મહારાષ્ટ્રમાં મહાયુતિ જીતની બાદ બ્રોકરેજ રહ્યા બુલિશ, જાણો આગળ માર્કેટ કેવુ રહેશે

ઘરેલૂ બ્રોકરેજ ફર્મ કોટક સિક્યોરિટીઝે ઇન્ડિયા સ્ટ્રેટેજી નામનો રિપોર્ટ બહાર પાડ્યો છે. આ રિપોર્ટમાં કહેવામાં આવ્યું છે કે આગામી સપ્તાહમાં માર્કેટમાં પડકારો ચાલુ રહી શકે છે. બ્રોકરેજ ફર્મે જણાવ્યું હતું કે બ્રોડર માર્કેટનું વેલ્યુએશન હજુ પણ ઉપરના સ્તરે યથાવત છે. કોટક સિક્યોરિટીઝે ચેતવણી આપી છે કે ભવિષ્યના ત્રિમાસિક પરિણામોમાં નબળાઈને નકારી શકાય નહીં. કંપનીઓ વૃદ્ધિને લઈને પડકારોનો સામનો કરી રહી છે, ઉપભોક્તા માંગમાં નબળાઈ અને ઊંચા સ્તરે રહેલો ફુગાવો તેના માટે સૌથી મોટા કારણો છે.

જો કે, જો આ નોટમાં રહેલી સકારાત્મક બાબતો જોઈએ તો બ્રોકરેજ ફર્મે કહ્યું કે મહારાષ્ટ્રની ચૂંટણીમાં ભાજપની જંગી જીત કેન્દ્ર સરકારના વિકાસના એજન્ડાને પૂર્ણ કરવામાં મદદ કરશે. હરિયાણાની ચૂંટણીમાં જીતની પણ સેન્ટિમેન્ટ પર સકારાત્મક અસર જોવા મળી છે.

નાણાકીય વર્ષ 2025 ના બીજા ભાગમાં સરકારી મૂડીરોકાણમાં વધારાને કારણે રાજકોષીય એકત્રીકરણ માટે મર્યાદિત અવકાશ છે. આ ટૂંકા ગાળામાં માર્કેટમાં સેન્ટિમેન્ટને વેગ આપશે. હાલમાં, કોઈપણ નવા સુધારા અથવા રાહતના પગલાંને બદલે અમલીકરણ પર વધુ ધ્યાન આપવામાં આવે છે.

તમને જણાવી દઈએ કે તાજેતરના એક રિપોર્ટમાં વિદેશી બ્રોકરેજ ફર્મ ગોલ્ડમેન સૅક્સે અનુમાન લગાવ્યું છે કે ભારતીય શેરબજાર આગામી 3 મહિના દરમિયાન રેન્જમાં રહી શકે છે. આ બ્રોકરેજ ફર્મે નિફ્ટી માટે 24,000નો લક્ષ્યાંક રાખ્યો છે. જો કે રિપોર્ટમાં એમ પણ કહેવામાં આવ્યું છે કે નિફ્ટી 2025 સુધીમાં 27,000ના સ્તરે પહોંચી શકે છે. પરંતુ, આ માટે આગામી બે વર્ષમાં વૃદ્ધિનો અંદાજ 13% અને 16% હોવો જોઈએ. નિફ્ટીએ 27 સપ્ટેમ્બરના રોજ 26,277ની ટોચ બનાવી હતી, જ્યાંથી અત્યાર સુધીમાં ઇન્ડેક્સ 10% લપસી ગયો છે.