આધારની નવી એપ લોન્ચ, મળશે ઘણાં શાનદાર ફીચર્સ.. વેરિફિકેશન થશે UPI પેમેન્ટ જેટલું સરળ

સરકારે આધાર એપનું બીટા વર્ઝન રજૂ કર્યું છે, જે વધુ મજબૂત સિક્રસી અને આધાર સંબંધિત સેવાઓ સુધી સરળ પહોંચનું વચન આપે છે. કેન્દ્રીય મંત્રી અશ્વિની વૈષ્ણવે સોશિયલ મીડિયા પ્લેટફોર્મ X પર આ નવા એપ વિશે માહિતી આપતાં જણાવ્યું, “હવે આધાર વેરિફિકેશન એટલું જ સરળ છે, જેટલું UPI પેમેન્ટ કરવું.”

નવા આધાર એપમાં શું છે ખાસ?

આ એપ UIDAIની મદદથી ડેવલપ કરવામાં આવી છે. તેમાં ફેસ આઈડી અને આર્ટિફિશિયલ ઈન્ટેલિજન્સ (AI)નો ઉપયોગ કરવામાં આવ્યો છે, જે રિયલ-ટાઈમ ઓથેન્ટિકેશનને શક્ય બનાવે છે. આ ઉપરાંત, QR કોડ સ્કેનિંગ દ્વારા ઝડપી વેરિફિકેશનની સુવિધા પણ આપવામાં આવી છે. આનો અર્થ એ થયો કે હવે મુસાફરી, હોટેલ ચેક-ઈન કે શોપિંગ દરમિયાન આધારની ફોટોસ્ટેટ કોપી સાથે રાખવાની જરૂર નહીં પડે. ફક્ત QR કોડ સ્કેન કરો અને ઓળખની ચકાસણી થઈ જશે.

મુખ્ય ફીચર્સ

- QR કોડ સ્કેન દ્વારા ઝડપી આધાર વેરિફિકેશન

- ફિઝિકલ કાર્ડ કે કોપીની જરૂર નહીં

- સંપૂર્ણપણે ડિજિટલ, સુરક્ષિત અને યૂઝરની પરમિશન પર આધારિત

- ડેટા મિસયૂઝ, નકલી કામ અને લીકથી સુરક્ષા

બધા યૂઝર્સ માટે ક્યારે થશે રિલીઝ?

હાલમાં આ એપ ટેસ્ટિંગ મોડમાં છે અને તેને Google Play Store પર સામાન્ય લોકો માટે રિલીઝ કરવામાં આવ્યું નથી. સરકાર બીટા ટેસ્ટિંગ પૂર્ણ થયા બાદ તેને તમામ યૂઝર્સ માટે ઉપલબ્ધ કરશે. આ પગલાથી આધારના ઉપયોગને સરળ બનાવવા અને ડેટા સુરક્ષાને મજબૂત કરવાની અપેક્ષા છે.

આ બાબતોનું રાખો ધ્યાન

જો કોઈ કોલ કે લિંક દ્વારા આધારનું નવી એપ ડાઉનલોડ કરવાનું કહે, તો સાવધાન રહો. આ એપ હંમેશા UIDAIના સત્તાવાર સોર્સથી જ ડાઉનલોડ કરવી.

ફેસ રિકગ્નિશનની પોતાની લિમિટેશન છે. ઓછા પ્રકાશ કે વૃદ્ધ લોકો માટે ફેસ સ્કેનમાં થોડી મુશ્કેલી આવી શકે છે.

આ પણ વાંચો- 156 હેલિકોપ્ટર, 25,000 કરોડની ડિફેન્સ ડીલ પાક્કી... આકાશમાં વધુ પાવરફૂલ બનશે ભારત, ચીન અને પાકિસ્તાનના છૂટશે પરસેવા!