંટણી માટે પાર્ટીએ રાઘવ ચઢ્ઢાને મોટી જવાબદારી સોંપીને મેનિફેસ્ટો કમિટીમાં સામેલ કર્યા છે. ખાસ વાત એ છે કે રાઘવ ચઢ્ઢાની સાથે આમ આદમી પાર્ટી (AAP) છોડીને ભાજપમાં જોડાયેલા અન્ય 5 રાજ્યસભા સાંસદોને પણ આ બંને મહત્વની સમિતિઓમાં સ્થાન આપવામાં આવ્યું છે. પ્રદેશ અધ્યક્ષ કેવલ સિંહ ઢિલ્લોને જણાવ્યું હતું કે આગામી દિવસોમાં પાર્ટી દ્વારા હજુ વધુ સમિતિઓની પણ જાહેરાત કરવામાં આવશે.
અવિનાશ રાય ખન્નાને સોંપાઈ મેનિફેસ્ટો કમિટીની કમાન
પંજાબ ભાજપે પૂર્વ સાંસદ અને પાર્ટીના વરિષ્ઠ નેતા અવિનાશ રાય ખન્નાને મેનિફેસ્ટો કમિટીના ચેરમેન નિયુક્ત કર્યા છે. તેમના નેતૃત્વ હેઠળની આ સમિતિમાં અન્ય 12 દિગ્ગજ સભ્યોનો સમાવેશ કરવામાં આવ્યો છે:
* મનપ્રીત સિંહ બાદલ
* અશ્વની શર્મા
* મનોરંજન કાલિયા
* સોમ પ્રકાશ
* રાણા ગુરમીત સિંહ સોઢી
* અશ્વની સેખરી
* સતનામ સિંહ સંધૂ
* રાઘવ ચઢ્ઢા
* રાજિંદર ગુપ્તા
* હરભજન સિંહ
* પરમપાલ કૌર
* એચ. એસ. ફૂલ્કા
સુનીલ જાખડ બન્યા ચાર્જશીટ કમિટીના ચેરમેન
વિરોધી પક્ષોને ઘેરવા માટે રચાયેલી ચાર્જશીટ કમિટીના ચેરમેન પદની જવાબદારી સુનીલ જાખડને સોંપવામાં આવી છે. આ સમિતિમાં ભાજપના અનેક વરિષ્ઠ નેતાઓ અને પૂર્વ કેન્દ્રીય મંત્રીઓને સ્થાન મળ્યું છે, જેમાં નીચે મુજબના નેતાઓ સામેલ છે:
* ઈકબાલ સિંહ લાલપુરા, વિજય સાંપલા અને શ્વેત મલિક
* મહારાણી પરનીત કૌર, રવનીત સિંહ બિટ્ટૂ અને દિનેશ બબ્બૂ
પંજાબ કોંગ્રેસે પણ પક્ષપ્રવેશ માટે રચી 4 સભ્યોની સમિતિ
એક તરફ ભાજપે ચૂંટણી સમિતિઓ જાહેર કરી છે, તો બીજી તરફ પંજાબ કોંગ્રેસે પણ સંગઠનને મજબૂત કરવા કવાયત હાથ ધરી છે. પંજાબ કોંગ્રેસના અધ્યક્ષ પરગટ સિંહે રવિવારે અન્ય પક્ષોમાંથી આવતા નેતાઓને કોંગ્રેસમાં સામેલ કરવાની પ્રક્રિયા પર દેખરેખ રાખવા અને સંકલન સાધવા માટે 4 સભ્યોની વિશેષ સમિતિની રચના કરી છે. આ સમિતિમાં નીચેના નેતાઓનો સમાવેશ થાય છે:
* વિજય ઈન્દર સિંગલા: પૂર્વ ધારાસભ્ય અને કોંગ્રેસ કાર્ય સમિતિ (CWC) ના સભ્ય
* અરુણા ચૌધરી: ધારાસભ્ય અને વિધાનસભામાં કોંગ્રેસ વિધાયક દળના ઉપનેતા
* કુશલદીપ સિંહ ઢિલ્લોન: પૂર્વ ધારાસભ્ય
* હરદેવ સિંહ લડ્ડી: ધારાસભ્ય
સ્થાનિક નેતાઓની સહમતિ બાદ જ કોંગ્રેસમાં મળશે એન્ટ્રી
પંજાબ કોંગ્રેસે પોતાના સત્તાવાર નિવેદનમાં સ્પષ્ટ કર્યું છે કે આ 4 સભ્યોની સમિતિ એ બાબતની ખાતરી કરશે કે અન્ય પક્ષના કોઈ પણ નેતાને કોંગ્રેસમાં પ્રવેશ આપતા પહેલાં સંબંધિત વિસ્તારના વરિષ્ઠ નેતાઓ અને જિલ્લા કોંગ્રેસ અધ્યક્ષો સાથે યોગ્ય ચર્ચા-વિચારણા કરવામાં આવે. સ્થાનિક નેતૃત્વ સાથે સંકલન જાળવીને અને તેમનો અભિપ્રાય લીધા બાદ જ પાર્ટીમાં નવા નેતાઓના પ્રવેશની પ્રક્રિયા આગળ વધારવામાં આવશે.