FD Laddering Strategy: આ બેંકોમાં FD પર મળી રહ્યું છે 8.60% સુધીનું બમ્પર વ્યાજ! જાણો 10 લાખની FD કેવી રીતે વહેંચવી જેથી વ્યાજનું નુકસાન ન થાય | Moneycontrol Gujarati
Get App

FD Laddering Strategy: આ બેંકોમાં FD પર મળી રહ્યું છે 8.60% સુધીનું બમ્પર વ્યાજ! જાણો 10 લાખની FD કેવી રીતે વહેંચવી જેથી વ્યાજનું નુકસાન ન થાય

FD Laddering Strategy: Suryoday અને Ujjivan Small Finance Bank સિનિયર સિટિઝન્સને FD પર 8.60% સુધી વ્યાજ આપી રહી છે. જાણો 'FD લેડરિંગ' શું છે અને 10 લાખને 4 ભાગમાં કેવી રીતે રોકવા.

અપડેટેડ 01:19:34 PM Nov 16, 2026 પર
Story continues below Advertisement
5 વર્ષની FD પર સામાન્ય ગ્રાહકોને વાર્ષિક 8.25% સુધી અને સિનિયર સિટિઝન્સને 8.60% વ્યાજ આપી રહી છે.

FD Laddering Strategy: હાલમાં બેંકોમાં ફિક્સ્ડ ડિપોઝિટ (FD) પર 8.60% સુધીનું શાનદાર વ્યાજ મળી રહ્યું છે, જેના કારણે સુરક્ષિત અને નક્કી વળતર ઈચ્છતા રોકાણકારો FD તરફ આકર્ષાઈ રહ્યા છે. પરંતુ જો તમારી પાસે રોકાણ કરવા માટે 10 લાખ રૂપિયા હોય, તો બધા જ પૈસા એક જ FDમાં મૂકી દેવાથી અચાનક પૈસાની જરૂર પડે ત્યારે મુશ્કેલી ઊભી થઈ શકે છે. આવી સ્થિતિમાં 'FD લેડરિંગ' નામની રણનીતિ ખૂબ જ કામ આવે છે. આ પદ્ધતિમાં પૈસાને અલગ-અલગ પાકતી મુદત વાળી એકથી વધુ FD માં વહેંચવામાં આવે છે, જેથી ઊંચા વ્યાજની કમાણી અને હાથ પર રોકડ વચ્ચે સંતુલન જળવાઈ રહે.

હાલમાં કઈ બેંકમાં FD પર મળી રહ્યું છે સૌથી વધુ વ્યાજ?

Stable Moneyની 12 નવેમ્બરની વ્યાજ દરોની સરખામણી મુજબ, ડિપોઝિટ પર સૌથી ઊંચા વ્યાજ દરો હજુ પણ સ્મોલ ફાઇનાન્સ બેંકો જ આપી રહી છે:


Suryoday Small Finance Bank: 5 વર્ષની FD પર સામાન્ય ગ્રાહકોને વાર્ષિક 8.25% સુધી અને સિનિયર સિટિઝન્સને 8.60% વ્યાજ આપી રહી છે.

Ujjivan Small Finance Bank: પસંદગીની મુદતની FD પર સામાન્ય ગ્રાહકોને 8.10% સુધી અને સિનિયર સિટિઝન્સને 8.60% સુધી વ્યાજ ઓફર કરે છે.

Bank of Baroda: બેંક ઓફ બરોડાએ સામાન્ય થાપણદારો માટે પોતાનો સૌથી ઊંચો વ્યાજ દર 6.75% થી વધારીને 6.85% કર્યો છે. આ દર 555 દિવસની FD પર મળે છે, જેમાં સિનિયર સિટિઝન્સને 7.35% સુધી વ્યાજ મળશે.

Indian Overseas Bank: પોતાની 444 દિવસની FD પર સામાન્ય ગ્રાહકોને 6.75% અને સિનિયર સિટિઝન્સને 7.25% વ્યાજ આપી રહી છે.

આમ, 444 દિવસથી લઈને 5 વર્ષ સુધીની અલગ-અલગ મુદત પર બેંકો આકર્ષક વ્યાજ આપી રહી છે. ત્યારે રોકાણકારો સામે મોટો સવાલ એ છે કે પૂરી બચત એક જ FD માં લોક કરી દેવી કે તેને અલગ-અલગ ભાગમાં વહેંચવી?

એક જ મોટી FD કરાવવામાં ક્યાં થાય છે નુકસાન?

ધારો કે તમે પૂરા 10 લાખ રૂપિયા એક જ FD માં મૂકી દીધા. આમાં તમારા બધા પૈસા એક જ ડિપોઝિટમાં બંધાઈ જશે, એક જ વ્યાજ દર લાગુ પડશે અને મેચ્યોરિટીની તારીખ પણ એક જ રહેશે.

વચ્ચેથી પૈસા ઉપાડવાની મુશ્કેલી: જો મુદત પૂરી થતાં પહેલાં તમારે માત્ર 2 લાખ રૂપિયાની જરૂર પડી, તો બેંકના નિયમો મુજબ કદાચ તમારે પૂરી 10 લાખની મોટી FD તોડાવવી પડે અને તેના પર પેનલ્ટી પણ લાગી શકે છે.

ફરીથી રોકાણ કરવાનું જોખમ: તમારા બધા જ પૈસા એક જ દિવસે પાકશે. જો તે સમયે બજારમાં વ્યાજ દરો ઘટી ગયા હશે, તો તમારે પૂરી રકમ નીચા વ્યાજ દરે જ ફરીથી રોકવી પડશે.

‘FD લેડરિંગ' શું છે અને તેમાં પૈસા કેવી રીતે વહેંચાય છે?

FD લેડરિંગને એક સીડીની જેમ સમજી શકાય, જેમાં દરેક પગથિયું એક અલગ FD છે અને દરેક FD ની પાકતી મુદત (મેચ્યોરિટી) અલગ-અલગ તારીખે આવે છે. તેનો સૌથી મોટો ફાયદો એ છે કે થોડા-થોડા સમયે તમારા હાથમાં પૈસા આવતા રહે છે. અચાનક પૈસાની જરૂર પડે, તો માત્ર એક નાની FD તોડીને કામ ચલાવી શકાય છે અને બાકીની FD પર પૂરું વ્યાજ મળતું રહે છે.

10 લાખને 4 ભાગમાં કેવી રીતે વહેંચી શકાય?

ઉદાહરણ તરીકે, જો તમારી પાસે 10 લાખ રૂપિયા છે, તો તમે તેને 2.5-2.5 લાખ રૂપિયાની 4 અલગ-અલગ FD માં નીચે મુજબ વહેંચી શકો છો:

પ્રથમ FD (2.5 લાખ - અંદાજે 444 દિવસ): આ ટૂંકા ગાળાની FD રહેશે, જે નજીકના ભવિષ્યમાં પૈસાની જરૂર પડે ત્યારે કામ આવશે.

બીજી FD (2.5 લાખ - અંદાજે 555 દિવસ): આ મધ્યમ ગાળાના ખર્ચાઓને પહોંચી વળવા માટે રાખી શકાય.

ત્રીજી FD (2.5 લાખ - 3 વર્ષ માટે): આ લાંબા ગાળાની બચત માટે ઉપયોગી થશે.

ચોથી FD (2.5 લાખ - 5 વર્ષ માટે): આનાથી લાંબા ગાળામાં મળતા સૌથી ઊંચા વ્યાજ દર જેમ કે 8.25% થી 8.60%નો લાભ લોક કરી શકાશે.

મેચ્યોરિટી પર શું કરવું અને કોના માટે કઈ રીત શ્રેષ્ઠ?

જેમ-જેમ દરેક FD મેચ્યોર થતી જાય, તેમ રોકાણકાર પાસે બે વિકલ્પ રહે છે: કાં તો તે પૈસાનો પોતાના કોઈ નિર્ધારિત ખર્ચ માટે ઉપયોગ કરી લે, અથવા તો તે સમયે ચાલી રહેલા નવા વ્યાજ દર પર તેને ફરીથી રોકી દે. આનાથી તમે કોઈ એક જ તારીખ કે એક જ વ્યાજ દરના ભરોસે રહેતા નથી.

ટૂંકમાં કહીએ તો, જે રોકાણકારોને પોતાના પૈસાના વપરાશમાં Flexibility જોઈએ છે તેમના માટે FD લેડરિંગ શ્રેષ્ઠ વિકલ્પ છે. જ્યારે જેમના રોકાણનો સમયગાળો અને લક્ષ્ય પહેલાંથી જ નક્કી છે, તેમના માટે એક મોટી FD યોગ્ય રહી શકે છે.

આ પણ વાંચો- ઉત્તર પ્રદેશમાં ગઠબંધન હેઠળ કોંગ્રેસને કેટલી બેઠકો આપશે સમાજવાદી પાર્ટી? અખિલેશ યાદવે આપ્યો મોટો સંકેત

(નોંધ: આ ઉદાહરણ માત્ર સમજણ માટે છે, રોકાણ કરતા પહેલા તમારી જરૂરિયાત અને બેંકની શરતો ચોક્કસ તપાસો.)

MoneyControl News

MoneyControl News

First Published: Nov 16, 2026 1:19 PM

પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ,  Stock Tips,  સમાચાર, પર્સનલ ફાઇનાન્સ  અને બિઝનેસ  સંબંધિત સમાચાર વાંચો. દૈનિક બજાર અપડેટ્સ માટે Moneycontrol App  ડાઉનલોડ કરો.