પશ્ચિમ બંગાળમાં 6 મહિનામાં આવશે UCC! CM શુભેન્દુ અધિકારીનું લવ જિહાદ અને લેન્ડ જિહાદ પર મોટું એલાન

West Bengal UCC: પશ્ચિમ બંગાળના રાજકારણમાં મોટો વળાંક આવ્યો છે. રાજ્યના મુખ્યમંત્રી શુભેન્દુ અધિકારીએ એક ઐતિહાસિક જાહેરાત કરતા જણાવ્યું છે કે પશ્ચિમ બંગાળમાં ટૂંક સમયમાં સમાન નાગરિક સંહિતા (UCC) લાગુ કરવામાં આવશે. આ સાથે જ તેમણે દાવો કર્યો છે કે આવનારા 6 મહિનાની અંદર રાજ્યમાં લવ જિહાદ, લેન્ડ જિહાદ અને બળજબરીથી કરવામાં આવતા ધર્માંતરણને રોકવા માટે એકદમ કડક કાયદો લાવવામાં આવશે.

વિશ્વ હિન્દુ પરિષદના પૂર્વ અધ્યક્ષ અશોક સિંઘલની જન્મ શતાબ્દી નિમિત્તે યોજાયેલા એક ખાસ કાર્યક્રમમાં સીએમ શુભેન્દુ અધિકારીએ જનતાને સંબોધિત કરી હતી. તેમણે સ્પષ્ટ કર્યું કે બંગાળમાં બીજેપી શાસિત ઉત્તરાખંડ અને ગુજરાત મોડલના આધારે જ યુનિફોર્મ સિવિલ કોડ લાગુ કરવાની તૈયારીઓ ચાલી રહી છે.

રાષ્ટ્રવિરોધી પ્રવૃત્તિઓ હવે સાંખી લેવાશે નહીં

મુખ્યમંત્રીએ આકરા શબ્દોમાં કહ્યું કે, "અમારી સરકાર બંગાળમાં કોઈ પણ રાષ્ટ્રવિરોધી પ્રવૃત્તિને મંજૂરી નહીં આપે. સરકાર સંપૂર્ણપણે બંધારણ મુજબ જ કામ કરશે, પરંતુ ભારતીય સંસ્કૃતિ, સનાતન પરંપરાઓ, મંદિરો અને મઠો પર થતા હુમલાઓ હવે જરા પણ સહન કરવામાં નહીં આવે." સ્વામી વિવેકાનંદ અને મહાપ્રભુ શ્રી ચૈતન્ય જેવા મહાપુરુષોની વિરાસતને જાળવી રાખવા માટે તેમણે લોકોને એકજૂટ રહેવાની અપીલ કરી હતી.

કમિટીની રચના: બંગાળમાં UCC નો ડ્રાફ્ટ તૈયાર કરવા અને તેની સમીક્ષા માટે સુપ્રીમ કોર્ટના પૂર્વ જજ રંજના પ્રકાશ દેસાઈની અધ્યક્ષતામાં એક ઉચ્ચ સ્તરીય કમિટીની રચના કરવામાં આવી છે.

નિયમોમાં સમાનતા: આ બિલનો મુખ્ય હેતુ લગ્ન, છૂટાછેડા, મિલકતનો વારસો અને બાળક દત્તક લેવા જેવા મામલાઓમાં તમામ ધર્મના લોકો માટે એકસમાન કાયદો બનાવવાનો છે.

ધાર્મિક પર્યટન વિકાસ: રાજ્યમાં ધાર્મિક પર્યટન સર્કિટ બનાવવા માટે 1000 કરોડ રૂપિયા ફાળવવામાં આવ્યા છે, જેને આગામી 2 વર્ષમાં પૂર્ણ કરવામાં આવશે.

TMCની પૂર્વ સરકાર પર પ્રહાર

અગાઉની તૃણમૂલ કોંગ્રેસ સરકારના પતનનું કારણ જણાવતા મુખ્યમંત્રીએ કહ્યું કે, "હિન્દુઓની ભાવનાઓ, સંગઠનો અને દેવી-દેવતાઓનું વારંવાર અપમાન કરવું એ અગાઉની સરકાર પડવાનું મુખ્ય કારણ હતું. લોકોએ ઘણો સમય આ સહન કર્યું અને આખરે તે પાર્ટીને વિદાય આપી દીધી." શુભેન્દુ અધિકારીએ 2021થી 2026 સુધી વિપક્ષના નેતા તરીકે હિન્દુઓ પર થતા અત્યાચારો સામે કેવી લડત આપી હતી તેની યાદો પણ તાજી કરી હતી. નોંધનીય છે કે 2026 ની વિધાનસભા ચૂંટણીમાં UCC એ બીજેપીનો સૌથી મોટો વાયદો હતો.

આગામી ભવ્ય કાર્યક્રમોની રૂપરેખા

સરકારે બંગાળમાં ભવ્ય ધાર્મિક અને સાંસ્કૃતિક કાર્યક્રમોની તૈયારી શરૂ કરી દીધી છે. નવેમ્બર મહિનામાં નેતાજી ઇન્ડોર સ્ટેડિયમમાં 20000 લોકો એકસાથે હનુમાન ચાલીસાના પાઠ કરશે. 29 ડિસેમ્બરના રોજ 10 લાખ લોકો દ્વારા સામૂહિક ગીતા પાઠનું આયોજન કરવામાં આવ્યું છે. આવતા વર્ષે યોજાનારા ગંગાસાગર મેળા માટે અત્યારથી જ તૈયારીઓ શરૂ કરી દેવાઈ છે, જેમાં ભક્તોને આંતરરાષ્ટ્રીય સ્તરની સુવિધાઓ અપાશે. બંગાળ સરકાર હવે આક્રમક રીતે પોતાના વચનો પૂરા કરવાની દિશામાં આગળ વધી રહી છે, જે બંગાળની સામાજિક વ્યવસ્થામાં મોટા ફેરફારો લાવશે.

આ પણ વાંચો- શેરબજારના કડાકામાં FD થી પણ સારું રિટર્ન આપશે SBI ની આ 3 સ્કીમ, જાણો 2026નો બેસ્ટ ઇન્વેસ્ટમેન્ટ પ્લાન