Gujarat Weather Change: ગુજરાત પર 72 કલાકનું ‘આકાશી સંકટ’.. ત્રણ દિવસ સુધી કમોસમી વરસાદની શક્યતા

Gujarat Weather Change: ગુજરાતમાં માર્ચના અંતિમ દિવસો અને એપ્રિલની શરૂઆતમાં કમોસમી વરસાદનું સંકટ ઉભું થઈ શકે છે. હવામાન નિષ્ણાતો અને વાતાવરણની હાલની સ્થિતિને જોતાં એવી શક્યતાઓ વ્યક્ત કરવામાં આવી રહી છે કે રાજ્યના અનેક જિલ્લાઓમાં 29 માર્ચથી 1 એપ્રિલ સુધી ગાજવીજ સાથે માવઠું ત્રાટકી શકે છે. જોકે, હવામાન વિભાગે હજુ સુધી આ અંગે સત્તાવાર જાહેરાત કરી નથી.

બેવડી ઋતુનો અનુભવ

ગુજરાતમાં હાલ એક તરફ ગરમીનો પારો ઊંચે જઈ રહ્યો છે, તો બીજી તરફ કમોસમી વરસાદની આગાહીએ લોકોને ચિંતામાં મૂક્યા છે. માર્ચ મહિનામાં વેસ્ટર્ન ડિસ્ટર્બન્સની સતત સક્રિયતાને કારણે રાજ્યમાં બેવડી ઋતુનો અનુભવ થઈ રહ્યો છે. હવામાન વિભાગના જણાવ્યા મુજબ, 24 માર્ચે પશ્ચિમ હિમાલય પ્રદેશમાં એક વેસ્ટર્ન ડિસ્ટર્બન્સ પહોંચશે, જેની અસર 26 માર્ચથી ગુજરાતમાં જોવા મળી શકે છે. પશ્ચિમી ભેજવાળા પવનોને કારણે 29 માર્ચથી 1 એપ્રિલ સુધી વાતાવરણ વાદળછાયું બની શકે છે અને રાજ્યના અનેક વિસ્તારોમાં 10 મિમી સુધીનો કમોસમી વરસાદ પડવાની સંભાવના છે.

કયા વિસ્તારો પર અસર?

ખેડૂતો માટે ચિંતા

હવામાન નિષ્ણાત પરેશ ગોસ્વામીના જણાવ્યા મુજબ, માર્ચના અંતમાં હવામાનમાં પલટો આવવાની શક્યતા છે, જોકે હજુ સુધી આ માત્ર અનુમાન જ છે. હાલ દેશના અન્ય રાજ્યો જેમ કે પશ્ચિમ બંગાળ અને કર્ણાટકમાં કમોસમી વરસાદની આફત જોવા મળી રહી છે, જે ગુજરાત માટે પણ ચેતવણીરૂપ છે. હાલમાં માર્કેટ યાર્ડમાં મોટી સંખ્યામાં જણસી આવી રહી છે, અને જો વરસાદ પડશે તો તેનાથી ખેડૂતોની જણસીને નુકસાન થવાનું જોખમ રહેશે.

ખેડૂતોએ શું કરવું?

ખેડૂતોને સલાહ આપવામાં આવી રહી છે કે તેઓ 29 માર્ચથી 1 એપ્રિલ સુધી સાવચેત રહે અને પોતાના પાક તથા જણસીને સુરક્ષિત રાખવા માટે જરૂરી વ્યવસ્થા કરે. હવામાન વિભાગની સત્તાવાર આગાહીની રાહ જોવાઈ રહી છે, પરંતુ હાલની સ્થિતિને જોતાં રાજ્યમાં ત્રણ દિવસનું ‘આકાશી સંકટ’ ખેડૂતો અને સામાન્ય લોકો માટે પડકારરૂપ બની શકે છે.

આ પણ વાંચો- રાજકોટના પીપળિયામાં KBZ ફૂડ કંપનીમાં ભીષણ આગ, ફાયરબ્રિગેડે મેજર કોલ કર્યો જાહેર, 5 કિમી સુધી ધુમાડાના ગોટેગોટા