નવરાત્રીમાં ઈશા અંબાણીનો 'દેવી શક્તિ' લુક વાયરલ: 2000 કલાકની મહેનતથી તૈયાર થયો ખાસ લહેંગો, ગરબા માટે છે પરફેક્ટ

Isha Ambani Navratri look: અંબાણી પરિવાર કોઈપણ તહેવાર ખૂબ જ ધામધૂમથી મનાવવા માટે જાણીતો છે. ગણેશોત્સવ હોય કે નવરાત્રી, આખો પરિવાર હંમેશા પોતાના ટ્રેડિશનલ લુકથી લાઈમલાઈટમાં રહે છે. તાજેતરમાં નવરાત્રી અને 'સ્વદેશ' ના એક વર્ષ પૂર્ણ થવાના ખાસ અવસરે ઈશા અંબાણીનો એથનિક 'દેવી શક્તિ' લુક લોકોના આકર્ષણનું કેન્દ્ર બન્યો છે. આ મલ્ટીકલર લહેંગામાં ઈશા કોઈ સાક્ષાત દેવીથી કમ નથી લાગી રહી.

10 કારીગરો અને 2000 કલાકની બારીક મહેનત

ઈશા અંબાણીનો આ સુંદર લહેંગો જાણીતા ફેશન ડિઝાઇનર કરન તોરાનીએ 'સ્વદેશ' સાથે મળીને ખાસ નવરાત્રી માટે ડિઝાઇન કર્યો છે. આ કોઈ સામાન્ય આઉટફિટ નથી. આ લહેંગાને તૈયાર કરવા માટે 10 કારીગરોએ ભેગા મળીને કામ કર્યું છે. લહેંગા પર કરવામાં આવેલી ખાસ પેઇન્ટિંગને પૂરી કરવામાં 90 દિવસથી વધુનો સમય લાગ્યો છે. એકંદરે, આ માસ્ટરપીસ ડ્રેસને તૈયાર કરવામાં 2000 કલાકથી વધુની ઝીણવટભરી કારીગરી કરવામાં આવી છે.

રાધા-કૃષ્ણની રાસલીલા અને કલાનો અદભુત સંગમ

આ ડ્રેસની ડિઝાઇન વિશે વાત કરીએ તો તેમાં કલમકારી અને ઓડિશાની પ્રખ્યાત 'પટ્ટચિત્ર' કલાનું સુંદર મિશ્રણ જોવા મળે છે.પ્યોર સિલ્ક કાપડ પર લહેંગાની દરેક કળી, ચોલી અને દુપટ્ટા પર રાધા-કૃષ્ણની રાસલીલા ખૂબ જ આકર્ષક રીતે દોરવામાં આવી છે. પેઇન્ટિંગની વાર્તાઓને વધુ જીવંત બનાવવા માટે તેની આસપાસ જરદોઝી, ફ્રેન્ચ નોટ્સ, મોતીનું કામ, મિરર વર્ક અને લટકણથી શાનદાર સજાવટ કરવામાં આવી છે.ડિઝાઇનરે આ ડ્રેસમાં ગરબાની લય, લોકોનો ડાન્સ પ્રત્યેનો ઉત્સાહ અને દેવી શક્તિની કોમળતા તેમજ સાહસને દર્શાવવાનો શ્રેષ્ઠ પ્રયાસ કર્યો છે.

કરન તોરાની સાથે જોડાયેલી છે ખાસ સ્ટોરી

આ લહેંગાની ડિઝાઇન પાછળ ડિઝાઇનર કરન તોરાનીની પોતાની એક ભાવનાત્મક વાર્તા પણ જોડાયેલી છે. જ્યારે કરન માત્ર 25 વર્ષના હતા અને એક નાના ગેરેજમાંથી 'તોરાની' બ્રાન્ડ ઊભી કરવા સંઘર્ષ કરી રહ્યા હતા, ત્યારે ઈશા અંબાણીની નજર પહેલીવાર તેમના એક પ્રિન્ટેડ કુર્તા પર પડી હતી. ઈશાએ ત્યારથી જે પ્રેમ અને સપોર્ટ આપ્યો છે, તે જ પ્રેમને પરત વાળવા કરને આ લહેંગામાં પોતાનો જીવ રેડી દીધો છે.