China Taiwan dispute: ચીન શું કરવા જઈ રહ્યું છે, 32 યુદ્ધ વિમાન તાઈવાનમાં ઘુસ્યા, નૌકાદળના જહાજો પણ તૈનાત

China Taiwan dispute: ચીન અને તાઈવાન વચ્ચે ફરી એકવાર તણાવ વધતો જણાય છે. તાઈવાને ગુરુવારે દાવો કર્યો હતો કે ડઝનબંધ ચાઈનીઝ ફાઈટર પ્લેન તેની એરસ્પેસમાં પ્રવેશ્યા છે. તાઈવાની સૈન્યએ જણાવ્યું હતું કે 24 કલાકની અંદર ઓછામાં ઓછા 32 ચીની સૈન્ય વિમાન તેના પ્રદેશ પર જોવા મળ્યા હતા. આ વર્ષે તાઈવાનની એરસ્પેસમાં ચીની ઘૂસણખોરીની આ બીજી સૌથી મોટી ઘટના છે. આ વર્ષે જાન્યુઆરીના અંતમાં ચીનના 33 યુદ્ધ વિમાન તાઈવાન ટાપુની આસપાસ જોવા મળ્યા હતા. હવે ફરી એકવાર ચીનની ઉશ્કેરણીજનક હરકતો જોવા મળી રહી છે.

તાઈવાનના રાષ્ટ્રીય સંરક્ષણ મંત્રાલયે કહ્યું કે ચીનના સૈન્ય વિમાન ઉપરાંત, નૌકાદળના પાંચ જહાજો પણ નજીકમાં કાર્યરત હતા. તાઇવાનના સંરક્ષણ મંત્રાલયે એક નિવેદનમાં જણાવ્યું હતું કે "13 વિમાનોએ તાઇવાન સ્ટ્રેટની મધ્ય રેખાને ઓળંગી હતી." ચીનની આ કાર્યવાહી પર તાઈવાન પણ એક્શન મોડમાં આવી ગયું છે. નિવેદનમાં કહેવામાં આવ્યું છે કે તાઇવાનની સેના "સ્થિતિ પર નજીકથી નજર રાખી રહી છે."

ગયા મહિને, તાઇવાને કહ્યું હતું કે તેની આસપાસના વિસ્તારમાં 11 ચીની નૌકાદળના જહાજો મળી આવ્યા છે. વધુમાં, તાઈપેઈ અને બેઈજિંગ વચ્ચે જીવલેણ માછીમારી બોટની ઘટનાને લઈને વિવાદ વધી રહ્યો છે. 14 ફેબ્રુઆરીના રોજ તાઈવાનના કિનમેન ટાપુ નજીક તાઈવાનના કોસ્ટ ગાર્ડ દ્વારા પીછો કરવામાં આવતા ચાર લોકોને લઈ જતી ચાઈનીઝ સ્પીડબોટ પલટી ગઈ હતી, જેમાં બે લોકોના મોત થયા હતા જ્યારે અન્ય બે બચી ગયા હતા.

આ પછી કિનમેન દ્વીપસમૂહ પાસે ચીને એક પ્રવાસી બોટને રોકી હતી. તાઈવાને આનો વિરોધ કર્યો, જેનાથી ટાપુમાં તણાવ વધી ગયો. કિનમેન ટાપુ ચીનના દરિયાકિનારે છે, પરંતુ તે તાઈવાન દ્વારા નિયંત્રિત છે. તાઈવાનના મીડિયા રિપોર્ટ્સમાં કહેવામાં આવ્યું છે કે 11 ક્રૂ અને 23 મુસાફરોને લઈને બોટ 'કિંગ જિયા'ને સોમવારે લગભગ 32 મિનિટ માટે ચીની કોસ્ટ ગાર્ડે રોકી હતી. તાઇવાનના કોસ્ટ ગાર્ડ બાદમાં બોટને કિનમેન પરત લાવ્યા હતા.

Arunachal Pradesh Row: વાહિયાત અને બનાવટી દાવા કરવાનું કરો બંધ, USએ ચાઇનાને લીધું આડે હાથ, કહ્યું- અરુણાચલ ભારતનું અભિન્ન અંગ