NHAIનો મોટો નિર્ણય: નવી કાર માટે FASTagના નિયમો બદલાયા, 1 ફેબ્રુઆરી 2026થી KYVનું ટેન્શન ખતમ

NHAI FASTag Rules: જો તમારી પાસે પોતાની કાર છે અને તમે હાઈવે પર મુસાફરી કરો છો, તો આ સમાચાર તમારા ચહેરા પર સ્મિત લાવી દેશે. નેશનલ હાઈવે ઓથોરિટી ઓફ ઈન્ડિયા (NHAI) એ વાહન ચાલકોની સુવિધાને ધ્યાનમાં રાખીને એક ખૂબ જ મહત્વનો નિર્ણય લીધો છે. 1 ફેબ્રુઆરી 2026 થી નવી કાર, જીપ અને વાન માટે FASTag ઈશ્યુ કરવાની પ્રક્રિયામાં મોટો ફેરફાર કરવામાં આવ્યો છે.

NHAI એ જાહેરાત કરી છે કે હવે નવી કાર માટે FASTag લેતી વખતે Know Your Vehicle (KYV) પ્રોસેસમાંથી પસાર થવું પડશે નહીં. આ નિર્ણયથી ટોલ પ્લાઝા પર લાંબી લાઈનો અને દસ્તાવેજોની ચકાસણીની માથાકૂટમાંથી મુક્તિ મળશે.

નવા FASTag માટે શું બદલાશે?

અત્યાર સુધી FASTag લીધા પછી તેને એક્ટિવેટ કરાવવું અને KYV પ્રોસેસ પૂરી કરવી એ ઘણીવાર માથાનો દુખાવો બની જતું હતું. ઘણીવાર એક્ટિવેશન પછી પણ ફોલો-અપ લેવું પડતું હતું. પરંતુ હવે 1 ફેબ્રુઆરી 2026 પછી જો તમે નવી કાર માટે FASTag લેશો, તો KYV વેલિડેશન કરાવવાની જરૂર નહીં રહે. હવે બેંકો FASTag ઈશ્યુ કરતા પહેલા જ વાહનના ડેટાબેઝમાંથી વિગતો ચેક કરી લેશે. જો વિગતો સાચી હશે, તો જ ટેગ એક્ટિવેટ થશે. જો ડેટાબેઝમાં વાહનની માહિતી નહીં મળે, તો રજીસ્ટ્રેશન સર્ટિફિકેટ (RC) દ્વારા વેરીફાય કરવામાં આવશે. તમે ઓનલાઇન FASTag ખરીદો તો પણ આ જ નિયમ લાગુ પડશે. બેંકોએ જ આ તમામ જવાબદારી લેવાની રહેશે, ગ્રાહકે પરેશાન થવું નહીં પડે.

જે લોકો પાસે પહેલાથી જ કાર છે અને FASTag લગાવેલું છે, તેમના મનમાં સવાલ હશે કે અમારે શું કરવાનું? તો તમને જણાવી દઈએ કે તમારા ચાલુ FASTag પર પણ હવે રૂટીન KYV કરાવવાની જરૂર નથી. જ્યાં સુધી કોઈ ફરિયાદ ન હોય, ત્યાં સુધી કોઈ પણ પ્રકારનું ચેકિંગ કરવામાં નહીં આવે. હા, જો તમારું FASTag યોગ્ય રીતે કામ ન કરતું હોય, ખોટી રીતે ઈશ્યુ થયું હોય અથવા તેના દુરુપયોગની ફરિયાદ હોય, તો જ KYV પ્રક્રિયા હાથ ધરવામાં આવશે.

ધ્યાન રાખવા જેવી બાબત

ભલે KYV પ્રોસેસ બંધ થઈ રહી છે, પણ વાહન માલિક તરીકે તમારે એક વાતનું ધ્યાન ખાસ રાખવું પડશે. તમારી કારનું રજીસ્ટ્રેશન અને અન્ય દસ્તાવેજો (Documents) એકદમ સાચા હોવા જોઈએ. કારણ કે હવે બધું ડિજિટલ વેરિફિકેશન પર નિર્ભર છે. જો દસ્તાવેજોમાં કોઈ ભૂલ હશે, તો FASTag મળવામાં વાર લાગી શકે છે.

NHAI નો આ નિર્ણય લાખો ડ્રાઇવરો અને કાર માલિકો માટે સમય અને ઇંધણ બચાવનારો સાબિત થશે. ટોલ પ્લાઝા પર ડિજિટલ પેમેન્ટ પહેલાથી જ 98% સુધી પહોંચી ગયું છે, અને આ નવો નિયમ ટ્રાફિકને વધુ સ્મૂધ બનાવશે. બસ, મુસાફરી કરતી વખતે તમારા FASTag માં બેલેન્સ ચેક કરવાનું ભૂલતા નહીં, જેથી ડબલ ચાર્જ ભરવો ન પડે.

આ પણ વાંચો-Teslaનો જાદુ ઓસરી ગયો? આ કંપનીએ તોડ્યો રેકોર્ડ! 1 વર્ષમાં વેચી મારી 22 લાખથી વધુ કાર