Canada Work Visa: વર્ક વિઝા પર કેનેડા જવા માગતા લોકો LMIA લેટર મેળવવા માટે ઘણીવાર મોટી રકમ ચૂકવતા હોય છે, અને ત્યારબાદ તેના આધારે વર્ક વિઝા મેળવી કેનેડા ઉપડી જતા હોય છે. ખાસ કરીને અનસ્કીલ્ડ લોકો LMIA લેટર માટે લાખો રૂપિયા ખર્ચવા માટે પણ તૈયાર થઈ જતા હોય છે, કારણકે તેને કેનેડામાં પ્રવેશવાનો એક સરળ રસ્તો માનવામાં આવે છે. LMIA એટલે કે લેબર માર્કેટ ઈમ્પેક્ટ એસેસમેન્ટ લેટર એક એવું ડોક્યુમેન્ટ છે કે જેના મારફતે કેનેડામાં પોતાનો બિઝનેસ ધરાવતો કોઈપણ વ્યક્તિ વિદેશથી કામદારોને બોલાવી શકે છે. જે લોકો સ્ટૂડન્ટ વિઝા પર પણ કેનેડા જાય છે તે પણ વર્ક પરમિટ પૂરી થયા બાદ કેનેડામાં રહેવા માટે અને આગળ જતાં PR લેવા LMIA લેટરની ગોઠવણ કરવામાં લાગેલા રહે છે. જોકે, LIMA લેટર તમારી પાસે આવી જાય તો તેના આધારે કેનેડાની વર્ક પરમિટ મળી જ જશે તેની કોઈ ગેરંટી નથી હોતી. થોડા સમય પહેલા જ ઈમિગ્રેશન, રેફ્યુજીસ એન્ડ સિટીઝનશીપ કેનેડા એટલે કે IRCC દ્વારા LMIA લેટર પર વર્ક વિઝા માટે એપ્લાય કરનારી એક યુવતીને વિઝા આપવાનો ઈનકાર કરી દીધો હતો. જોકે, IRCCના ઓફિસરના આ નિર્ણય સામે આ યુવતીએ કેનેડાની કોર્ટમાં ચેલેન્જ કર્યો હતો. તેની દલીલ હતી કે તેની વિઝા એપ્લિકેશન કોઈ ઠોસ યોગ્ય કારણ વિના જ રિજેક્ટ કરી દેવામાં આવી છે.
LMIA લેટર હોવા છતાંય કેનેડાની વર્ક પરમિટ મેળવવામાં પ્રોબ્લેમ થઈ શકે?
Canada Work Visa: LMIA લેટર આવી જાય પછી કેનેડાની વર્ક પરમિટ મળવી આસાન થઈ જાય છે તે વાત સો ટકા સાચી, પરંતુ જો એક વાતનું ધ્યાન ના રાખો તો તેમાંય પ્રોબ્લેમ થઈ શકે છે.
મૂળ ઈરાનની આ યુવતી હોમ ડિઝાઈન અને રિનોવેશન મેનેજર તરીકે કામ કરવાનો સાત વર્ષનો અનુભવ ધરાવતી હતી. ૨૦૨૨ના વર્ષમાં તેને વાનકુંવરની એક કન્સ્ટ્રક્શન કંપનીમાં જોબ મળી હતી, જેમાં તેને વર્ક શિડ્યૂલસ પ્લાન કરવા ઉપરાંત બજેટ મેનેજ કરવાનું અને સબકોન્ટ્રાક્ટર્સને રોકવાનું કામ કરવાનું હતું. આ યુવતીની અપોઈન્ટમેન્ટ ફાઈનલ થઈ જતાં કેનેડાની કન્સ્ટ્રક્શન કંપનીને LMIA લેટર ઈશ્યૂ કરવાની પરમિશન મળી હતી, અને તેના આધારે ઈરાનની યુવતીએ ટેમ્પરરી ફોરેન વર્કર પ્રોગ્રામ એટલે કે TFWP હેઠળ વર્ક પરમિટ માટે અરજી કરી હતી, જેમાં તેણે પોતાના IELTSના રિઝલ્ટને પણ સબમિટ કર્યું હતું. આ યુવતીને IELTSમાં પાંચ બેન્ડ આવ્યા હતા, અને તેના આધારે જ વિઝા ઓફિસરે તેની એપ્લિકેશનને રિજેક્ટ કરી નાખી હતી. વિઝા ઓફિસરની દલીલ હતી કે અરજદારને કેનેડામાં જે કામ કરવાનું છે તેના માટે જરૂરી ઈંગ્લિશનું જ્ઞાન તેઓ ના ધરાવતા હોવાથી તેમને વર્ક પરમિટ આપી શકાય તેમ નથી. જોકે, વિઝા ઓફિસરના આ નિર્ણય પર આ યુવતીએ જ્યુડિશિયલ રિવ્યૂ માટે અરજી કરી હતી. અરજદારનો દાવો હતો કે વર્ક પરમિટ માટે કોઈ ચોક્કસ લેંગ્વેજ રિક્વાયરમેન્ટ છે જ નહીં, અને તેની વિઝા એપ્લિકેશન રિજેક્ટ કરનારા અધિકારીએ એવું કારણ તો આપ્યું જ નથી કે ઈંગ્લિશનું મર્યાદિત નોલેજ કઈ રીતે તેના કામમાં બાધારૂપ બની શકે છે?
આ યુવતીની વિઝા એપ્લિકેશન રિજેક્ટ કરવા પાછળ જે કારણ અપાયા હતા તેમાં એવું જણાવાયું હતું કે તેને જે જવાબદારી નીભાવવાની છે તેના માટે ઈંગ્લિશનું એક લેવલનું નોલેજ હોવું જરૂરી છે. કેનેડાની ફેડરલ કોર્ટે પણ વિઝા ઓફિસરના નિર્ણયને યોગ્ય ગણાવતા એવું જણાવ્યું હતું કે અરજદારને IELTSમાં માત્ર પાંચ બેન્ડ આવ્યા છે, જે દર્શાવે છે કે તેમને ઈંગ્લિશનું નોલેજ તો છે પરંતુ તે માત્ર પ્રાથમિક કક્ષાનું જ છે અને અરજદારને જે પદ પર નોકરી ઓફર થઈ છે તેના માટે જરૂરી ઈંગ્લિશ સ્પિકિંગની તેઓ સ્કીલ નથી ધરાવતા. કેનેડાની ફેડરલ કોર્ટે આ કેસમાં જે ચુકાદો આપ્યો તે એટલા માટે મહત્વનો છે કે જો તમે LMIA લેટર પર અમુક સ્તરની જોબ મેળવી લીધા બાદ વર્ક વિઝા માટે એપ્લાય કરો ત્યારે તમને વિઝા મળશે કે નહીં તેનો મોટો આધાર તમારા IELTSના સ્કોર પર પણ રહેલો છે. આવા કેસમાં જો IELTSના સ્કોરના આધારે વિઝા રિજેક્ટ થાય તો એપ્લિકન્ટ ઈંગ્લિશ એજ્યુકેશન પ્રોગ્રામ પૂર્ણ કર્યાનું સર્ટિફિકેટ રજૂ કરીને કે પછી કામકાજના સ્થળે ઈંગ્લિશનો પોતાનો અનુભવ જણાવીને પણ IRCCના નિર્ણયને ચેલેન્જ કરી શકે છે, પરંતુ તેમ કરવું જરાય આસાન નથી હોતું.
MoneyControl News
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.
