ઓડિશા પર મંડરાયો કુદરતી ખતરો, ડીપ ડિપ્રેશનને કારણે 11 જિલ્લાઓમાં ભારે વરસાદનું એલર્ટ, તંત્ર દોડતું થયું

IMD weather forecast: ઓડિશામાં હવામાનને લઈને પ્રશાસન સંપૂર્ણપણે એલર્ટ મોડમાં આવી ગયું છે. ભારતીય હવામાન વિભાગની આગાહી મુજબ, હાલમાં દરિયામાં કોઈ વાવાઝોડું નથી આવી રહ્યું, પરંતુ એક ખતરનાક 'ડીપ ડિપ્રેશન' બની રહ્યું છે. આ સિસ્ટમની સીધી અસરને કારણે રાજ્યના 11 જિલ્લાઓમાં ભારેથી અતિ ભારે વરસાદ પડવાની સંભાવના છે.

હવામાન વિભાગના જણાવ્યા અનુસાર, આ ડીપ ડિપ્રેશનની અસર આગામી 2 દિવસ સુધી રહેશે. આ ગંભીર સ્થિતિને જોતા રાજ્ય સરકારે તમામ પ્રભાવિત જિલ્લાઓના વહીવટી તંત્રને સતર્ક રહેવાના કડક આદેશ આપ્યા છે.

મુખ્ય સચિવે યોજી તાત્કાલિક બેઠક

રાજ્યના મુખ્ય સચિવ અનુ ગર્ગે વીડિયો કોન્ફરન્સના માધ્યમથી 11 જિલ્લાના કલેક્ટર સાથે એક મહત્વપૂર્ણ બેઠક યોજી હતી. આ બેઠકમાં વરસાદને કારણે ઉભી થનારી સંભવિત પરિસ્થિતિ અને બચાવ કામગીરીની સમીક્ષા કરવામાં આવી હતી. તમામ કલેક્ટર અને તેમની ટીમોને હેડક્વાર્ટરમાં જ હાજર રહેવા અને જ્યાં પાણી ભરાવાની સમસ્યા સર્જાય છે, તેવા વિસ્તારો પર સતત નજર રાખવા માટે સૂચના આપવામાં આવી છે.

સંભવિત ભારે વરસાદ અને પૂરની સ્થિતિને પહોંચી વળવા પ્રશાસને કેટલીક ખાસ તૈયારીઓ કરી છે:

ફ્લડ રિલીફ સ્ટોક: જ્યાં પૂર કે જળબંબાકારની સ્થિતિ બની શકે છે, ત્યાં જરૂરી રાહત સામગ્રીનો સ્ટોક તૈયાર રખાયો છે.

ગર્ભવતી મહિલાઓની સુરક્ષા: પ્રશાસનને ગર્ભવતી મહિલાઓની સુરક્ષા સુનિશ્ચિત કરવા અને જરૂર પડ્યે તાત્કાલિક મેડિકલ સહાય પહોંચાડવા માટે ખાસ નિર્દેશ અપાયા છે.

એન્ટી-સ્નેક વ્યવસ્થા: વરસાદ અને પૂરના સમયે સાપ નીકળવાના બનાવો વધી જાય છે, તેથી સાપ કરડવા પર અપાતી એન્ટી-સ્નેક (ઝેર વિરોધી) દવાઓની પૂરતી વ્યવસ્થા કરવામાં આવી છે.

ODRAF ની ટીમો તૈનાત: કોઈપણ ઈમરજન્સીને પહોંચી વળવા માટે ઓડિશા ડિઝાસ્ટર રેપિડ એક્શન ફોર્સની ટીમોને એલર્ટ રખાઈ છે. જો જરૂર પડશે તો વધારાની ટીમો પણ મોકલવામાં આવશે.

માછીમારોને દરિયામાં ન જવા કડક સૂચના

દરિયામાં ઉછળતા મોજા અને ખરાબ હવામાનને જોતા રાજ્ય સરકારે માછીમાरो માટે એલર્ટ જાહેર કર્યું છે. મુખ્ય સચિવે જણાવ્યું છે કે આગામી 3 દિવસ સુધી કોઈપણ માછીમારે દરિયામાં માછલી પકડવા જવું નહીં.

દક્ષિણ ઓડિશા અને પહાડી વિસ્તારોમાં ભૂસ્ખલનનો ખતરો

આ ડીપ ડિપ્રેશનની સૌથી વધુ અસર દક્ષિણ ઓડિશાના જિલ્લાઓમાં જોવા મળશે. આ ઉપરાંત ગજપતિ જેવા પહાડી વિસ્તારોમાં ભારે વરસાદને કારણે ભૂસ્ખલન થવાની પૂરેપૂરી શક્યતા છે. જેથી આ વિસ્તારોમાં પ્રશાસનને વધુ સાવધ રહેવા જણાવાયું છે.

આ વર્ષે નોંધાયો રેકોર્ડબ્રેક વરસાદ

ઓડિશામાં આ વર્ષે સામાન્ય કરતા ઘણો વધારે વરસાદ પડ્યો છે. મુખ્ય સચિવ અનુ ગર્ગે માહિતી આપતા કહ્યું કે, સામાન્ય રીતે આ સમયગાળા સુધીમાં 1100 મિલીમીટર વરસાદ નોંધાય છે, પરંતુ આ વર્ષે અત્યાર સુધીમાં 1295 મિલીમીટર વરસાદ ખાબકી ચૂક્યો છે. એટલે કે રાજ્યમાં સામાન્ય કરતા 195 મિલીમીટર વધુ વરસાદ નોંધાયો છે.

શું હોય છે આ 'ડીપ ડિપ્રેશન'?

ઘણા લોકોને પ્રશ્ન થતો હશે કે ડીપ ડિપ્રેશન શું છે. વાસ્તવમાં, ડીપ ડિપ્રેશન એ દરિયાની સપાટી પર બનતું લો-પ્રેશર (હવાનું હળવું દબાણ) નું એક મજબૂત સ્વરૂપ છે. આ સામાન્ય ડિપ્રેશન કરતા વધુ શક્તિશાળી હોય છે. જ્યારે આ સિસ્ટમ બને છે, ત્યારે ભારે પવન ફૂંકાય છે, અતિ ભારે વરસાદ પડે છે અને દરિયામાં ઊંચા મોજા ઉછળે છે. જોકે, એ જરૂરી નથી કે દરેક ડીપ ડિપ્રેશન આગળ જઈને વાવાઝોડામાં જ ફેરવાય, પરંતુ તે મોટા પાયે નુકસાન કરવાની ક્ષમતા ચોક્કસ ધરાવે છે.

આ પણ વાંચો-20 ઓક્ટોબરથી લાગુ થશે ન્યૂઝીલેન્ડ સાથે ફ્રી ટ્રેડ એગ્રીમેન્ટ, કાર અને ઓટો પાર્ટ્સ થશે સસ્તા