રાવલપિંડી સુધી અનુભવાયો ભારતીય સેનાનો ખતરો...ઓપરેશન સિંદૂર પર સંરક્ષણ મંત્રી રાજનાથ સિંહનું મોટું નિવેદન

ભારતીય સેના દ્વારા ઓપરેશન સિંદૂર અને પાકિસ્તાન સાથે યુદ્ધવિરામ બાદ સંરક્ષણ મંત્રી રાજનાથ સિંહે મોટું નિવેદન આપ્યું છે. રક્ષા મંત્રી રાજનાથ સિંહે રવિવારે લખનૌમાં બ્રહ્મોસ સુપરસોનિક ક્રુઝ મિસાઇલ ઉત્પાદન એકમનું વિડીયો કોન્ફરન્સિંગ દ્વારા ઉદ્ઘાટન કર્યું. આ દરમિયાન તેમણે કહ્યું કે, બ્રહ્મોસ માત્ર એક મિસાઇલ નથી, પરંતુ તે ભારતની લશ્કરી ક્ષમતા, આત્મનિર્ભરતાનું પ્રતીક છે અને આપણા વિરોધીઓને સ્પષ્ટ સંદેશ આપે છે કે આપણે દરેક મોરચે તૈયાર છીએ.

રાજનાથ સિંહે કહ્યું કે , અમે માત્ર સરહદ નજીક આવેલા લશ્કરી ઠેકાણાઓ પર કાર્યવાહી કરી નથી, પરંતુ ભારતીય સેનાનો ખતરો રાવલપિંડી સુધી અનુભવાયો હતો જ્યાં પાકિસ્તાની સેનાનું મુખ્ય મથક આવેલું છે.

#WATCH | Delhi: Defence Minister Rajnath Singh inaugurates BrahMos Aerospace Integration and Testing Facility in Lucknow, Uttar Pradesh via video conferencing. pic.twitter.com/cmtIHrJte5

— ANI (@ANI) May 11, 2025

રાજનાથ સિંહે કહ્યું, "ભારત વિરોધી અને આતંકવાદી સંગઠનોએ ભારત માતાના કપાળ પર હુમલો કર્યો અને ઘણા પરિવારોના સિંદૂર લૂછી નાખ્યા. ભારતીય સેનાએ 'ઓપરેશન સિંદૂર' દ્વારા તેમને ન્યાયના કઠેડામાં પહોંચાડ્યા છે. આ માટે, આજે આખો દેશ આપણા સશસ્ત્ર દળોને સલામ કરી રહ્યો છે." તેમણે વધુમાં કહ્યું કે "ઓપરેશન સિંદૂર માત્ર લશ્કરી કાર્યવાહી નથી, પરંતુ તે ભારતના રાજકીય, સામાજિક અને વ્યૂહાત્મક સંકલ્પનું પ્રતીક છે. તે આતંકવાદ સામે ભારતના દ્રઢ સંકલ્પ તેમજ આપણી લશ્કરી શક્તિની ક્ષમતા અને નિશ્ચયને પ્રતિબિંબિત કરે છે. અમે સ્પષ્ટ કર્યું છે કે જ્યારે પણ ભારત પર હુમલો કરવામાં આવશે અથવા આતંકવાદને પ્રોત્સાહન આપવામાં આવશે, ત્યારે ન તો આતંકવાદીઓને બક્ષવામાં આવશે અને ન તો તેમના આશ્રયદાતાઓ સરહદ પાર સુરક્ષિત રહી શકશે."

પાકિસ્તાની આતંકવાદી માળખાને નિશાન બનાવવામાં આવ્યું

સંરક્ષણ મંત્રી રાજનાથ સિંહે કહ્યું કે 'ઓપરેશન સિંદૂર'નો મુખ્ય ઉદ્દેશ્ય પાકિસ્તાનમાં આતંકવાદી માળખાને સંપૂર્ણપણે નષ્ટ કરવાનો હતો. તેમણે ભારપૂર્વક જણાવ્યું હતું કે ભારતે કાર્યવાહી દરમિયાન અત્યંત સાવધાની રાખી હતી અને પાકિસ્તાની નાગરિકોને ઇરાદાપૂર્વક નિશાન બનાવવાનું ટાળ્યું હતું. તેમણે આની સરખામણી પાકિસ્તાન દ્વારા ભારતીય નાગરિક વિસ્તારો અને ધાર્મિક સ્થળો પર કરવામાં આવેલા કથિત હુમલાઓ સાથે કરી.

રાજનાથ સિંહે ભારતીય સેનાની "બહાદુરી અને સંયમ" ની પ્રશંસા કરી અને કહ્યું કે આપણા દળોએ પાકિસ્તાનના અનેક મુખ્ય લશ્કરી સ્થાપનોને નિશાન બનાવીને સચોટ અને અસરકારક જવાબ આપ્યો છે. આમાં પાકિસ્તાનની રાજધાની ઇસ્લામાબાદ નજીક સ્થિત આર્મી હેડક્વાર્ટર, રાવલપિંડી જેવા મહત્વપૂર્ણ સ્થળોનો પણ સમાવેશ થાય છે.

આતંકવાદ સામે શૂન્ય સહિષ્ણુતા

સંરક્ષણ મંત્રી રાજનાથ સિંહે કહ્યું છે કે ભારત આતંકવાદ સામે શૂન્ય સહિષ્ણુતાની નીતિનું પાલન કરે છે. તેમણે ઉરી હુમલા પછી કરવામાં આવેલા સર્જિકલ સ્ટ્રાઈક, પુલવામા હુમલાના જવાબમાં બાલાકોટ એર સ્ટ્રાઈક અને હવે પાકિસ્તાનની અંદર કરવામાં આવેલા બદલા હુમલાનો ઉલ્લેખ કરીને ભારતીય પ્રતિક્રિયાની સાતત્ય પર પ્રકાશ પાડ્યો.

આ પણ વાંચો-ઓપરેશન સિંદૂર પર સર્વપક્ષીય બેઠક બોલાવવાની માંગ, રાહુલ ગાંધી અને ખડગેએ PM મોદીને લખ્યો પત્ર