બેસ્ટ ક્રેડિટ સ્કોર હોવા છતાં ક્રેડિટ કાર્ડ કેમ થાય છે રિજેક્ટ? અહીં સમજો કારણો

શું તમે જાણો છો કે ઉત્તમ ક્રેડિટ સ્કોર હોવા છતાં પણ ક્રેડિટ કાર્ડની અરજી રિજેક્ટ થઈ શકે છે? જો તમારી અરજીમાં નાની-નાની ભૂલો હોય તો પણ બેન્ક તેને તાત્કાલિક નકારી શકે છે. પર્સનલ વિગતોમાં ભૂલો, આવકના ખોટા આંકડા અથવા સરનામાંમાં અસંગતતા તમારી તકોને નુકસાન પહોંચાડી શકે છે. ચાલો, આવી સમસ્યાઓનાં કારણો અને તેનાથી બચવાની રીતો વિશે વિગતે જાણીએ.

ક્રેડિટ સ્કોર સારો હોવા છતાં રિજેક્શનનાં કારણો

આવકમાં વિસંગતતા

બેન્કો ક્રેડિટ કાર્ડની અરજીની સમીક્ષા કરતી વખતે આવકની સ્થિરતા પર ખાસ ધ્યાન આપે છે. સ્થિર આવક એ દર્શાવે છે કે તમે ક્રેડિટનું જવાબદારીપૂર્વક સંચાલન કરી શકો છો. જો તમારી આવક અનિયમિત હશે, તો બેન્કને તમારી નિયમિત પેમેન્ટની ક્ષમતા પર શંકા થઈ શકે છે, જે ક્રેડિટ કાર્ડ રિજેક્ટ થવાનું મુખ્ય કારણ બની શકે છે.

વધુ પડતી લોનની જવાબદારી

જો તમારી પાસે પહેલેથી જ ઘણી લોન હશે, તો ભલે તમારો ક્રેડિટ સ્કોર સારો હોય, બેન્કની ચિંતા વધી શકે છે. તમે સમયસર પેમેન્ટ કરતા હોવ, પરંતુ તમારી આવકની સરખામણીમાં વધુ લોન હોવાને કારણે બેન્ક તમારી અરજી નકારી શકે છે. આ તમારી નવી ક્રેડિટ મેળવવાની તકોને અસર કરે છે.

રોજગારમાં અસ્થિરતા

વારંવાર નોકરી બદલવી અથવા રોજગારમાં ગેપ હોવો ક્રેડિટ કાર્ડ રિજેક્ટ થવાનું જોખમ વધારે છે. બેન્કો સ્થિર નોકરી ધરાવતા અરજદારોને પ્રાથમિકતા આપે છે, કારણ કે તે આર્થિક વિશ્વસનીયતા અને સ્થિર આવકનો સંકેત આપે છે. ટાટા કેપિટલના જણાવ્યા મુજબ, મોટાભાગની બેન્કો ઓછામાં ઓછા છ મહિના સુધી વર્તમાન નોકરીમાં સતત કામ કરવાની અપેક્ષા રાખે છે.

બહુ જગ્યાએ અરજી કરવી

ટૂંકા સમયમાં ઘણી જગ્યાએ ક્રેડિટ કાર્ડ માટે અરજી કરવી નુકસાનકારક બની શકે છે. દરેક અરજી તમારી ક્રેડિટ રિપોર્ટમાં હાર્ડ ઇન્ક્વાયરી તરીકે નોંધાય છે. બેન્કો આને આર્થિક સંકટના સંકેત તરીકે જુએ છે, જે ક્રેડિટ કાર્ડ રિજેક્ટ થવાનું એક સામાન્ય કારણ છે. બહુવિધ અરજીઓ એવું દર્શાવે છે કે તમે હાલના ક્રેડિટને સંભાળવામાં મુશ્કેલી અનુભવી રહ્યા છો.

અરજીમાં ભૂલો

ક્રેડિટ કાર્ડની અરજીમાં નાની-નાની ભૂલો પણ તેને રિજેક્ટ કરાવી શકે છે. પર્સનલ વિગતોમાં ભૂલ, આવકના ખોટા આંકડા અથવા સરનામું ન મળતું હોવું તમારી તકોને નુકસાન પહોંચાડે છે. આથી, અરજી સબમિટ કરતા પહેલાં બધું બે વાર ચેક કરવું જરૂરી છે.

અધૂરા ડોક્યુમેન્ટ્સ

જો તમારા KYC ડોક્યુમેન્ટ્સ અધૂરા હશે, તો ક્રેડિટ કાર્ડની અરજી રદ થઈ શકે છે. ખાતરી કરો કે તમારા ઓળખ, સરનામું અને આવકના ડોક્યુમેન્ટ્સ અદ્યતન, પૂર્ણ અને સચોટ છે. અધૂરા કે જૂના ડોક્યુમેન્ટ્સના કારણે ભલે તમારો ક્રેડિટ સ્કોર સારો હોય, અરજી રિજેક્ટ થઈ શકે છે.

પેમેન્ટમાં વિલંબનો ઇતિહાસ

લોન કે ક્રેડિટ કાર્ડની પેમેન્ટનો ઇતિહાસ તમારી ક્રેડિટ યોગ્યતાને મોટી અસર કરે છે. જો તમારો એકંદર ક્રેડિટ સ્કોર સારો હોય, પરંતુ EMIની પેમેન્ટમાં વિલંબ થયો હોય, તો બેન્કો માટે આ ચિંતાનો વિષય બની શકે છે. આથી, તમામ આર્થિક જવાબદારીઓની સમયસર પેમેન્ટ કરવી જરૂરી છે.

વારંવાર સરનામું બદલવું

વારંવાર રહેઠાણનું સરનામું બદલવું પણ ક્રેડિટ કાર્ડ રિજેક્ટ થવાનું કારણ બની શકે છે. બેન્કો આને અનિશ્ચિતતાના સંકેત તરીકે જુએ છે, જે અરજી નકારવાનું એક મુખ્ય કારણ હોઈ શકે છે.

આ ભૂલો ટાળવા શું કરવું?

અરજી ચકાસો: અરજી ભરતા પહેલાં નામ, સરનામું, આવક અને અન્ય વિગતો બે વાર ચેક કરો.

ડોક્યુમેન્ટ્સ તૈયાર રાખો: ઓળખ, સરનામું અને આવકના પુરાવા અદ્યતન અને સચોટ હોવા જોઈએ.

એકસાથે બહુ અરજી ન કરો: ટૂંકા સમયમાં ઘણી બેન્કોમાં અરજી કરવાનું ટાળો.

સ્થિર આવક દર્શાવો: નિયમિત અને સ્થિર આવકનો પુરાવો આપો.

સમયસર પેમેન્ટ: લોન અને EMIની પેમેન્ટ હંમેશાં સમયસર કરો.

નોકરીમાં સ્થિરતા: ઓછામાં ઓછા 6 મહિનાનો નોકરીનો રેકોર્ડ રજૂ કરો.

આ બાબતોનું ધ્યાન રાખીને તમે ક્રેડિટ કાર્ડ મેળવવાની તકો વધારી શકો છો અને રિજેક્શનની સમસ્યાથી બચી શકો છો.

આ પણ વાંચો-Wipro Q4 Results: માર્ચ ક્વાર્ટરનો નફો 26% વધ્યો, 1% વધી આવક