LICમાં રોકાણ કરતા પહેલા સમજો ગણિત: કઈ પોલિસીમાં મળશે ગેરંટીડ રિટર્ન અને કઈ પોલિસીમાં બોનસ?

LIC policy: ભારતીય જીવન વીમા નિગમની પોલિસીઓમાં લોકો આંખ બંધ કરીને રોકાણ કરે છે. પણ શું તમને ખબર છે કે LIC ની દરેક પોલિસીમાં નફો આપવાની રીત એકસરખી નથી હોતી? અમુક પોલિસીમાં તમને ફિક્સ એટલે કે ગેરંટીડ રિટર્ન મળે છે, જ્યારે અમુકમાં કંપનીના બોનસ પર આધાર રાખવો પડે છે. જો તમે પણ LIC માં પૈસા રોકવાનું વિચારી રહ્યા છો, તો પહેલા આ ગણિત સમજી લેવું ખૂબ જ જરૂરી છે.

જીવન ઉત્સવમાં મળે છે ગેરંટીડ રિટર્ન

LIC ની 'જીવન ઉત્સવ' એક નોન-લિંક્ડ અને નોન-પાર્ટિસિપેટિંગ પોલિસી છે. આનો સીધો અર્થ એ છે કે આમાં તમને બોનસની રાહ જોવી પડતી નથી, પણ પહેલાથી નક્કી કરેલો ફાયદો મળે છે. આ પોલિસીમાં તમે જ્યાં સુધી પ્રીમિયમ ભરો છો, ત્યાં સુધી દર વર્ષે બેઝિક સમ એશ્યોર્ડના દર 1000 રૂપિયા પર 40 રૂપિયાનું ગેરંટીડ રિટર્ન ઉમેરાય છે. આમાં તમારી પસંદગી મુજબ રેગ્યુલર અથવા ફ્લેક્સી ઇનકમનો વિકલ્પ પણ મળે છે.

આ ઉપરાંત જાન્યુઆરી 2026 ની આસપાસ શરૂ થનારી જીવન ઉત્સવ સિંગલ પ્રીમિયમ પોલિસીમાં પણ આ જ રીતે દર 1000 રૂપિયા પર 40 રૂપિયા ગેરંટીડ એડિશન મળવાની જોગવાઈ છે. આમાં નફો બોનસ પર આધારિત હોતો નથી.

જીવન ઉત્સવની સરખામણીમાં, 'ન્યૂ જીવન આનંદ' એક એન્ડોમેન્ટ પોલિસી છે, જેમાં વળતરનો આધાર બોનસ પર રહેલો છે. આ પોલિસીના નિયમો મુજબ, તેમાં સિમ્પલ રિવર્ઝનરી બોનસ અને ફાઈનલ એડિશનલ બોનસ મળે છે. એટલે કે, તમને બેઝિક ફાયદા સિવાય કંપની દ્વારા જાહેર થતા બોનસનો લાભ મળે છે. પરંતુ, ભવિષ્યમાં મળનારા આ બોનસને પહેલાથી જ 'ગેરંટીડ રિટર્ન' માની લેવાની ભૂલ ક્યારેય ન કરવી જોઈએ. આમાં બોનસ મુજબ વધારાનો ફાયદો મળી શકે છે.

જીવન લાભ પણ છે બોનસ આધારિત પોલિસી

LICની 'જીવન લાભ' પ્લાન નંબર 736 પણ એક જાણીતી એન્ડોમેન્ટ પોલિસી છે. આ પણ એક સહભાગી યોજના છે, એટલે કે આમાં પણ કંપની દર વર્ષે જે બોનસ જાહેર કરે તેના આધારે તમારો નફો વધી શકે છે. તેથી તેને જીવન ઉત્સવ જેવી ગેરંટીડ એડિશન વાળી પોલિસીથી અલગ સમજવી ખૂબ જ જરૂરી છે.

પોલિસી ખરીદતા પહેલા આ વાતોનું ખાસ ધ્યાન રાખો

સરળ ભાષામાં કહીએ તો, નોન-પાર્ટિસિપેટિંગ પોલિસી જેમ કે જીવન ઉત્સવમાં રિટર્ન પહેલાથી જ નક્કી કરેલા નિયમો મુજબ મળે છે. જ્યારે પાર્ટિસિપેટિંગ પોલિસી જેમ કે ન્યૂ જીવન આનંદ, જીવન લાભમાં નફો કંપનીના બોનસ પર આધાર રાખે છે. ઘણી પોલિસી એવી પણ હોય છે જેમાં અમુક ભાગ ગેરંટીડ હોય અને અમુક ભાગ બોનસ પર આધારિત હોય. તેથી, જ્યારે પણ તમે પોલિસી લો ત્યારે માત્ર એજન્ટ દ્વારા બતાવવામાં આવેલી 'અંદાજિત મેચ્યોરિટી રકમ' જોઈને નિર્ણય ન લો. પોલિસીના દસ્તાવેજો ધ્યાનથી વાંચો અને સમજો કે કેટલી રકમની ગેરંટી છે અને કયો ફાયદો બોનસ પર નિર્ભર છે. આ સાથે પ્રીમિયમ, વીમા કવર, સમયગાળો, પોલિસી સરેન્ડર કરવાના નિયમો અને ડેથ બેનિફિટને પણ બરાબર સમજી લો.

ડિસ્ક્લેમર: આ આર્ટિકલમાં આપવામાં આવેલી માહિતી માત્ર સામાન્ય જાણકારી માટે છે. કોઈપણ નાણાકીય રોકાણ કે પોલિસી ખરીદતા પહેલા તમારા આર્થિક સલાહકાર અથવા નિષ્ણાતની મદદ ચોક્કસ લો.

આ પણ વાંચો-Flexi Cap Fund: માત્ર 1 વર્ષનું રિટર્ન જોઈને ફ્લેક્સી કેપ ફંડ પસંદ કરવાની ભૂલ ન કરતા, રોકાણ પહેલા આ ખાસ આંકડા જરૂર જુઓ