Housing Prices: તમારું સપનાનું ઘર બનાવવું હવે વધુ મોંઘું. 5 વર્ષમાં ખર્ચ 34% વધ્યો, જાણો ઈરાન સંકટે કેવી રીતે વધારી મુશ્કેલી

Housing Prices: સામાન્ય માણસ માટે પોતાનું ઘર બનાવવું એ જીવનનું સૌથી મોટું સપનું હોય છે. પરંતુ હવે આ સપનું પૂરું કરવું ધીમે ધીમે વધુ મોંઘું બની રહ્યું છે. દેશના 7 મોટા શહેરોમાં ઘરોના ભાવ આસમાને પહોંચ્યા છે. Anarock Researchના લેટેસ્ટ રિપોર્ટ મુજબ, વર્ષ 2021 થી 2025 વચ્ચે ઘરોની કિંમતમાં 59% નો જંગી ઉછાળો આવ્યો છે. જ્યારે આ જ સમયગાળામાં ઘર બનાવવા પાછળનો ખર્ચ  34% જેટલો વધ્યો છે. એટલે કે, બાંધકામ ખર્ચ કરતા ઘરોના ભાવ વધુ ઝડપથી વધ્યા છે.

બાંધકામ ખર્ચ અને ઘરોના ભાવમાં કેટલો તફાવત?

આંકડાકીય રીતે સમજીએ તો, વર્ષ 2021 માં એક સ્ટાન્ડર્ડ-પ્લસ રેસિડેન્શિયલ પ્રોજેક્ટ બનાવવાનો સરેરાશ ખર્ચ 2,681 રૂપિયા પ્રતિ સ્ક્વેર ફૂટ હતો, જે 2025 માં વધીને 3,604 રૂપિયા પ્રતિ સ્ક્વેર ફૂટ થઈ ગયો છે. આમાં વાર્ષિક 6.9% નો વધારો નોંધાયો છે.

બીજી તરફ, ઘરોની સરેરાશ કિંમત જે 2021 માં 5,826 રૂપિયા પ્રતિ સ્ક્વેર ફૂટ હતી, તે 2025 માં વધીને સીધી 9,260 રૂપિયા પ્રતિ સ્ક્વેર ફૂટ પર પહોંચી ગઈ છે. ઘરોના ભાવમાં વાર્ષિક 12% ના દરે વધારો જોવા મળ્યો છે.

Anarockના રિપોર્ટ અનુસાર, ઘરોના ભાવ વધવામાં 66% ફાળો માત્ર બાંધકામ ખર્ચનો છે. જ્યારે બાકીનો 34% વધારો જમીનની કિંમત, બિલ્ડરના પ્રોફિટ માર્જિન અને ડિમાન્ડ-સપ્લાયને કારણે છે.

Anarock ગ્રુપના વાઈસ ચેરમેન સંતોષ કુમારના જણાવ્યા મુજબ, વર્ષ 2021 થી 2026 ના પહેલા છ મહિના સુધીમાં દેશના 7 મોટા શહેરોમાં જમીનના ભાવ 50 થી 120% સુધી વધ્યા છે. ખાસ કરીને દિલ્હી NCR માં 70 થી 130% અને બેંગલુરુમાં 60 થી 120% નો ઉછાળો નોંધાયો છે. જ્યાં ઇન્ફ્રાસ્ટ્રક્ચર ઝડપથી બની રહ્યું છે, ત્યાં પ્રોજેક્ટ શરૂ થાય તે પહેલાં જ જમીન મોંઘી થઈ જાય છે.

પશ્ચિમ એશિયા સંકટની સીધી અસર

બાંધકામ ખર્ચ પર હવે ઈરાન અને પશ્ચિમ એશિયામાં ચાલી રહેલા યુદ્ધ અને તણાવની સીધી અસર પડી રહી છે. આ સંકટને કારણે કુલ બાંધકામ ખર્ચમાં 8 થી 10% નો વધારો થયો છે. સ્ટીલના ભાવ 20% વધ્યા છે, જેમાં TMT બાર 72,000 રૂપિયા પ્રતિ ટન પહોંચી ગયા છે. ફ્યુઅલ (ઈંધણ) અને લોજિસ્ટિક્સ ખર્ચ 15 થી 20% વધ્યો છે. ટાઇલ્સ, ગ્લાસ અને હાર્ડવેર જેવી વસ્તુઓ 8 થી 12% મોંઘી થઈ છે. MEP (મિકેનિકલ, ઇલેક્ટ્રિકલ અને પ્લમ્બિંગ) નો ખર્ચ પણ 9 થી 13% વધ્યો છે. 2023 થી 2025 ની વચ્ચે કોર બિલ્ડિંગનો ખર્ચ 13% વધીને 2,212 રૂપિયા પ્રતિ સ્ક્વેર ફૂટ અને MEP ખર્ચ 17% વધીને 788 રૂપિયા પ્રતિ સ્ક્વેર ફૂટ થઈ ગયો છે.

મજૂરી અને સિમેન્ટના ભાવમાં રાહત

કોઈપણ પ્રોજેક્ટમાં મજૂરીનો હિસ્સો સૌથી વધુ એટલે કે 25 થી 30% હોય છે. રાહતની વાત એ છે કે અન્ય મટિરિયલની સરખામણીમાં લેબર કોસ્ટમાં માત્ર 5 થી 6% નો જ વધારો થયો છે. આ ઉપરાંત સિમેન્ટના ભાવ પણ 4 થી 5% જ વધ્યા છે.

નવા અને જૂના પ્રોજેક્ટ્સ પર શું અસર પડશે?

આ વધતા ખર્ચને કારણે જૂના પ્રોજેક્ટ કે જે પહેલાથી વેચાઈ ગયા છે, તેમાં ડેવલપર્સ પાસે ભાવ વધારવાનો કોઈ અવકાશ નથી, જેનાથી તેમના નફા પર માઠી અસર પડશે. જ્યારે નવા પ્રોજેક્ટમાં ડેવલપર્સ ભાવ વધારી શકે છે, પરંતુ મિડ-ઇન્કમ અને એફોર્ડેબલ હાઉસિંગ માં ગ્રાહકોની બજેટ મર્યાદા હોવાથી ત્યાં ખૂબ મોટા પાયે ભાવ વધારવા ડેવલપર્સ માટે પણ મુશ્કેલ સાબિત થશે.

આ પણ વાંચો-Closing Bell : નિફ્ટી 23,800ની નીચે ખાબક્યો, સેન્સેક્સ 380 પોઈન્ટ તૂટ્યો, માત્ર ફાર્મા સેક્ટર જ ચમક્યું