H-1B Visa News: ભારતીયોને અમેરિકન કોર્ટ તરફથી મોટી રાહત, H-1B વિઝા પર ટ્રમ્પની 1 લાખ ડોલરની ફી રદ

H-1B Visa News: અમેરિકા જવા માંગતા અને ત્યાં નોકરી કરતા ભારતીયો માટે એક ખૂબ જ રાહતના સમાચાર આવ્યા છે. અમેરિકાની એક અદાલતે નવા એચ-1બી વિઝા પર 1 લાખ ડોલર (લગભગ 83 લાખ રૂપિયા) ની ફી લગાવવાના રાષ્ટ્રપતિ ડોનાલ્ડ ટ્રમ્પના નિર્ણયને ગેરકાયદેસર ગણાવીને ફગાવી દીધો છે. આ ચુકાદાથી અમેરિકામાં વસતા અનેક ભારતીય સંગઠનોમાં ખુશીનો માહોલ છે અને તેઓએ આ નિર્ણયને વધાવી લીધો છે. કોર્ટે સ્પષ્ટ કહ્યું છે કે અમેરિકી સંસદ એટલે કે કોંગ્રેસની મંજૂરી વગર આવો કોઈ જ ટેક્સ લાગુ કરી શકાય નહીં.

જજે પોતાના ચુકાદામાં શું કહ્યું?

આ કેસમાં અમેરિકન ડિસ્ટ્રિક્ટ જજ લિયો ટી. સોરોકિને 42 પાનાનો વિસ્તૃત ચુકાદો આપ્યો છે. જજે નોંધ્યું છે કે આ મુદ્દો ઇમિગ્રેશન પોલિસીનો નથી, પરંતુ સત્તાના ઉપયોગનો છે. ટ્રમ્પ વહીવટીતંત્રએ એવી દલીલ કરી હતી કે વિદેશી નાગરિકોના અમેરિકામાં પ્રવેશ પર પ્રતિબંધ મૂકવાની રાષ્ટ્રપતિની સત્તાના ભાગરૂપે આ ફી લાગુ કરાઈ હતી.

જોકે, જજે આ દલીલને ફગાવી દીધી અને કહ્યું કે, "ટેક્સને કોઈ કાળે પ્રતિબંધ કહી શકાય નહીં." કાયદા મુજબ, દેશમાં નવો ટેક્સ લગાવવાની સત્તા માત્ર ને માત્ર કોંગ્રેસ પાસે જ છે. રાષ્ટ્રપતિ પાસે ઇમિગ્રેશન મામલે વિશાળ સત્તાઓ ચોક્કસ છે, પરંતુ તે સત્તાની પણ અમુક બંધારણીય મર્યાદાઓ છે. કોંગ્રેસની મંજૂરી વિના H-1B અરજીઓ પર 1 લાખ ડોલરનો ટેક્સ લગાવવો એ રાષ્ટ્રપતિની કાનૂની સત્તાની બહારનું પગલું હતું.

શું છે H-1B વિઝા અને કેમ છે તે મહત્વનો?

H-1B વિઝા એ અમેરિકાનો એક નોન-ઇમિગ્રન્ટ (અસ્થાયી) વર્ક વિઝા છે. આ વિઝા અમેરિકન કંપનીઓને ખાસ સ્કિલ ધરાવતા વિદેશી પ્રોફેશનલ્સને નોકરી પર રાખવાની મંજૂરી આપે છે. આઇટી, સોફ્ટવેર એન્જિનિયરિંગ, ડેટા સાયન્સ, ફાઇનાન્સ અને મેડિકલ જેવા ક્ષેત્રોમાં આ વિઝાનો સૌથી વધુ ઉપયોગ થાય છે.

સ્પોન્સરશિપ: આ વિઝા મેળવવા માટે અમેરિકન નોકરીદાતાનું સ્પોન્સર હોવું ખૂબ જરૂરી છે.

લાયકાત: જે નોકરી માટે વિઝા જોઈએ છીએ, તેમાં સામાન્ય રીતે ઓછામાં ઓછી બેચલર ડિગ્રી હોવી જરૂરી છે.

સમયગાળો: શરૂઆતમાં આ વિઝા 3 વર્ષ માટે મળે છે. ત્યારબાદ તેને લંબાવીને મહત્તમ 6 વર્ષ સુધી કરી શકાય છે. જો ગ્રીન કાર્ડની પ્રોસેસ ચાલુ હોય તો અમુક કિસ્સામાં તેને વધુ લંબાવી શકાય છે.

મર્યાદિત સંખ્યા: દર વર્ષે H-1B વિઝાની સંખ્યા નક્કી હોય છે. સામાન્ય રીતે 65,000 વિઝા અપાય છે અને જેમણે અમેરિકામાંથી માસ્ટર ડિગ્રી લીધી હોય તેમના માટે 20,000 વધારાના વિઝાની જોગવાઈ છે. આ કારણે જ મોટાભાગે લોટરી સિસ્ટમનો ઉપયોગ થાય છે.

ભારતીય આઇટી પ્રોફેશનલ્સ માટે આ વિઝા જીવાદોરી સમાન છે. જો કોઈ ભારતીય એન્જિનિયરને અમેરિકન ટેક કંપનીમાંથી જોબ ઓફર મળે, તો તે કંપની તેના માટે H-1B વિઝાની અરજી કરે છે. 1 લાખ ડોલરની આ જંગી ફી રદ થવાથી હવે ટેક કંપનીઓ માટે ભારતીય ટેલેન્ટને હાયર કરવાનું ફરી એકવાર સરળ બનશે, જેની સીધી હકારાત્મક અસર હજારો કુશળ ભારતીય યુવાનો પર પડશે.