ઓડિશા: વીકે પાંડિયનની પત્ની સુજાતા રાઉતની રાજકારણમાં એન્ટ્રી, આગામી ચૂંટણીમાં BJDની કમાન કોણ સંભાળશે? નવીન પટનાયકે કર્યો મોટો ખુલાસો

Odisha Politics: ઓડિશાના રાજકારણમાં એક મોટો અને મહત્વનો વળાંક આવ્યો છે. પૂર્વ મુખ્યમંત્રી નવીન પટનાયકના સૌથી નજીકના સહયોગી મનાતા વીકે પાંડિયનની પત્ની અને પૂર્વ IAS અધિકારી સુજાતા રાઉત કાર્તિકેયન સત્તાવાર રીતે બીજૂ જનતા દળ (BJD)માં જોડાઈ ગયા છે. ગુરુવારે પાર્ટીના મુખ્યાલય ‘શંખ ભવન' ખાતે નવીન પટનાયકની હાજરીમાં તેમણે વિધિવત રીતે પાર્ટીનો ખેસ પહેર્યો હતો.

નવીન પટનાયકની મોટી જાહેરાત: કોણ કરશે નેતૃત્વ?

નવીન પટનાયકે સુજાતા રાઉતનું પાર્ટીમાં સ્વાગત કરતા કહ્યું કે, "સુજાતા એક સામાન્ય કાર્યકર્તા તરીકે BJDમાં જોડાશે. તેઓ એક પૂર્વ IAS અધિકારી રહ્યા છે અને તેમણે ઓડિશાની મહિલાઓની ભલાઈ માટે ઘણા મહત્વના પદો પર શાનદાર કામ કર્યું છે."

આ સાથે જ પટનાયકે એક એવી જાહેરાત કરી જેણે ભવિષ્યમાં પાર્ટીની કમાન કોણ સંભાળશે તેવી તમામ અટકળો પર પૂર્ણવિરામ મૂકી દીધું છે. તેમણે મીડિયા સમક્ષ એકદમ સ્પષ્ટ શબ્દોમાં કહ્યું, "હું ફરી એકવાર બધાને સ્પષ્ટ કરવા માંગુ છું કે આગામી ચૂંટણીઓમાં BJDનું નેતૃત્વ હું પોતે જ કરીશ." આ નિવેદન ઓડિશાના રાજકારણમાં એક મોટો મેસેજ આપે છે કે હાલ પાર્ટીનો કંટ્રોલ નવીન પટનાયકના જ હાથમાં રહેશે.

પાર્ટીમાં જોડાયા બાદ પત્રકારો સાથે વાત કરતા સુજાતા રાઉતે પોતાની ખુશી વ્યક્ત કરી હતી. તેમણે કહ્યું, "મને 24 વર્ષ સુધી નવીન પટનાયક સાહેબના નેતૃત્વમાં ઓડિશાના લોકોની સેવા કરવાની તક મળી હતી. આજે મને ફરીથી તેમના માર્ગદર્શન હેઠળ રાજ્ય માટે કામ કરવાનું સૌભાગ્ય મળ્યું છે. ભગવાન જગન્નાથ અને લાખો BJD કાર્યકર્તાઓના આશીર્વાદથી હું પૂરી નિષ્ઠા અને લગનથી લોકો માટે કામ કરીશ."

નોંધનીય છે કે 2000ની બેચના આ અધિકારીએ તાજેતરમાં 13 માર્ચ, 2025ના રોજ સિવિલ સર્વિસમાંથી સ્વૈચ્છિક રાજીનામું (VRS) આપ્યું હતું.

વીકે પાંડિયનની એક્ઝિટ અને સુજાતાની એન્ટ્રીનું કનેક્શન

વર્ષ 2024ની લોકસભા અને વિધાનસભા ચૂંટણીમાં BJDની કારમી હાર બાદ વીકે પાંડિયન રાજકારણથી દૂર થઈ ગયા હતા અને તેમણે હારની નૈતિક જવાબદારી સ્વીકારી હતી.

ઓડિયા અસ્મિતાનો મુદ્દો: પાંડિયન મૂળ તમિલનાડુના હોવાથી વિપક્ષોએ તેમના પર ભારે નિશાન સાધ્યું હતું. પરંતુ, સુજાતા રાઉત મૂળ ઓડિશાના કેન્દ્રપાડા જિલ્લાના છે.

માસ્ટરસ્ટ્રોક: નવીન પટનાયકે સમજદારીપૂર્વક તેમને 'સુજાતા રાઉત કાર્તિકેયન'ને બદલે માત્ર 'સુજાતા રાઉત' કહીને સંબોધ્યા હતા, જેથી વિપક્ષોના ‘ઓડિયા પ્રાઈડ' (ઓડિયા અસ્મિતા) વાળા મુદ્દાને સરળતાથી કાપી શકાય.

મહિલા વોટબેંક પર નજર: મિશન શક્તિનો પાવર

સુજાતા રાઉતની ખરી તાકાત તેમનું જમીની સ્તરનું કનેક્શન છે. તેઓ કટક અને સુંદરગઢના કલેક્ટર રહી ચૂક્યા છે. અગાઉની BJD સરકારના મહિલા સશક્તિકરણ કાર્યક્રમ 'મિશન શક્તિ' ને સફળ બનાવવાનો પૂરો શ્રેય સુજાતાને જ જાય છે. તેમણે 6 લાખ જેટલા સેલ્ફ-હેલ્પ ગ્રુપ (SHG) દ્વારા લગભગ 70 લાખ મહિલાઓને જોડવાનું વિશાળ કામ કર્યું છે.

BJD ના નેતાઓને પૂરી આશા છે કે સુજાતાના સક્રિય રાજકારણમાં આવવાથી પાર્ટીની એક્સ-વોટબેંક ગણાતી 'મહિલાઓ' ફરીથી પાર્ટી સાથે મજબૂતીથી જોડાશે. પટનાયકને પણ વિશ્વાસ છે કે સમય જતા સુજાતા તેમની નવી ભૂમિકામાં ઢળી જશે અને મહિલાઓનું શાનદાર નેતૃત્વ કરશે.

આ પણ વાંચો- જમ્મુ-કાશ્મીરમાં બબાલ: 40 આર્મી જવાનોએ પોલીસ સ્ટેશનમાં ઘૂસીને પોલીસકર્મીઓને ફટકાર્યા, હત્યાના પ્રયાસની FIR દાખલ