Brazil Flood: બ્રાઝિલમાં ચક્રવાતે મચાવી તબાહી, 21 લોકોના મોત, અનેક શહેરોમાં પૂર

Brazil Flood: બ્રાઝિલના દક્ષિણી રાજ્ય રિયો ગ્રાન્ડે દો સુલમાં ચક્રવાત સતત તબાહી મચાવી રહ્યું છે. ભારે વરસાદ અને જોરદાર પવન ફૂંકાઈ રહ્યો છે. દક્ષિણ બ્રાઝિલમાં આ કુદરતી આફતના કારણે ઓછામાં ઓછા 21 લોકોના મોત થયા છે. સતત મુશળધાર વરસાદને કારણે પૂરનું જોખમ વધુ વધી ગયું છે. આવી સ્થિતિમાં અધિકારીઓને રાહત અને બચાવ કાર્યમાં ઘણી મુશ્કેલીઓનો સામનો કરવો પડી રહ્યો છે. શહેરના અનેક ઘરોમાં પાણી ભરાઈ ગયા છે. નદીઓ ગાજી રહી છે. બ્રાઝિલના ગવર્નર રિયો ગ્રાન્ડે દો સુલે તેને તેમના રાજ્યની સૌથી ખતરનાક હવામાન આપત્તિ ગણાવી છે.

અધિકારીઓના જણાવ્યા અનુસાર, ઘણા વિસ્તારોમાં હજારો લોકોને તેમના ઘર છોડીને ભાગવાની ફરજ પડી છે. સ્થિતિ એવી છે કે 5000ની વસ્તી ધરાવતા મુકુમ નામના નાના શહેરમાં મોટાભાગના લોકો તેમના ઘરના ધાબા પર અટવાયા છે. આમાંથી મોટાભાગના લોકોને હવાઈ મદદ દ્વારા બહાર કાઢવામાં આવ્યા છે. જણાવવામાં આવ્યું છે કે આ શહેરનો 85 ટકા વિસ્તાર પૂરના પાણીમાં ડૂબી ગયો છે.

પૂરના પાણીથી બચવા માટે બ્રાઝિલના લોકો પોતાનો સામાન સુરક્ષિત જગ્યાએ ખસેડી રહ્યા છે. સ્થાનિક લોકોનું કહેવું છે કે પૂરના પાણી તેમના ઘરોમાં ભરાઈ ગયા છે. ઘણા લોકો પોતાનો સામાન સુરક્ષિત જગ્યાએ લઈ જઈ રહ્યા છે. રિયો ગ્રાન્ડે દો સુલના ગવર્નર એડ્યુઆર્ડો લેઇટે જણાવ્યું હતું કે રાજ્યમાં છેલ્લા 24 કલાકમાં 300 મીમી (11 ઇંચ) વરસાદ પડ્યો છે. જેના કારણે અનેક જગ્યાએ પૂર અને ભૂસ્ખલનની ઘટનાઓ સામે આવી છે. લોકોને બચાવવા માટે રાહત કાર્યકરોએ હેલિકોપ્ટરનો ઉપયોગ કરવો પડે છે. મુશળધાર વરસાદને કારણે અનેક મકાનો ધરાશાયી થયા છે. એવા ઘણા લોકો છે જેમનો સંપર્ક તૂટી ગયો છે. રાષ્ટ્રપતિ લુઇઝ ઇનાસિયો લુલા દા સિલ્વાએ કહ્યું છે કે સરકાર લોકોને પૂરથી બચાવવા માટે તમામ સંભવિત પગલાં લઈ રહી છે.

આવી આફત ફેબ્રુઆરીમાં પણ આવી હતી

આ વર્ષે ભારે વરસાદને કારણે બ્રાઝિલના સાઓ પાઉલો રાજ્યમાં પૂર અને ભૂસ્ખલનની ઘટનાઓ પણ સામે આવી છે. તે દરમિયાન આ દુર્ઘટનામાં 40 લોકોના મોત થયા હતા. ગયા વર્ષે, મૂશળધાર વરસાદને કારણે રેસિફ શહેરમાં ભૂસ્ખલન થયું હતું. જેમાં 100 લોકોના મોત થયા હતા. નિષ્ણાતોના મતે બ્રાઝિલ નજીકના એમેઝોનના જંગલો કાપવાથી આબોહવા પર અસર પડી છે. વારંવાર આવતી કુદરતી આફતો તેનું પરિણામ છે.

આ પણ વાંચો - PM Modi Exclusive Interview: મોંઘવારીને લઈ પીએમ મોદીનું નિવેદન.. કહ્યું આ લડાઈમાં તમામ દેશોએ એકબીજાને આપવો જોઇએ સહકાર