ITR ભરનારાઓ સાવધાન! નકલી દાન બતાવી ટેક્સ બચાવ્યો? હવે ઇન્કમ ટેક્સ વિભાગ મોકલી રહ્યું છે નોટિસ

ITR Fake Deduction: જો તમે પણ ઇન્કમ ટેક્સ રિટર્ન (ITR) ફાઇલ કરતી વખતે ટેક્સ બચાવવા માટે નકલી દાન અથવા ખોટી કપાતનો દાવો કર્યો હોય, તો સાવધાન થઈ જાઓ. આવકવેરા વિભાગ હવે આવા કરદાતાઓ પર કડક કાર્યવાહી કરવાના મૂડમાં છે અને તેણે શંકાસ્પદ દાવા કરનારા લોકોને SMS અને ઇમેઇલ મોકલવાનું શરૂ કરી દીધું છે.

આવકવેરા વિભાગે કરદાતાઓને તેમની ભૂલ સુધારવા માટે એક તક પણ આપી છે અને તેમને તેમના ITRને અપડેટ કરવા માટે અપીલ કરી છે.

શા માટે વિભાગે આ પગલું ભર્યું?

નાણા મંત્રાલયે આ અંગે માહિતી આપતા જણાવ્યું કે, સેન્ટ્રલ બોર્ડ ઓફ ડાયરેક્ટ ટેક્સિસ (CBDT) દ્વારા કરવામાં આવેલા ડેટા વિશ્લેષણમાં એક મોટી ગરબડ સામે આવી છે. વિશ્લેષણમાં જાણવા મળ્યું કે મોટી સંખ્યામાં કરદાતાઓએ નોંધાયેલ પરંતુ બિન-માન્યતા પ્રાપ્ત રાજકીય પક્ષો (RUPP) અથવા શંકાસ્પદ ધર્માદા સંસ્થાઓને દાન આપ્યાના ખોટા દાવા કર્યા હતા. આ ખોટા દાવાઓનો મુખ્ય હેતુ પોતાની ટેક્સની જવાબદારી ઘટાડવાનો અને સરકાર પાસેથી ખોટું રિફંડ મેળવવાનો હતો.

કરદાતાઓને ભૂલ સુધારવાની તક

નાણા મંત્રાલયના નિવેદન મુજબ, "કરદાતાઓના હિતોને ધ્યાનમાં રાખીને, એક ખાસ અભિયાન શરૂ કરવામાં આવ્યું છે. આ અભિયાન કરદાતાઓને તેમના ITR અપડેટ કરવાની અને કોઈપણ ખોટા દાવાને પાછો ખેંચવાની તક આપે છે." આ માટે વિભાગે તારીખ 12 ડિસેમ્બર, 2025 થી કરદાતાઓના રજિસ્ટર્ડ મોબાઇલ નંબર અને ઇમેઇલ આઈડી પર સૂચનાઓ મોકલવાનું શરૂ કરી દીધું છે.

ઘણા લોકોએ પોતાની ભૂલ સુધારી

વિભાગની આ પહેલની સકારાત્મક અસર પણ જોવા મળી રહી છે. મોટી સંખ્યામાં કરદાતાઓએ ચાલુ આકારણી વર્ષ (AY 2025-26) માટેના તેમના રિટર્નમાં સુધારો કર્યો છે અને ભૂતકાળના વર્ષો માટે પણ અપડેટેડ રિટર્ન ફાઇલ કરીને પોતાના ખોટા દાવાઓ જાતે જ પાછા ખેંચી લીધા છે. જો તમે પણ આવી કોઈ ભૂલ કરી હોય, તો તરત જ તમારું ITR અપડેટ કરી લેવું હિતાવહ છે.

આ પણ વાંચો- બજારનું ભવિષ્ય: આ અઠવાડિયે સોનું-ચાંદી કઈ દિશામાં જશે? US GDP અને જોબ ડેટા પર સૌની નજર