ટાટા ગ્રૂપમાં વિવાદ ઉગ્ર બન્યો: નોએલ ટાટા અને એન. ચંદ્રશેખરનની ગૃહમંત્રી-નાણામંત્રી સાથે બેઠક

ભારતના સૌથી મોટા ઉદ્યોગ સમૂહોમાંથી એક, ટાટા ગ્રૂપમાં ચાલી રહેલો આંતરિક વિવાદ હવે વધુ ઉગ્ર બન્યો છે. ટાટા ટ્રસ્ટના ચેરમેન નોએલ ટાટા અને ટાટા સન્સના ચેરમેન એન. ચંદ્રશેખરન સહિત ગ્રૂપના ટોચના અધિકારીઓએ કેન્દ્રીય ગૃહમંત્રી અમિત શાહ અને નાણામંત્રી નિર્મલા સીતારમણ સાથે બેઠક યોજી હતી. આ બેઠક ટાટા ટ્રસ્ટના ટ્રસ્ટીઓ વચ્ચે બોર્ડ ઓફ ડિરેક્ટર્સની નિમણૂક અને કોર્પોરેટ કામગીરીને લગતા મુદ્દાઓ પર ચાલી રહેલા વિવાદને લઈને થઈ હતી.

વિવાદનું કેન્દ્રબિંદુ શું છે?

180 અબજ ડોલરથી વધુ મૂલ્ય ધરાવતા ટાટા ગ્રૂપના કામકાજ પર આ વિવાદની અસર પડવાનો ખતરો છે. ટાટા ટ્રસ્ટ, જે ગ્રૂપની હોલ્ડિંગ કંપની ટાટા સન્સમાં 66 ટકા હિસ્સો ધરાવે છે, તેમાં બે જૂથો વચ્ચે મતભેદ ઉભા થયા છે. એક જૂથ નોએલ ટાટાને સમર્થન આપે છે, જેઓ રતન ટાટાના નિધન બાદ ટ્રસ્ટના ચેરમેન બન્યા હતા. બીજું જૂથ શાપૂરજી પલોનજી પરિવાર સાથે સંકળાયેલા મેહલી મિસ્ત્રીના નેતૃત્વમાં છે. શાપૂરજી પલોનજી પરિવાર પાસે ટાટા સન્સમાં 18.37 ટકા હિસ્સો છે.

બેઠકની વિગતો

નોએલ ટાટા, એન. ચંદ્રશેખરન, ટાટા ટ્રસ્ટના વાઇસ પ્રેસિડેન્ટ વેણુ શ્રીનિવાસન અને ટ્રસ્ટી ડેરિયસ ખંબાટા અમિત શાહના નિવાસસ્થાને પહોંચ્યા હતા. નાણામંત્રી નિર્મલા સીતારમણ પણ આ બેઠકમાં હાજર રહ્યાં હતાં. સૂત્રોના જણાવ્યા પ્રમાણે, આ બેઠકમાં ટાટા સન્સના બોર્ડમાં નિમણૂકો અને ગ્રૂપના નિયંત્રણને લગતા મુદ્દાઓ પર ચર્ચા થઈ હતી.

શાપૂરજી પલોનજી પરિવારની નારાજગી

મેહલી મિસ્ત્રીનું માનવું છે કે તેમને મહત્ત્વના નિર્ણયોમાંથી બાકાત રાખવામાં આવ્યા છે. ટાટા સન્સના બોર્ડમાં પદોની નિમણૂકને લઈને તેમની નારાજગી વિવાદનું મુખ્ય કારણ છે. 156 વર્ષ જૂના ટાટા ગ્રૂપમાં 30 લિસ્ટેડ કંપનીઓ સહિત લગભગ 400 કંપનીઓનો સમાવેશ થાય છે, જે નમકથી લઈને સેમિકન્ડક્ટર સુધીની પ્રોડક્ટ્સ બનાવે છે.