Chandrayaan-4: ચંદ્ર પરથી માટી લાવવાની તૈયારી, 350 કિલોનું ઉતરશે રોવર, જાણો ISROનું આગામી મિશન

Chandrayaan-4: ચંદ્રયાન-3ની સફળતા બાદ ભારતીય અવકાશ સંશોધન સંસ્થા (ઇસરો) હવે તેના આગામી પ્રોજેક્ટ ચંદ્રયાન-4 પર ધ્યાન કેન્દ્રિત કરી રહી છે. તેના આગામી પ્રોજેક્ટ વિશે માહિતી આપતા, ISRO કેન્દ્રના ડિરેક્ટર નિલેશ દેસાઈએ જણાવ્યું હતું કે ચંદ્ર પર ચંદ્રયાન-3 લેન્ડરના સફળ સોફ્ટ-લેન્ડિંગ પછી, હવે અન્ય બે ચંદ્ર મિશન લુપેક્સ અને ચંદ્રયાન-4 પર કામ કરવામાં આવી રહ્યું છે. આ મિશનનો ધ્યેય ચંદ્ર પરથી માટીના નમૂનાઓ પરત લાવવાનો છે. આ વખતે 10 ગણું ભારે રોવર લોન્ચ કરવામાં આવશે. દેસાઈએ કહ્યું કે આ મિશનનું લેન્ડિંગ ચંદ્રયાન-3 જેવું જ હશે.

હવે ISRO ચંદ્ર પરથી માટી લાવવાની તૈયારી કરી રહ્યું છે

પૂણેમાં ભારતીય ઉષ્ણકટિબંધીય હવામાનશાસ્ત્ર સંસ્થાના 62મા સ્થાપના દિવસની ઉજવણી દરમિયાન, સ્પેસ એપ્લિકેશન સેન્ટરના ડિરેક્ટર નિલેશ દેસાઈએ ચંદ્રયાન-4 મિશન વિશે માહિતી આપી હતી. તેમણે કહ્યું કે આ મિશન દ્વારા ચંદ્રની સપાટી પરથી માટીનો નમૂનો પાછો લવાશે. આ વખતે આપણે ચંદ્રના ધ્રુવીય સંશોધન મિશન પર કામ કરવા જઈ રહ્યા છીએ.

ચંદ્રની અંધારી બાજુએ 350 કિલો વજનનું લેન્ડર લેન્ડ કરશે