આસામમાં બીફ ખાવા અને પીરસવા પર પ્રતિબંધ, કડક પગલાં લેવાશે, સીએમ હિમંતા બિસ્વા સરમાનો આદેશ

આસામના મુખ્યમંત્રી હિમંતા વિશ્વ સરમાએ એક મોટી જાહેરાત કરતા કહ્યું કે રાજ્યભરમાં હોટલ, રેસ્ટોરન્ટ અને જાહેર સ્થળોએ ન તો બીફ ખાવામાં આવશે અને ન તો પીરસવામાં આવશે. તેમણે ભારપૂર્વક જણાવ્યું છે કે આવું કરનારાઓ સામે કડક કાર્યવાહી કરવામાં આવશે. બિસ્વાના આદેશ પર આસામના મંત્રી પીયૂષ હજારિકાએ આસામ કોંગ્રેસને આ નિર્ણયને આવકારવાની સલાહ આપી છે. તેમણે કહ્યું કે બીફ ન ખાઓ અથવા પાકિસ્તાન ચાલ્યા જાવ.

રાજ્યની કેબિનેટની બેઠકમાં, ગૌમાંસના વપરાશ અંગેના વર્તમાન કાયદામાં સુધારો કરીને નવી જોગવાઈઓનો સમાવેશ કરવાનો નિર્ણય લેવામાં આવ્યો હતો. સરમાએ અહીં એક પ્રેસ કોન્ફરન્સમાં જણાવ્યું હતું કે, અમે રેસ્ટોરાં, હોટલ અને જાહેર સ્થળોએ બીફ પીરસવા અને ખાવા પર પ્રતિબંધ મૂકવાનો નિર્ણય કર્યો છે.

સરમાએ વધુમાં કહ્યું કે અમારી સરકારે ત્રણ વર્ષ પહેલા ગૌહત્યા પર પ્રતિબંધ મુકવાનો કાયદો પસાર કર્યો હતો. હવે અમે સમગ્ર રાજ્યમાં બીફ ખાવા પર પ્રતિબંધ લાગુ કર્યો છે. આ આદેશ તમામ હોટલ, રેસ્ટોરન્ટ અને જાહેર કાર્યક્રમોમાં લાગુ થશે.

તેમણે કહ્યું કે અગાઉ અમે મંદિરના પાંચ કિલોમીટરની અંદર ગૌમાંસ ખાવા અથવા પીરસવા પર પ્રતિબંધ મૂક્યો હતો, પરંતુ હવે નવા આદેશમાં અમે આખા રાજ્યમાં આ આદેશ જારી કરી રહ્યા છીએ.

હિમંતા બિસ્વાના આદેશ પર આસામના મંત્રી પીયૂષ હજારિકાએ ટ્વિટ કરીને આસામ કોંગ્રેસને બીફ પર પ્રતિબંધનું સ્વાગત કરવાની સલાહ આપી છે. તેમણે સોશિયલ મીડિયા પર લખ્યું, "હું આસામ કોંગ્રેસને ચેલેન્જ ફેંકું છું કે કાં તો બીફ પરના પ્રતિબંધનું સ્વાગત કરે અથવા પાકિસ્તાનમાં જઈને સ્થાયી થાય.’

આ પણ વાંચો- મહારાષ્ટ્રના સીએમ બનવા જઈ રહેલા ફડણવીસ પાસે કેટલી છે નેટવર્થ? પત્નીએ શેરમાં કર્યું છે ભારે રોકાણ