ગૃહિણીઓનું બજેટ ખોરવાયું: લીંબુ 250 પાર, ડુંગળી-આદુના ભાવ આસમાને, જાણો ખાદ્ય તેલ સસ્તું થશે કે નહીં?

Vegetable prices today: હાલ તહેવારોની સિઝન ચાલી રહી છે. ભલે સરકાર સામાન્ય લોકોને મોંઘવારીમાંથી રાહત આપવા માટે અલગ-અલગ પગલાં ભરી રહી હોય, પરંતુ શાકભાજીની સતત વધતી કિંમતોએ સામાન્ય માણસના રસોડાનું બજેટ સંપૂર્ણપણે વિખેરી નાખ્યું છે. બજારમાં અત્યારે શાકભાજીના ભાવ કેમ અચાનક વધી રહ્યા છે તેનું કોઈ ચોક્કસ કારણ જાણવું મુશ્કેલ છે. પરંતુ બજારનો હાલનો ટ્રેન્ડ જોતા ડુંગળી, લીંબુ અને આદુના ભાવમાં હજુ પણ આગામી દિવસોમાં વધારો થવાની પૂરી શક્યતા દેખાઈ રહી છે.

દેશની મંડીઓમાં શું છે શાકભાજીનો લેટેસ્ટ ભાવ?

દેશના અલગ-અલગ ભાગોની મંડીઓમાં શાકભાજીના ભાવ ઝડપથી ઊંચકાયા છે. જો હરિયાણાની હથીન શાકભાજી મંડીની જ વાત કરીએ તો રોજિંદા વપરાશમાં લેવાતા શાકભાજીના ભાવમાં મોટો ઉછાળો જોવા મળ્યો છે. સૌથી વધુ પરેશાની ડુંગળી, લીંબુ અને આદુએ વધારી છે.

* ડુંગળી: 70 થી 80 રૂપિયા પ્રતિ કિલો

* આદુ: 125 રૂપિયા પ્રતિ કિલો

* ફ્લાવર (ફૂલગોભી): 60 થી 65 રૂપિયા પ્રતિ કિલો

* ટામેટા: 50 થી 55 રૂપિયા પ્રતિ કિલો

* તુરિયા: 40 થી 50 રૂપિયા પ્રતિ કિલો

* કાકડી અને ગાજર: 60 રૂપિયા પ્રતિ કિલો

* અરબી અને કોળું: 40 રૂપિયા પ્રતિ કિલો

જોકે, આ બધી મોંઘવારી વચ્ચે ગૃહિણીઓ માટે થોડી રાહતની વાત એ છે કે બટાકાના ભાવ હજુ પણ કંટ્રોલમાં છે. બજારમાં બટાકા આશરે 25 રૂપિયા પ્રતિ કિલોના ભાવે આસાનીથી મળી રહ્યા છે.

શું ખાદ્ય તેલના ભાવ ઘટશે?

એક તરફ શાકભાજીના ભાવ રડાવી રહ્યા છે, ત્યારે બીજી તરફ સરકાર તરફથી ખાદ્ય તેલ મામલે રાહતના સમાચાર છે. સરકારે ખાદ્ય તેલ કંપનીઓને સ્પષ્ટ સૂચના આપી છે કે આયાત ડ્યૂટીમાં જે ઘટાડો કરવામાં આવ્યો છે, તેનો સીધો અને પૂરેપૂરો લાભ ગ્રાહકોને મળવો જોઈએ.

સરકારે ડ્યૂટીમાં કેટલો ઘટાડો કર્યો?

કાચા સૂર્યમુખી તેલ પર બેઝિક કસ્ટમ ડ્યૂટી (BCD) 10 ટકાથી ઘટાડીને શૂન્ય કરી દેવામાં આવી છે. રિફાઇન્ડ સૂર્યમુખી તેલ પર ડ્યૂટી 32.5 ટકાથી ઘટાડીને 22.5 ટકા કરાઈ છે.

કાચા સોયાબીન અને પામ તેલ પર ડ્યૂટી 10 ટકાથી ઘટાડીને 5 ટકા કરી દેવાઈ છે. રિફાઇન્ડ સોયાબીન અને પામ તેલ પર આ ડ્યૂટી 32.5 ટકાથી ઘટાડીને 27.5 ટકા કરવામાં આવી છે.

MRPમાં તાત્કાલિક ઘટાડો કરવા આદેશ

સંબંધિત મંત્રાલયે ખાદ્ય તેલ બનાવતી કંપનીઓના સંગઠનોને કડક આદેશ આપ્યો છે કે, આયાત ખર્ચમાં થયેલા ઘટાડાની ગણતરી કરીને કોઈપણ જાતના વિલંબ વિના ડીલર પ્રાઇસ અને મહત્તમ છૂટક કિંમતમાં ફેરફાર કરવામાં આવે.

સરકારના આ નિર્ણયનો મુખ્ય ઉદ્દેશ્ય સ્થાનિક બજારમાં ખાદ્ય તેલના ભાવને કાબૂમાં રાખવાનો છે. આંતરરાષ્ટ્રીય બજારમાં આવેલી તેજીના કારણે જે મોંઘવારી વધી છે, તેમાંથી દેશના ગ્રાહકોને બચાવવા આ પગલું લેવાયું છે. નોંધનીય છે કે, દેશના સ્થાનિક રિફાઇનિંગ ઉદ્યોગને પ્રોત્સાહન મળે તે હેતુથી સરકારે જાણીજોઈને કાચા અને રિફાઇન્ડ તેલ વચ્ચે ડ્યૂટીનો તફાવત જાળવી રાખ્યો છે, જેથી રિફાઇન્ડ તેલની આયાત ઘટે અને સ્થાનિક ઉદ્યોગોને વેગ મળે.

આ પણ વાંચો - SEBIનો મોટો નિર્ણય: 10 લાખથી ઓછા દંડવાળા કેસોનું થશે 'ફાસ્ટ-ટ્રેક સેટલમેન્ટ', જાણો નવા નિયમો