રિયલ એસ્ટેટ સેક્ટરમાં આવશે નોકરીઓનું ઘોડાપૂર! 2030 સુધીમાં 10 કરોડ લોકોને મળશે રોજગાર, માર્કેટ સાઈઝ પણ વધશે

Real Estate Jobs India: ભારતમાં છેલ્લા થોડા વર્ષોથી પ્રોપર્ટી માર્કેટ એટલે કે રિયલ એસ્ટેટ સેક્ટરમાં જબરદસ્ત મજબૂતી જોવા મળી રહી છે. મકાનો અને કોમર્શિયલ પ્રોજેક્ટ્સના વેચાણમાં વધારો થવાની સાથે હવે નોકરીના મોરચે પણ સારા સમાચાર આવ્યા છે. આગામી સમયમાં આ સેક્ટર ભારતના યુવાનો માટે રોજગારનું મોટું કેન્દ્ર બનવા જઈ રહ્યું છે. એક તાજા રિપોર્ટ મુજબ, આવનારા વર્ષોમાં રિયલ એસ્ટેટ સેક્ટરમાં નોકરીઓની ભરમાર જોવા મળશે.

2030 સુધીમાં 10 કરોડ નોકરીઓનું સર્જન

નેશનલ રિયલ એસ્ટેટ ડેવલપમેન્ટ કાઉન્સિલ (NAREDCO) અને KPMG દ્વારા બહાર પાડવામાં આવેલા એક સંયુક્ત રિપોર્ટમાં દાવો કરવામાં આવ્યો છે કે, 2030 સુધીમાં રિયલ એસ્ટેટ સેક્ટર આશરે 10 કરોડ લોકોને રોજગાર પૂરો પાડશે. હાલમાં આ ઉદ્યોગ લગભગ 7 કરોડ લોકોને રોજીરોટી આપી રહ્યો છે.

આ રોજગારી માત્ર મકાન બાંધકામ પૂરતી મર્યાદિત નથી. આમાં કન્સ્ટ્રક્શન, વેચાણ (Sales), ડિઝાઈનિંગ અને આર્કિટેક્ચર તેમજ તેની સાથે જોડાયેલા અન્ય ઉદ્યોગોમાં પણ મોટા પાયે ભરતીઓ થશે. આ રિપોર્ટનું વિમોચન આવાસ અને શહેરી બાબતોના મંત્રી મનોહર લાલ ખટ્ટર દ્વારા ‘NAREDCO કોન્ક્લેવ 2026’ દરમિયાન કરવામાં આવ્યું હતું.

આ રિપોર્ટમાં જણાવવામાં આવ્યું છે કે, જ્યારે પણ કોઈ નવો રિયલ એસ્ટેટ પ્રોજેક્ટ શરૂ થાય છે, ત્યારે માત્ર બિલ્ડરને જ ફાયદો નથી થતો, પરંતુ તેની સાથે જોડાયેલા અનેક ઉદ્યોગો ચાલે છે. જેમાં સિમેન્ટ, સ્ટીલ, ઈંટો, પેઈન્ટ (રંગ-રોગાન), કાચ, ફિટિંગ્સ અને લોજિસ્ટિક્સ જેવી સેવાઓની માંગ વધે છે. આ આખી ચેઈન અર્થવ્યવસ્થામાં આવકના નવા રસ્તાઓ ખોલે છે.

માર્કેટ સાઈઝ 88 ટ્રિલિયન રૂપિયા સુધી પહોંચશે

NAREDCO અને KPMGના રિપોર્ટના આંકડા ચોંકાવનારા અને ઉત્સાહજનક છે.

વર્તમાન સ્થિતિ: હાલમાં ભારતનું રિયલ એસ્ટેટ માર્કેટ લગભગ 26.4 ટ્રિલિયન રૂપિયાનું છે.

2030 નો અંદાજ: 2030 સુધીમાં આ માર્કેટ વધીને 88 ટ્રિલિયન રૂપિયા સુધી પહોંચવાની વકી છે.

2047 નું ભવિષ્ય: આઝાદીના 100 વર્ષ પૂરા થશે ત્યારે એટલે કે 2047 સુધીમાં આ સેક્ટરનું કદ 440.5 થી 616.7 ટ્રિલિયન રૂપિયા વચ્ચે હોઈ શકે છે.

આ ઉપરાંત, ભારતના જીડીપી (GDP) માં રિયલ એસ્ટેટનો હિસ્સો પણ વધશે. હાલમાં તે 7 થી 8 ટકા છે, જે 2047 સુધીમાં વધીને 12 થી 15 ટકા સુધી પહોંચવાની સંભાવના છે.

શહેરીકરણ વધશે, શહેરોમાં વસ્તી વધશે

આ અંગે વાત કરતા KPMG ઇન્ડિયાના પાર્ટનર અને હેડ (ઇન્ડિયા ગ્લોબલ) નીરજ બંસલે જણાવ્યું હતું કે, ભારત ઝડપથી શહેરીકરણ તરફ આગળ વધી રહ્યું છે. 2047 સુધીમાં શહેરીકરણમાં લગભગ 50 ટકાનો વધારો થવાની અને શહેરી વસ્તી 90 કરોડ સુધી પહોંચવાની આશા છે. આટલી મોટી વસ્તી માટે સ્માર્ટ ઈન્ફ્રાસ્ટ્રક્ચર અને સારા મકાનોની જરૂર પડશે, જે આખરે દેશના વિકાસ માટે મહત્વનું પરિબળ સાબિત થશે.

અંતમાં કહીએ તો, રિયલ એસ્ટેટ સેક્ટર માત્ર રોકાણકારો માટે જ નહીં, પરંતુ નોકરી શોધતા સામાન્ય માણસ અને દેશની અર્થવ્યવસ્થા માટે પણ ‘ગેમ ચેન્જર’ સાબિત થવા જઈ રહ્યું છે.

આ પણ વાંચો-પાન કાર્ડના નવા નિયમો: 1 એપ્રિલ 2026થી બેંક ડિપોઝિટ અને કાર ખરીદવાની લિમિટ બદલાશે, જાણો સામાન્ય માણસને શું ફાયદો થશે?