બેંક કે NBFC: ક્યાંથી લોન લેવી પડશે સસ્તી અને સરળ? લોન લેતા પહેલા આ 5 વાતોનું ખાસ રાખો ધ્યાન

Bank Loan vs NBFC Loan: આજના આધુનિક સમયમાં જ્યારે પણ લોકોને તાત્કાલિક પૈસાની જરૂર પડે છે, ત્યારે મનમાં સૌથી પહેલો વિચાર બેંકનો જ આવે છે. પરંતુ હવે જમાનો બદલાયો છે. ડિજિટલ યુગમાં માત્ર બેંકો જ નહીં, પરંતુ NBFC (નોન બેન્કિંગ ફાઇનાન્સિયલ કંપનીઓ) પણ લોકોને ખૂબ જ ઝડપથી લોન આપી રહી છે. આજે આ કંપનીઓ પર્સનલ લોન, કાર લોન, બિઝનેસ લોન જેવી અનેક ફાઇનાન્સ સુવિધાઓ પૂરી પાડે છે. આવી સ્થિતિમાં, લોન લેતા પહેલા તમારા માટે એ સમજવું ખૂબ જ જરૂરી છે કે બેંક અને NBFC વચ્ચે શું તફાવત છે અને તમારા ખિસ્સા માટે કયો વિકલ્પ સૌથી શ્રેષ્ઠ રહેશે.

બેંક અને NBFC ના કામકાજમાં શું ફરક છે?

બેંકની સિસ્ટમ: બેંક એક કડક નિયમો હેઠળ કામ કરતી નાણાકીય સંસ્થા છે. બેંકો લોકો પાસે સેવિંગ્સ એકાઉન્ટ, કરંટ એકાઉન્ટ અને ફિક્સ ડિપોઝિટ (FD) ના રૂપમાં પૈસા જમા કરાવે છે અને એ જ પૈસામાંથી લોકોને લોન આપે છે. બેંકો પર રિઝર્વ બેંકના નિયમો ખૂબ જ કડક હોય છે.

NBFCની સિસ્ટમ: બીજી તરફ NBFC પણ લોન આપવાનું જ કામ કરે છે, પરંતુ તેઓ બેંકની જેમ લોકો પાસેથી સેવિંગ કે કરંટ એકાઉન્ટમાં પૈસા જમા લઈ શકતી નથી. તેમની પાસે ડિમાન્ડ ડિપોઝિટ લેવાનો અધિકાર નથી હોતો. આ જ કારણસર NBFC પર બેંકો જેટલી કડક પાબંદીઓ હોતી નથી.

જો તમે બેંકમાં લોન લેવા જાવ છો, તો તમારી કમાણી, બેંક સ્ટેટમેન્ટ, નોકરીની સ્થિરતા અને ક્રેડિટ સ્કોર (CIBIL) ની ખૂબ જ ઝીણવટપૂર્વક તપાસ થાય છે. જો તમારો ક્રેડિટ સ્કોર થોડો પણ નબળો હશે અથવા નોકરી ફિક્સ નહીં હોય, તો બેંક તમારી લોન રિજેક્ટ કરી શકે છે.

જ્યારે NBFC આ બાબતમાં ખૂબ જ ફ્લેક્સિબલ એટલે કે છૂટછાટવાળી હોય છે. જો તમે પોતાનો નાનો ધંધો કરતા હોવ, પહેલીવાર લોન લેતા હોવ અથવા તમારો ક્રેડિટ સ્કોર થોડો ઓછો હોય, તો પણ NBFC માંથી લોન સરળતાથી પાસ થઈ જાય છે. આજકાલ ઘણા લોકો ફટાફટ લોન પાસ કરાવવા માટે NBFC નો રસ્તો અપનાવે છે.

વ્યાજ દર: ક્યાંથી લોન લેવી સસ્તી પડશે?

બેંક: સામાન્ય રીતે બેંકોના વ્યાજ દર NBFC કરતા ઓછા હોય છે. કારણ કે બેંકોને ગ્રાહકોની જમા રકમ (જેમ કે સેવિંગ્સ એકાઉન્ટના પૈસા) દ્વારા ખૂબ ઓછા ખર્ચે ફંડ મળી જાય છે.

NBFC: આ કંપનીઓને માર્કેટમાંથી મોંઘા ભાવે ફંડ ઉઠાવવું પડે છે, તેથી તેમની લોન પર વ્યાજ દર થોડો વધારે હોઈ શકે છે.

ખાસ નોંધ: લોન લેતી વખતે માત્ર વ્યાજ દર જ ન જુઓ. બંને જગ્યાએ પ્રોસેસિંગ ફી, લેટ પેમેન્ટ ફી, ફોરક્લોઝર ચાર્જ (લોન વહેલી પૂરી કરવાનો ચાર્જ) અને અન્ય છુપી શરતોની સરખામણી ચોક્કસ કરો.

પૈસાની તાત્કાલિક જરૂર હોય તો ક્યાં જવું?

જો તમને કોઈ ઇમરજન્સી આવી ગઈ છે અને તાત્કાલિક પૈસા જોઈએ છે, તો NBFC બેસ્ટ ઓપ્શન છે. 2026ની લેટેસ્ટ ટેકનોલોજી અને ડિજિટલ પ્રોસેસના કારણે NBFCમાં ગણતરીની મિનિટોમાં કે કલાકોમાં લોન અપ્રુવ થઈને પૈસા ખાતામાં જમા થઈ જાય છે. જ્યારે બેંકમાં વેરિફિકેશન અને કાગળિયાની પ્રક્રિયા લાંબી હોવાથી લોન પાસ થવામાં થોડો વધારે સમય લાગી શકે છે.

ગ્રાહકોને ક્યાં મળે છે વધારે સુવિધા?

NBFC ગ્રાહકોની જરૂરિયાત મુજબ EMI અને રિપેમેન્ટના ઓપ્શન આપે છે. એટલે કે તમે તમારી સગવડતા મુજબ હપ્તા સેટ કરી શકો છો. જ્યારે બેંકો માત્ર લોન જ નથી આપતી, પરંતુ સેવિંગ એકાઉન્ટ, ક્રેડિટ કાર્ડ અને ઇન્સ્યોરન્સ જેવી અનેક સુવિધાઓ એક જ જગ્યાએ આપે છે. તેથી લાંબા ગાળાના સંબંધો માટે લોકો બેંક પર વધુ ભરોસો કરે છે.

અંતે કયો વિકલ્પ પસંદ કરવો?

કોઈપણ જગ્યાએથી માત્ર ‘જલ્દી લોન મળે છે' તેવું વિચારીને ઉતાવળમાં નિર્ણય ન લેવો જોઈએ. તમારી લોન ભરવાની ક્ષમતા અને કુલ ખર્ચનો હિસાબ પહેલા કાઢી લેવો. જો તમારી પ્રોફાઇલ મજબૂત છે, ક્રેડિટ સ્કોર સારો છે અને તમને કોઈ ઉતાવળ નથી, તો બેંક તમારા માટે શ્રેષ્ઠ અને સસ્તો વિકલ્પ છે. પરંતુ જો તમને તાત્કાલિક પૈસાની જરૂર છે, કાગળિયાની ઝંઝટમાંથી બચવું છે અથવા બેંકમાંથી લોન મળવામાં તકલીફ પડી રહી છે, તો NBFC તમારા માટે ખૂબ જ કામમાં આવી શકે છે.

આ પણ વાંચો- આગામી સપ્તાહે શેરબજારમાં શું થશે? US-ઈરાન તણાવ, ક્રૂડ ઓઈલ અને આ 5 ફેક્ટર્સ નક્કી કરશે બજારની દિશા