PM ઈન્ટર્નશિપ સ્કીમમાં થશે મોટા ફેરફાર: સમયગાળો અને વય મર્યાદા ઘટશે, જાણો યુવાનો પર શું અસર પડશે

PM Internship Scheme: દેશના યુવાનોને કોર્પોરેટ જગત સાથે જોડવા માટે શરૂ કરવામાં આવેલી ‘પ્રધાનમંત્રી ઈન્ટર્નશિપ યોજના' (PM Internship Scheme) ના માળખામાં ટૂંક સમયમાં મોટા ફેરફારો જોવા મળી શકે છે. યુવાનોનો રસ વધારવા અને આ યોજનાને વધુ પ્રેક્ટિકલ તેમજ આકર્ષક બનાવવા માટે સરકાર યોજનાના સમયગાળા અને વય મર્યાદામાં ઘટાડો કરવા પર ગંભીરતાથી વિચાર કરી રહી છે. શરૂઆતના બે પાયલોટ તબક્કામાં જોવા મળ્યું કે યુવાનોની ભાગીદારી અપેક્ષા મુજબની નહોતી, જેના કારણે સરકારે હવે આ યોજનામાં મોટા ફેરફારો કરવાની કવાયત હાથ ધરી છે.

હાલમાં યોજનાના નિયમો શું છે?

PM ઈન્ટર્નશિપ સ્કીમનો મુખ્ય ઉદ્દેશ્ય દેશની ટોચની 500 કંપનીઓમાં યુવાનોને 12 મહિનાની પ્રેક્ટિકલ ટ્રેનિંગ આપવાનો છે.

વય મર્યાદા: હાલમાં 21 થી 24 વર્ષના યુવાનો આ માટે અરજી કરી શકે છે.

અરજી પ્રક્રિયા: આ યોજના માટે સત્તાવાર પોર્ટલ દ્વારા ઓનલાઇન અરજી કરવાની હોય છે.

ફેરફાર કરવાની જરૂર કેમ પડી?

શરૂઆતના બે પાયલોટ પ્રોજેક્ટના આંકડા થોડા નિરાશાજનક રહ્યા હતા. આંકડા મુજબ, મોટી સંખ્યામાં યુવાનોએ કંપનીઓની ઓફર સ્વીકારી જ નહીં અથવા તો અધવચ્ચે જ ઈન્ટર્નશિપ છોડી દીધી હતી. કુલ મળેલા ઓફર્સમાંથી માત્ર 33% યુવાનોએ જ ઓફર સ્વીકારી હતી અને તેમાંથી ખરેખર ઈન્ટર્નશિપ જોઈન કરનારાઓનો આંકડો માત્ર 6% જ રહ્યો.

નિષ્ણાતોના મતે, યુવાનોનો રસ ઓછો થવા પાછળ આ મુખ્ય કારણો જવાબદાર હતા:

* ઈન્ટર્નશિપનો લાંબો સમયગાળો.

* બીજે શહેરમાં રહેવા જવાના ખર્ચની સરખામણીમાં ઓછું સ્ટાઈપેન્ડ.

* ઈન્ટર્નશિપ લોકેશનને લગતી સમસ્યાઓ.

* ઈન્ટર્નશિપ પૂરી થયા પછી ભવિષ્યની નોકરી અંગે અસ્પષ્ટતા.

આ તમામ પડકારોને ધ્યાનમાં રાખીને, કોર્પોરેટ બાબતોના મંત્રાલયે 'વ્યય નાણા સમિતિ' સમક્ષ સૂચિત ફેરફારોની એક નોટ રજૂ કરી છે. સરકાર હવે આ નવા સુધારા સાથે અંદાજે 1 લાખ ઈન્ટર્ન્સ પર નવો પાયલોટ પ્રોજેક્ટ અજમાવવા માંગે છે.

રાજ્યો અને કંપનીઓનો કેવો રહ્યો પ્રતિસાદ?

આ સ્કીમમાં રાજ્યોની વાત કરીએ તો, પ્રથમ તબક્કામાં ઉત્તર પ્રદેશ સૌથી આગળ રહ્યું હતું, જ્યારે બીજા તબક્કામાં આંધ્ર પ્રદેશે સૌથી વધુ ભાગીદારી નોંધાવી હતી. સેંકડો કંપનીઓએ આ સ્કીમમાં ભાગ લીધો હતો, જેમાં રિલાયન્સ ઇન્ડસ્ટ્રીઝ લિમિટેડ (RIL), મારુતિ સુઝુકી ઇન્ડિયા લિમિટેડ અને ઇન્ડિયન ઓઇલ કોર્પોરેશન લિમિટેડ (IOCL) જેવી દેશની દિગ્ગજ કંપનીઓનો સમાવેશ થાય છે.

બજેટમાં થયો ઘટાડો અને આગળની રણનીતિ

સરકારે નાણાકીય વર્ષ 2025-26 માં આ સ્કીમ પાછળ 10,800 કરોડ રૂપિયાનું બજેટ ફાળવ્યું હતું. જોકે, યુવાનોના ધીમા પ્રતિસાદને કારણે તેમાંથી બહુ ઓછી રકમ વપરાઈ શકી. આ પરિસ્થિતિને જોતા, હવે આગામી નાણાકીય વર્ષ 2026-27 માટે આ યોજનાનું બજેટ ઘટાડીને 4,788 કરોડ રૂપિયા કરી દેવામાં આવ્યું છે.

ટૂંક સમયમાં જ સંબંધિત મંત્રાલય આ નવા અને સુધારેલા પ્રસ્તાવને અંતિમ મંજૂરી માટે કેબિનેટ સમક્ષ રજૂ કરશે. જો આ સુધારા અમલમાં આવશે, તો ચોક્કસથી વધુને વધુ યુવાનો કોર્પોરેટ સેક્ટરમાં પ્રેક્ટિકલ જ્ઞાન મેળવવા આકર્ષાશે.

આ પણ વાંચો - નોકરિયાત વર્ગ માટે મોટા સમાચાર! FY26માં પણ EPFO જાળવી શકે છે 8.25% વ્યાજ દર, જાણો તમારા PF ફંડ પર શું થશે અસર?