રશિયામાં યુક્રેનનો મોટો હુમલો: મોસ્કોની ઓઈલ રિફાઈનરી ખાખ, 4 મુખ્ય એરપોર્ટ બંધ કરવા પડ્યા

નિયાને હજુ મિડલ ઈસ્ટમાં ચાલી રહેલા ભયંકર યુદ્ધમાંથી થોડી રાહત મળી હતી ત્યાં રશિયા અને યુક્રેન વચ્ચે ફરી એકવાર યુદ્ધ ભડકી ઉઠ્યું છે. બંને દેશો વચ્ચે તબાહી અને વિનાશનો દોર સતત વધી રહ્યો છે. ગુરુવારે યુક્રેને રશિયાની રાજધાની મોસ્કોમાં આવેલી એક મોટી ઓઈલ રિફાઈનરી પર આ સપ્તાહનો બીજો સૌથી મોટો ડ્રોન હુમલો કર્યો છે. આ હુમલા બાદ રિફાઈનરીમાંથી કાળા ધુમાડાના ગોટેગોટા અને ભયંકર જ્વાળાઓ ઉઠતી જોવા મળી હતી. યુક્રેનના રાષ્ટ્રપતિ વોલોદિમિર ઝેલેન્સ્કીએ આ હુમલાને સંપૂર્ણપણે યોગ્ય ગણાવ્યો છે અને તેને યુક્રેન તરફથી અત્યાર સુધીના સૌથી મોટા અભિયાનોમાંનું એક માનવામાં આવી રહ્યું છે.

રશિયાની 'વૉર મશીન' ને તોડવાનો પ્રયાસ

હુમલાની જવાબદારી સ્વીકારતા યુક્રેનના રાષ્ટ્રપતિ ઝેલેન્સ્કીએ પોતાના સૈનિકોના ભારે વખાણ કર્યા છે. તેમણે સ્પષ્ટ શબ્દોમાં કહ્યું કે અમારા શહેરો અને નાગરિકો પર તાજેતરમાં થયેલા રશિયન હુમલાઓનો આ એકદમ વ્યાજબી જવાબ છે. યુક્રેનના સૈનિકો હવે એવા સ્થળોને સીધા નિશાન બનાવી રહ્યા છે જે રશિયાની સૈન્ય તાકાત અને તેમની વૉર મશીનને ઈંધણ પૂરું પાડે છે.

યુક્રેને કેમ લીધો આ મોટો બદલો?

555 ડ્રોન તોડી પાડ્યા અને 4 એરપોર્ટ બંધ

બીજી તરફ રશિયન અધિકારીઓએ એવો દાવો કર્યો છે કે તેમણે અલગ અલગ વિસ્તારોમાં યુક્રેનના ઓછામાં ઓછા 555 ડ્રોનને હવામાં જ તોડી પાડ્યા છે. રશિયાના સંરક્ષણ મંત્રાલયના જણાવ્યા મુજબ આમાંથી લગભગ 200 ડ્રોન માત્ર રાજધાની મોસ્કો તરફ આગળ વધી રહ્યા હતા જેને સફળતાપૂર્વક નષ્ટ કરી દેવામાં આવ્યા છે.

આટલા મોટા ડ્રોન હુમલા બાદ મોસ્કોમાં ભારે હડકંપ મચી ગયો છે. લોકોની સુરક્ષાને ધ્યાનમાં રાખીને રશિયાના પરિવહન મંત્રાલયે મોસ્કોના તમામ 4 મુખ્ય એરપોર્ટ શેરમેતિયેવો, ડોમોડેડોવો, વ્નુકોવો અને ઝુકોવ્સ્કી પર વિમાન સેવાઓ આગામી સૂચના સુધી સંપૂર્ણપણે બંધ કરી દીધી છે.

આસિયાન સમિટ પહેલા જ પુતિનને ઝટકો

આ હુમલો ટાઈમિંગની દ્રષ્ટિએ ખૂબ જ સંવેદનશીલ સમયે થયો છે. હુમલાના થોડા કલાકો બાદ જ રશિયન રાષ્ટ્રપતિ વ્લાદિમીર પુતિન કઝાન શહેરમાં આસિયાન દેશોના નેતાઓની યજમાની કરવાના હતા. આ બે દિવસીય શિખર સંમેલનમાં થાઈલેન્ડ, વિયેતનામ, કંબોડિયા, લાઓસ, મલેશિયા અને સિંગાપોરના વડાપ્રધાન ભાગ લઈ રહ્યા છે જ્યારે ફિલિપાઈન્સનું પ્રતિનિધિત્વ ત્યાંના રાષ્ટ્રપતિ કરી રહ્યા છે. હુમલાની બરાબર એક સાંજ પહેલા જ પુતિને મહેમાનોનું સ્વાગત કરતા મોટી મોટી વાતો કરી હતી કે રશિયા અને આસિયાન દેશો મળીને એક ન્યાયી વૈશ્વિક વ્યવસ્થા બનાવવા માટે પ્રતિબદ્ધ છે.

હુમલા વચ્ચે પણ ઝેલેન્સ્કીની શાંતિ અપીલ

આટલા ભીષણ અને આક્રમક હુમલા છતાં રાષ્ટ્રપતિ ઝેલેન્સ્કીએ વ્લાદિમીર પુતિનને ફરી એકવાર કૂટનીતિ અને વાતચીતના ટેબલ પર પાછા ફરવા વિનંતી કરી છે. તેમણે કહ્યું કે હવે આ વિનાશક યુદ્ધનો અંત લાવવાનો સમય આવી ગયો છે. નિષ્ણાતોના મતે ઓપરેશન સ્પાઈડર્સ વેબ બાદ યુક્રેન દ્વારા રશિયાની અંદર કરવામાં આવેલો આ અત્યાર સુધીનો સૌથી મોટો હુમલો છે જે દર્શાવે છે કે યુક્રેન હવે આરપારની લડાઈના મૂડમાં છે.

આ પણ વાંચો-US-Iran War Ends: અમેરિકા અને ઈરાન વચ્ચે યુદ્ધનો અંત, ડોનાલ્ડ ટ્રમ્પ અને ઈરાની રાષ્ટ્રપતિએ શાંતિ કરાર પર કર્યા હસ્તાક્ષર