દિલ્હી સહિત અન્ય રાજ્યોમાં ચોમાસાની રાહ લંબાશે, IMDનું નવું અનુમાન, જાણી લો હવે ક્યારે પડશે વરસાદ?

દિલ્હી અને ઉત્તર-પશ્ચિમ ભારતના લોકો જે ચોમાસાની આતુરતાથી રાહ જોઈ રહ્યા હતા, તેમને હજુ થોડો સમય વધુ રાહ જોવી પડશે. ભારતીય હવામાન વિભાગના લેટેસ્ટ અપડેટ અનુસાર, આ વર્ષે દિલ્હીમાં ચોમાસાનું આગમન તેની સામાન્ય તારીખ કરતા મોડું થશે. હવે એવી સંભાવના છે કે દિલ્હીમાં મેઘરાજાની એન્ટ્રી 30 જૂન પછી, એટલે કે જુલાઈના પહેલા સપ્તાહમાં થશે.

શા માટે ચોમાસું મોડું થઈ રહ્યું છે?

સામાન્ય રીતે દિલ્હીમાં 30 જૂનની આસપાસ ચોમાસું દસ્તક આપી દેતું હોય છે, પરંતુ આ વર્ષે ચોમાસાની ગતિ થોડી ધીમી જણાય છે. જોકે, હવામાન વિભાગના મતે જુલાઈના પહેલા અઠવાડિયા (2 થી 8 જુલાઈ) દરમિયાન ઉત્તર-પશ્ચિમ ભારતમાં દક્ષિણ-પશ્ચિમ ચોમાસાને આગળ વધવા માટેની તમામ અનુકૂળ પરિસ્થિતિઓ સર્જાઈ રહી છે.

જુલાઈના પહેલા સપ્તાહમાં કેમ મજબૂત થશે ચોમાસું?

સોમાલી જેટ: અરબી સમુદ્રમાં ભેજયુક્ત પવનોને વધુ મજબૂત બનાવશે.

બંગાળની ખાડીમાં હલચલ: ઉત્તર બંગાળની ખાડીમાં બનનારું ચક્રવાતી પરિભ્રમણ વરસાદ માટે પૂરક સાબિત થશે.

અન્ય પરિબળો: મેડેન-જુલિયન ઓસિલેશન (MJO) ની સક્રિયતા અને પશ્ચિમી પવનોની અસરને કારણે દેશના મોટા ભાગમાં વરસાદી માહોલ જામશે.

કયા વિસ્તારોમાં પડશે વરસાદ?

IMD ના અનુમાન મુજબ, 2 જુલાઈથી 8 જુલાઈ વચ્ચે દિલ્હી અને ઉત્તર-પશ્ચિમ ભારતના મેદાની વિસ્તારોમાં હળવાથી મધ્યમ વરસાદની શક્યતા છે. બીજી તરફ, હિમાચલ પ્રદેશ અને ઉત્તરાખંડ જેવા પહાડી રાજ્યોમાં પશ્ચિમી વિક્ષેપની અસરને કારણે અમુક સ્થળોએ ભારે વરસાદ પડી શકે છે.

દેશના અન્ય રાજ્યોની સ્થિતિ

હાલમાં ચોમાસાની ઉત્તરીય સીમા સુરત, ઈન્દોર, મંડલા, ડાલ્ટનગંજ અને મોતિહારી સુધી પહોંચી ગઈ છે. આવનારા દિવસોમાં આ સીમા આગળ વધીને મધ્ય પ્રદેશ, ઉત્તર પ્રદેશ, હરિયાણા, પંજાબ, ચંદીગઢ અને રાજસ્થાનના બાકીના વિસ્તારોને પણ આવરી લેશે.

આ પણ વાંચો-રામ મંદિર ચંદા ચોરી કાંડ: આસ્થા સાથે રમત કરનારને નહીં છોડું, યોગી આદિત્યનાથની આકરા પાણીએ ચેતવણી