Closing Bell: શેરબજારમાં રોકાણકારોને મોટી રાહત, સેન્સેક્સ 480 પોઈન્ટ ઉછળ્યો, નિફ્ટી 25700ને પાર

Closing Bell: સપ્તાહના પ્રથમ ટ્રેડિંગ સેશન એટલે કે સોમવારે (23 ફેબ્રુઆરી) ભારતીય શેરબજારમાં રોકાણકારો માટે સારા સમાચાર આવ્યા છે. વૈશ્વિક બજારોમાંથી મળેલા સકારાત્મક સંકેતોને કારણે ભારતીય બજાર મજબૂતી સાથે બંધ થયું છે. અમેરિકાની સુપ્રીમ કોર્ટે રાષ્ટ્રપતિ ડોનાલ્ડ ટ્રમ્પના કેટલાક ટેરિફ નિયમોને ફગાવી દીધા છે, જેની સીધી અસર બજારના સેન્ટિમેન્ટ પર પડી છે.

સેન્સેક્સ અને નિફ્ટીની સ્થિતિ

બોમ્બે સ્ટોક એક્સચેન્જનો સેન્સેક્સ સોમવારે 100 થી વધુ પોઈન્ટના વધારા સાથે 82,906 પર ખુલ્યો હતો. ખુલતાની સાથે જ બજારમાં જોરદાર ખરીદી જોવા મળી અને સેન્સેક્સ 83,000 ની સપાટી વટાવી ગયો હતો. ટ્રેડિંગ દરમિયાન એક સમયે સેન્સેક્સ 650 પોઈન્ટ સુધી ઉછળ્યો હતો. જોકે, દિવસના અંતે તે 479.95 પોઈન્ટ (0.58%) ના વધારા સાથે 83,294.66 પર બંધ થયો હતો.

બીજી તરફ, નેશનલ સ્ટોક એક્સચેન્જનો નિફ્ટી-50 પણ મજબૂત શરૂઆત કરતા 25,678 પર ખુલ્યો અને થોડી જ વારમાં 25,700 ની સપાટી ક્રોસ કરી ગયો. કારોબારના અંતે નિફ્ટી 141.75 પોઈન્ટ (0.55%) વધીને 25,713 પર બંધ થયો હતો.

અમેરિકી સુપ્રીમ કોર્ટે 1977 ના ઈન્ટરનેશનલ ઈમરજન્સી ઈકોનોમિક પાવર્સ એક્ટ (IEEPA) હેઠળ ટ્રમ્પ દ્વારા લાદવામાં આવેલા કેટલાક વેપાર નિયમો અને ટેરિફને રદ કર્યા છે. કોર્ટના આ નિર્ણયથી વૈશ્વિક બજારોમાં રાહતનો શ્વાસ જોવા મળ્યો અને રોકાણકારોનો ભરોસો વધ્યો. જેના પરિણામે ભારતીય બજારમાં પણ ખરીદી નીકળી હતી. ખાસ કરીને બેંકિંગ અને ફાઇનાન્શિયલ સર્વિસીસ સેક્ટરના શેરોમાં થયેલા વધારાએ બજારને મોટો ટેકો આપ્યો હતો. જોકે, IT શેરોમાં થોડું દબાણ જોવા મળ્યું હતું, જેના કારણે બજારનો ઉછાળો થોડો સીમિત રહ્યો હતો.

વૈશ્વિક બજારોના હાલચાલ

સોમવારે એશિયન બજારોમાં પણ તેજી જોવા મળી હતી. દક્ષિણ કોરિયાનો કોસ્પી ઈન્ડેક્સ સતત ત્રીજા સત્રમાં વધીને 1.7% ની તેજી સાથે રેકોર્ડ હાઈ પર પહોંચ્યો હતો. ઓસ્ટ્રેલિયાનું માર્કેટ પણ સામાન્ય વધારા સાથે ખુલ્યું હતું, જ્યારે ચીન અને જાપાનના બજારો રજા હોવાથી બંધ હતા.

આ પહેલા શુક્રવારે અમેરિકન માર્કેટમાં પણ તેજી હતી. વોલ સ્ટ્રીટ પર S&P 500, નાસ્ડેક અને ડાઉ જોન્સ ઈન્ડસ્ટ્રીયલ એવરેજમાં વધારો નોંધાયો હતો. ગૂગલની પેરેન્ટ કંપની આલ્ફાબેટ અને એમેઝોન જેવી દિગ્ગજ કંપનીઓના શેરોમાં ઉછાળો આવતા રોકાણકારોનો ઉત્સાહ વધ્યો હતો.

આ પણ વાંચો-મોંઘવારી માપવાની રીત બદલાઈ: હવે Ola-Uber અને Netflix ના ભાવ પણ નક્કી કરશે મોંઘવારી, VCR-DVD આઉટ!