પાકિસ્તાનની આર્થિક મુશ્કેલીઓ વધી: વેપાર ખાધ 46%ને પાર, આયાતમાં ઉછાળો, નિકાસમાં ઘટાડો

Pakistan Economy: પાકિસ્તાનની આર્થિક મુશ્કેલીઓમાં વધારો થયો છે, કારણ કે દેશની વેપાર ખાધ સપ્ટેમ્બર 2025માં 46% વધીને 3.34 અરબ ડોલર થઇ છે. ગયા વર્ષે સપ્ટેમ્બરમાં આ ખાધ 2.29 અરબ ડોલર હતી. પાકિસ્તાન સાંખ્યિકી બ્યુરો (PBS)ના આંકડા અનુસાર, આયાતમાં 14%નો વધારો થઈને 5.85 અરબ ડોલર થઇ છે, જ્યારે નિકાસમાં 11.7%નો ઘટાડો થઈને 2.5 અરબ ડોલર થયું છે. આનાથી દેશના નાજુક આર્થિક સંતુલન પર દબાણ વધ્યું છે.

જુલાઈ-સપ્ટેમ્બર 2025ની ત્રિમાસિક ગાળામાં પાકિસ્તાનનું વેપાર ખાધ વાર્ષિક ધોરણે 32.9% વધીને 9.37 અરબ ડોલર થયું. આ ગાળામાં આયાત 13.5% વધીને 16.97 અરબ ડોલર થઈ, જ્યારે નિકાસ 3.8% ઘટીને 7.6 અરબ ડોલર રહી. આગળના મહિના એટલે કે ઓગસ્ટ 2025ની સરખામણીએ સપ્ટેમ્બરમાં વેપાર ખાધમાં 16.3%નો વધારો નોંધાયો.

અર્થશાસ્ત્રીઓએ ચેતવણી આપી છે કે વધતો વેપાર ખાધ પાકિસ્તાનના વિદેશી મુદ્રા ભંડાર પર ભારે દબાણ લાવી શકે છે, જેનાથી પાકિસ્તાની રૂપિયાની સ્થિરતા પર અસર થઈ શકે છે. આ ઉપરાંત, આનાથી દેશ માટે વિદેશી લોનની ચુકવણી પણ મુશ્કેલ બની શકે છે. ઉલ્લેખનીય છે કે 25 કરોડની વસ્તી ધરાવતું પાકિસ્તાન હાલમાં વર્લ્ડ બેન્ક, એશિયન ડેવલપમેન્ટ બેન્ક, આઈએમએફ, ચીન, સંયુક્ત અરબ અમીરાત અને સાઉદી અરેબિયા જેવા દેશોના નાણાકીય સહયોગ પર નિર્ભર છે.

આ વધતી આર્થિક અસ્થિરતા પાકિસ્તાનના નીતિ નિર્માતાઓ માટે ગંભીર પડકાર ઉભો કરે છે, જેમણે હવે આયાત ઘટાડવા અને નિકાસ વધારવા માટે તાત્કાલિક પગલાં લેવાની જરૂર છે.

આ પણ વાંચો-સરસવનું તેલ, મગફળીનું તેલ કે રિફાઇન્ડ: કયું તેલ છે તમારા સ્વાસ્થ્ય માટે શ્રેષ્ઠ?