દેશમાં પ્રથમ વખત માસિક બેરોજગારી દર જાહેર, એપ્રિલ 2025માં 5.1% રહ્યો

ભારત સરકારે દેશમાં પ્રથમ વખત માસિક ધોરણે બેરોજગારીના આંકડા જાહેર કર્યા છે. સાંખ્યિકી અને કાર્યક્રમ અમલીકરણ મંત્રાલય દ્વારા ગુરુવારે રજૂ કરાયેલા આંકડા અનુસાર, એપ્રિલ 2025 દરમિયાન દેશનો બેરોજગારી દર 5.1 ટકા રહ્યો હતો. આ માહિતી વર્તમાન સાપ્તાહિક સ્થિતિ (CWS)ના આધારે એકત્રિત કરવામાં આવી છે, જેમાં સર્વેની તારીખથી પહેલાના સાત દિવસની પ્રવૃત્તિઓનો સમાવેશ થાય છે.

આ પહેલાં લેબર ફોર્સ સર્વેના આંકડા ત્રિમાસિક અને વાર્ષિક ધોરણે જ જાહેર થતા હતા. પરંતુ હવે મંત્રાલયે નોકરીની યોગ્યતા ધરાવતા લોકોમાં બેરોજગારીનું પ્રમાણ વાસ્તવિક સમયમાં નિરીક્ષણ કરવા માટે માસિક આવધિક શ્રમ બળ સર્વેક્ષણ (PLFS) શરૂ કર્યું છે.

પુરુષો અને સ્ત્રીઓમાં બેરોજગારી દર

સર્વે અનુસાર, એપ્રિલ 2025માં તમામ વય જૂથોમાં બેરોજગારી દર 5.1 ટકા રહ્યો. પુરુષોમાં આ દર 5.2 ટકા, જ્યારે સ્ત્રીઓમાં 5.0 ટકા નોંધાયો. ખાસ કરીને 15થી 29 વય જૂથના યુવાનોમાં બેરોજગારી દર 13.8 ટકા હતો. આમાં શહેરી વિસ્તારોમાં 17.2 ટકા અને ગ્રામીણ વિસ્તારોમાં 12.3 ટકા બેરોજગારી નોંધાઈ.

આ સર્વેમાં જાણવા મળ્યું કે 15થી 29 વર્ષની મહિલાઓમાં બેરોજગારી દર રાષ્ટ્રીય સ્તરે 14.4 ટકા હતો. શહેરી વિસ્તારોમાં આ દર 23.7 ટકા, જ્યારે ગ્રામીણ વિસ્તારોમાં 10.7 ટકા રહ્યો. બીજી તરફ, આ જ વય જૂથના પુરુષોમાં બેરોજગારી દર 13.6 ટકા હતો, જેમાં શહેરી વિસ્તારોમાં 15 ટકા અને ગ્રામીણ વિસ્તારોમાં 13 ટકા નોંધાયો.

શ્રમ બળ સહભાગિતા દર (LFPR)

આંકડાઓ અનુસાર, એપ્રિલ 2025માં 15 વર્ષ અને તેથી વધુ વયના લોકોમાં શ્રમ બળ સહભાગિતા દર (LFPR) 55.6 ટકા હતો. LFPR એટલે વસ્તીમાં શ્રમ બળ (એટલે કે કામ કરતા, નોકરીની શોધમાં હોય અથવા કામ માટે ઉપલબ્ધ)માં સામેલ લોકોની ટકાવારી.

ગ્રામીણ વિસ્તારો: LFPR 58.0 ટકા

શહેરી વિસ્તારો: LFPR 50.7 ટકા

પુરુષો: ગ્રામીણ વિસ્તારોમાં 79.0 ટકા અને શહેરી વિસ્તારોમાં 75.3 ટકા

સ્ત્રીઓ: ગ્રામીણ વિસ્તારોમાં 38.2 ટકા

શ્રમિક વસ્તી અનુપાત (WPR)

શ્રમિક વસ્તી અનુપાત (WPR) એટલે કુલ વસ્તીમાં રોજગારી ધરાવતા લોકોનું પ્રમાણ. આ આંકડાઓ દેશના રોજગાર ચિત્રને વધુ સ્પષ્ટ કરે છે અને સરકારને નીતિ નિર્માણમાં મદદ કરશે.

શા માટે મહત્વનું છે આ સર્વે?

માસિક PLFSની શરૂઆત ભારતના રોજગાર બજારની ગતિશીલતાને વધુ નજીકથી સમજવા માટે એક મહત્વપૂર્ણ પગલું છે. આ સર્વે દ્વારા સરકાર અને નીતિ નિર્માતાઓને બેરોજગારીના વલણો, શ્રમ બળની સહભાગિતા અને રોજગારીની તકોનું વધુ સચોટ અને સમયસર મૂલ્યાંકન કરવામાં મદદ મળશે.

આ પણ વાંચો-Boycott Turkey: JNU, જામિયા બાદ હવે હૈદરાબાદની આ યુનિવર્સિટીએ પણ લીધો મોટો નિર્ણય, તુર્કી સાથેનો કરાર તોડ્યો