Apple Pay Launch India: આઈફોન યુઝર્સની બલ્લે બલ્લે! ભારતમાં લોન્ચ થયું એપલ પે, હવે વગર કાર્ડ અને OTP એ માત્ર એક ટેપથી થશે પેમેન્ટ

Apple Pay Launch India: લાંબા સમયની રાહ જોયા પછી આખરે આઇફોન બનાવતી દિગ્ગજ કંપની Apple એ ભારતમાં પોતાની લોકપ્રિય ટેપ એન્ડ પે સર્વિસ Apple Pay સત્તાવાર રીતે લોન્ચ કરી દીધી છે. દુનિયાના સૌથી ઝડપથી વિકસતા ડિજિટલ પેમેન્ટ માર્કેટ એવા ભારતમાં એન્ટ્રી કરવા માટે કંપનીએ શરૂઆતમાં Axis Bank સાથે મોટી ભાગીદારી કરી છે. હવે iPhone, iPad અને Apple Watch યુઝર્સ પોતાનું ફિઝિકલ કાર્ડ કાઢ્યા વગર કે OTP ની ઝંઝટ વગર માત્ર એક ટેપથી એકદમ સેફ પેમેન્ટ કરી શકશે.

Axis Bank સાથે શરૂઆત, અન્ય બેન્કો સાથે વાતચીત ચાલુ

હાલના આ લેટેસ્ટ તબક્કામાં Apple Pay ની સુવિધા માત્ર Axis Bank દ્વારા આપવામાં આવેલા Visa અને Mastercard ક્રેડિટ કાર્ડ્સ માટે જ ઉપલબ્ધ કરાવવામાં આવી છે. Apple Payના વાઈસ પ્રેસિડેન્ટ જેનિફર બેલીએ જણાવ્યું છે કે, કંપની ટૂંક સમયમાં જ ભારતની અન્ય મોટી બેન્કો અને કાર્ડ નેટવર્કને પણ આ પ્લેટફોર્મ સાથે જોડવાની તૈયારી કરી રહી છે. યુઝર્સ પોતાના ક્રેડિટ કાર્ડને Apple Wallet એપમાં એડ કરીને દેશના હજારો સ્ટોર્સ, ઈ-કોમર્સ સાઇટ્સ અને ઇન્ટરનેશનલ સ્તરે જ્યાં પણ NFC મશીન હોય ત્યાં સરળતાથી પેમેન્ટ કરી શકે છે.

કેવી રીતે કામ કરશે Apple Pay?

OTP માંથી મુક્તિ: તમારે વારંવાર કાર્ડ નંબર, CVV કે OTP નાખવાની જરૂર નહીં પડે.

ઇન-સ્ટોર પેમેન્ટ: દુકાનમાં પેમેન્ટ કરવા માટે iPhone ના સાઇડ કે હોમ બટનને ડબલ-ક્લિક કરો. Face ID, Touch ID અથવા પાસવર્ડથી ઓથેન્ટિકેટ કર્યા પછી ફોન કે સ્માર્ટ વોચને POS મશીન પાસે લઈ જતાં જ સેકન્ડોમાં પેમેન્ટ પૂરું થઈ જશે.

ઓનલાઇન પેમેન્ટ: Swiggy, Zomato, Blinkit કે Croma જેવી એપ્સ અને વેબસાઇટ પર ઓનલાઇન ઓર્ડર કરતી વખતે વારંવાર એડ્રેસ કે કાર્ડની ડિટેલ્સ ભરવાની મગજમારીમાંથી છુટકારો મળશે.

સુરક્ષા અને પ્રાઈવસી

લોકોના મનમાં ઓનલાઈન ફ્રોડનો ડર રહેતો હોય છે, પણ Apple એ સુરક્ષાને પોતાનો મુખ્ય પાયો બનાવ્યો છે. તમારો સાચો ક્રેડિટ કાર્ડ નંબર ન તો તમારા ડિવાઇસમાં સેવ થશે, ન તો Apple ના સર્વર પર. પેમેન્ટ વખતે દુકાનદારને પણ આ માહિતી મળતી નથી. Mastercard અને Visa ની લેટેસ્ટ ટોકનાઇઝેશન ટેકનોલોજી દ્વારા દરેક ડિવાઇસ માટે એક યુનિક 'ડિવાઇસ એકાઉન્ટ નંબર' જનરેટ થાય છે, જે તમારા ફોનની સિક્યોર ચિપમાં સુરક્ષિત રહે છે. ખાસ વાત એ છે કે Apple Pay થી પેમેન્ટ કરવા છતાં ગ્રાહકોને તેમના કાર્ડ પર મળતા તમામ રિવોર્ડ પોઇન્ટ્સ અને ઓફર્સનો લાભ મળતો જ રહેશે.

કયા ડિવાઇસમાં સપોર્ટ કરશે?

Apple Payનો ઉપયોગ કરવા માટે તમારી પાસે નીચે મુજબના લેટેસ્ટ ડિવાઇસ અને સોફ્ટવેર હોવા જરૂરી છે:

iPhone: iOS 18 કે તેનાથી નવા વર્ઝન પર ચાલતો iPhone XR કે તેનાથી નવું મોડલ.

Apple Watch: watchOS 11 કે તેનાથી નવા વર્ઝન પર ચાલતી Apple Watch Series 6 કે નવું મોડલ. Mac કોમ્પ્યુટર્સ માટે આ સપોર્ટ ટૂંક સમયમાં શરૂ કરવામાં આવશે.

જેનિફર બેલીના જણાવ્યા અનુસાર, ભારત ઝડપથી કેશલેસ ભવિષ્ય તરફ આગળ વધી રહ્યું છે. 2026 ની આ સૌથી મોટી પેમેન્ટ અપડેટ ભારતીય યુઝર્સના પેમેન્ટ કરવાની રીતને સંપૂર્ણપણે બદલી નાખશે અને ડિજિટલ ટ્રાન્ઝેક્શનને વધુ સ્માર્ટ અને સુરક્ષિત બનાવશે.

આ પણ વાંચો- રોકાણની સચોટ રણનીતિ: 1 કરોડનો પોર્ટફોલિયો બનાવવો છે? જાણો એક્સપર્ટ પાસેથી ઇક્વિટી, ડેટ અને ગોલ્ડનું યોગ્ય બેલેન્સ