ટ્રમ્પનો ખતરનાક પ્લાન: શું ઈરાન પર પડશે દુનિયાનો સૌથી ઘાતક 'મધર ઓફ ઓલ બોમ્બ્સ'? મચાવશે ભયંકર તબાહી

Trump Mother of All Bombs: અમેરિકા અને ઈરાન વચ્ચેનો તણાવ હવે એક અત્યંત ખતરનાક વળાંક પર પહોંચી ગયો છે. રિપોર્ટ્સનું માનીએ તો, અમેરિકન સેનાએ ઈરાનના ઉર્જા અને જમીનની અંદર આવેલા પરમાણુ મથકો પર પોતાનો સૌથી શક્તિશાળી બોમ્બ ફેંકવાનો નવો 'સ્ટ્રાઈક પ્લાન' તૈયાર કરી લીધો છે. હવે સેના માત્ર રાષ્ટ્રપતિ ડોનાલ્ડ ટ્રમ્પના આદેશની રાહ જોઈ રહી છે.

CNNના એક રિપોર્ટ મુજબ, અમેરિકન અધિકારીઓએ ખુલાસો કર્યો છે કે આ સૈન્ય કાર્યવાહીમાં GBU-43/B (જેને સામાન્ય ભાષામાં 'મધર ઓફ ઓલ બોમ્બ્સ' કહેવાય છે) નો ઉપયોગ કરવા પર ગંભીરતાથી વિચારણા ચાલી રહી છે. આ પ્લાનમાં ઈરાનના પિકેક્સ માઉન્ટેન ખાતે આવેલા અંડરગ્રાઉન્ડ ન્યુક્લિયર ફેસિલિટીને નિશાન બનાવવાની તૈયારી છે.

શું છે ટ્રમ્પનો નવો સ્ટ્રાઈક પ્લાન?

ટ્રમ્પના આદેશ પર અમેરિકન સેનાએ અનેક 'સ્ટ્રાઈક પેકેજ' તૈયાર કર્યા છે. આ હુમલો આગામી ચૂંટણીઓ પહેલા કે પછી ગમે ત્યારે થઈ શકે છે. રિપોર્ટ મુજબ, ટ્રમ્પે સેનાને ઈરાનના મોટા ઉર્જા મથકો અને અત્યંત સુરક્ષિત ગણાતા પરમાણુ મથકોને ઉડાવી દેવા માટેના વિકલ્પો તૈયાર કરવા કહ્યું છે.

શું છે આ 'મધર ઓફ ઓલ બોમ્બ્સ' (MOAB)?

GBU-43/B (MOAB) એ અમેરિકન સેના પાસે રહેલો સૌથી મોટો અને વિનાશક બિન-પરમાણુ (નોન-ન્યુક્લિયર) બોમ્બ છે.

વજન અને ટેકનોલોજી: આશરે 9800 કિલોગ્રામ વજન ધરાવતો આ બોમ્બ જીપીએસ (GPS) દ્વારા ગાઈડ થાય છે.

વિનાશક તાકાત: તે સામાન્ય બોમ્બની જેમ જમીનમાં ઘૂસીને નથી ફાટતો, પરંતુ જમીનની સપાટીની બરાબર ઉપર હવામાં જ બ્લાસ્ટ થાય છે. તેનાથી જબરદસ્ત પ્રેશર વેવ પેદા થાય છે જે આશરે 9 સિટી બ્લોક જેટલા મોટા વિસ્તારને એક જ ઝટકામાં સાફ કરી નાખે છે.

ઈતિહાસ: 2000 ના દાયકાની શરૂઆતમાં દુશ્મનોમાં ભયનો માહોલ ઉભો કરવા અને મોટા સૈન્ય મથકોને નષ્ટ કરવા માટે આ હથિયાર બનાવવામાં આવ્યું હતું.

શું આ બોમ્બ ઈરાનના અંડરગ્રાઉન્ડ મથકોને નષ્ટ કરી શકશે?

આ બોમ્બ ભલે ગમે તેટલો શક્તિશાળી હોય, પરંતુ અમેરિકન સંરક્ષણ નિષ્ણાતોને શંકા છે કે તે ઈરાનની મજબૂત ગ્રેનાઈટ ખડકોની નીચે છુપાયેલા પરમાણુ મથકોને ભેદી શકશે કે નહીં. પિકેક્સ માઉન્ટેનની અંદર પરમાણુ સુવિધાઓ ગ્રેનાઈટના ઘણા પડની નીચે સુરક્ષિત છે. આ બોમ્બ જમીનમાં ઊંડે સુધી કાણું પાડવા માટે નથી બન્યો. નિષ્ણાતોના મતે, આ એક 'મનોવૈજ્ઞાનિક હથિયાર' વધુ છે જે ઈરાન પર દબાણ લાવવાનું કામ કરશે. વળી, જો ઉર્જા મથકો પર આ બોમ્બ પડે, તો આસપાસના નાગરિકોનો પણ મોટા પાયે ભોગ લેવાઈ શકે છે.

યુદ્ધ ખતમ કરવાનું દબાણ અને 'આતશબાજીનો શો'

અમેરિકા પર છેલ્લા 6 મહિનાથી ચાલી રહેલા આ સંઘર્ષને ખતમ કરવાનું મોટું દબાણ છે. અમેરિકન અધિકારીઓ એવો રસ્તો શોધી રહ્યા છે જેનાથી દુનિયાને અમેરિકાની તાકાત પણ દેખાય અને યુદ્ધમાંથી બહાર પણ નીકળી શકાય. કેટલાક લોકો આ પ્લાનને માત્ર 'આતશબાજીનો શો' ગણાવી રહ્યા છે, જેથી ટ્રમ્પ પોતાની જીતનો દાવો કરી શકે. સામે પક્ષે, અમેરિકન સેના ઈરાનના વળતા પ્રહાર માટે પણ તૈયારી કરી રહી છે.

નોંધનીય છે કે, એપ્રિલ 2017 માં ટ્રમ્પના પહેલા કાર્યકાળ દરમિયાન અફઘાનિસ્તાનમાં ISISની ગુફાઓને નષ્ટ કરવા માટે પહેલીવાર આ 'મધર ઓફ ઓલ બોમ્બ્સ' નો ઉપયોગ થયો હતો, જેમાં 36 આતંકવાદીઓ માર્યા ગયા હતા.

આ પણ વાંચો-ગુજરાત ST કર્મચારીઓને દિવાળીની ભેટ: સરકારે DAમાં કર્યો 2 ટકાનો વધારો, પગારમાં થશે મોટો ફાયદો