India-US Trade Deal: રશિયન તેલ બંધ કરવું ભારત માટે સરળ નથી! મોંઘવારીનું સંકટ? Moody's એ આપી ચેતવણી

India-US Trade Deal: ભારત અને અમેરિકા વચ્ચે સોમવારે એક મોટી ટ્રેડ ડીલ થઈ છે. જોકે, આ ડીલ કેટલીક શરતો સાથે કરવામાં આવી છે, જેમાં સૌથી મહત્વની શરત એ છે કે ભારતે રશિયા પાસેથી તેલ ખરીદવાનું સંપૂર્ણપણે બંધ કરવું પડશે. પરંતુ સવાલ એ છે કે શું ભારત આટલી જલ્દી આ મોટો નિર્ણય લઈ શકશે? વૈશ્વિક રેટિંગ એજન્સી મૂડીઝના મતે આ હાલ પૂરતું શક્ય નથી.

શું રશિયન તેલ બંધ કરવાથી મોંઘવારી વધશે?

મૂડીઝ રેટિંગ્સના રિપોર્ટ મુજબ, ભારત તાત્કાલિક અસરથી રશિયન ક્રૂડ ઓઈલ ખરીદવાનું બંધ નહીં કરે. એજન્સીનું માનવું છે કે જો ભારત અચાનક રશિયા પાસેથી તેલ લેવાનું બંધ કરી દે, તો તેની સીધી અસર દેશના આર્થિક વિકાસપર પડી શકે છે. એટલું જ નહીં, દેશમાં મોંઘવારી પણ વધી શકે છે.

મૂડીઝે જણાવ્યું કે છેલ્લા થોડા મહિનાઓમાં ભારતે રશિયા પાસેથી તેલની ખરીદી ઓછી જરૂર કરી છે, પરંતુ તેને સંપૂર્ણપણે બંધ કરવું મુશ્કેલ છે. ભારત દુનિયાના સૌથી મોટા તેલ આયાતકારોમાંનું એક છે. જો ભારત રશિયાને છોડીને અન્ય દેશો પાસેથી તેલ ખરીદવાનું શરૂ કરશે, તો વૈશ્વિક બજારમાં તેલની માંગ વધશે અને પુરવઠો ઘટશે. જેના કારણે તેલના ભાવ આસમાને પહોંચી શકે છે અને સામાન્ય માણસ પર મોંઘવારીનો માર પડી શકે છે. ભારત માટે પોતાની એનર્જી સપ્લાય ચેઈન આટલી જલ્દી બદલવી ખૂબ અઘરું કામ છે.

એક તરફ તેલનો મુદ્દો છે, તો બીજી તરફ ભારતીય વેપારીઓ માટે સારા સમાચાર પણ છે. મૂડીઝે કહ્યું કે આ ટ્રેડ ડીલ હેઠળ અમેરિકા ભારતીય સામાન પરના ટેરિફ ઘટાડશે, જેનાથી ભારતની નિકાસને મોટો ફાયદો થશે. ખાસ કરીને અમેરિકા મોકલવામાં આવતા સામાનમાં વધારો થશે.

તમને જણાવી દઈએ કે અમેરિકા, ભારતનું સૌથી મોટું એક્સપોર્ટ માર્કેટ છે. વર્ષ 2025 ના પહેલા 11 મહિનામાં ભારતની કુલ નિકાસમાં અમેરિકાનો હિસ્સો લગભગ 21% રહ્યો છે. ટેરિફ ઘટવાથી અમેરિકામાં ભારતીય સામાનની માંગ ફરી વધશે.

ભારત અમેરિકા પાસેથી શું ખરીદશે?

એક સરકારી અધિકારીએ મંગળવારે રોયટર્સને જણાવ્યું કે, આ ડીલના ભાગરૂપે ભારતે અમેરિકા પાસેથી ખરીદી વધારવાની તૈયારી બતાવી છે. ભારત હવે અમેરિકા પાસેથી નીચે મુજબની વસ્તુઓ વધારે ખરીદશે:

પેટ્રોલિયમ

ડિફેન્સ (સંરક્ષણ) સાધનો

ઇલેક્ટ્રોનિક્સ

ફાર્માસ્યુટિકલ્સ (દવાઓ)

ટેલિકોમ સાધનો

વિમાનો

ટ્રમ્પે કરી હતી જાહેરાત

અમેરિકી રાષ્ટ્રપતિ ડોનાલ્ડ ટ્રમ્પે સોમવારે આ સમજૂતીની જાહેરાત કરી હતી. તેમણે કહ્યું હતું કે અમેરિકા ભારતીય સામાન પરના ટેરિફને 50% થી ઘટાડીને 18% કરશે. તેના બદલામાં ભારતે રશિયન તેલની ખરીદી બંધ કરવી પડશે અને વેપારમાં આવતી અડચણો દૂર કરવી પડશે. ટ્રમ્પે એમ પણ કહ્યું કે ભારતે 'BUY AMERICAN' (અમેરિકન વસ્તુ ખરીદો) અભિયાનને મોટા પાયે અપનાવવા માટે સંમતિ દર્શાવી છે.

આ પણ વાંચો-એલોન મસ્કનો મોટો દાવ: SpaceX બની દુનિયાની 11મી સૌથી મૂલ્યવાન કંપની, જાણો હવે કોણ છે તેનાથી આગળ?