Budget 2026: ક્લાઉડ કંપનીઓને જલસા! 2047 સુધી ટેક્સ નહીં ભરવો પડે, જાણો ઈન્ટરનેટ યુઝર્સને શું થશે અસર

Budget 2026: નાણામંત્રી નિર્મલા સીતારમણે સંસદમાં બજેટ 2026 રજૂ કરતી વખતે ટેકનોલોજી અને ડિજિટલ સેક્ટર માટે મોટી જાહેરાતો કરી છે. સરકારે આર્ટિફિશિયલ ઈન્ટેલિજન્સ (AI) અને ક્લાઉડ સર્વિસને દેશના વિકાસ માટે મહત્વની ગણાવી છે. આ માટે વિદેશી ક્લાઉડ કંપનીઓને ટેક્સમાં મોટી રાહત આપવાનું એલાન કરવામાં આવ્યું છે, જેની અસર આવનારા સમયમાં દરેક ઈન્ટરનેટ યુઝર પર જોવા મળશે.

2047 સુધી ટેક્સ ફ્રી, પણ એક શરત

સરકારે જાહેરાત કરી છે કે વિદેશી ક્લાઉડ કંપનીઓને આગામી 21 વર્ષ સુધી, એટલે કે વર્ષ 2047 સુધી ટેક્સમાં છૂટ આપવામાં આવશે. જોકે, આ માટે એક શરત મૂકવામાં આવી છે. આ કંપનીઓએ ભારતમાં બનેલા 'ડેટા સેન્ટર' નો જ ઉપયોગ કરવો પડશે. જો કોઈ વિદેશી કંપની ભારતીય રિસેલર દ્વારા ગ્રાહકોને સર્વિસ આપતી હશે તો પણ તેને આ ટેક્સ છૂટનો લાભ મળશે. સરકારનો ઉદ્દેશ્ય ભારતને ડેટા અને AI હબ બનાવવાનો છે, જેથી રોકાણ વધે અને નવી નોકરીઓ ઊભી થાય.

સામાન્ય ઈન્ટરનેટ યુઝર પર શું અસર થશે?

એપ્સ અને વેબસાઈટની સ્પીડ: જો કંપનીઓ ભારતના ડેટા સેન્ટરનો ઉપયોગ કરશે, તો એપ્સ અને વેબસાઈટની સ્પીડ વધી શકે છે. ખાસ કરીને ગેમિંગ, વિડિયો સ્ટ્રીમિંગ અને ક્લાઉડ બેઝ્ડ એપ્સમાં સ્પીડનો ફરક ચોખ્ખો દેખાશે.

સસ્તી સર્વિસ: ટેક્સ બચવાથી કંપનીઓનો ખર્ચ ઘટશે. જોકે, તેનો ફાયદો ગ્રાહકોને તરત જ મળે તેવું જરૂરી નથી, પણ લાંબા ગાળે ડિજિટલ સર્વિસના ભાવમાં ઘટાડો થઈ શકે છે.

ડેટાની સુરક્ષા: ડેટા ભારતમાં જ સ્ટોર થવાથી સરકારી નિયમોનું પાલન સરળ બનશે અને ડેટા પર દેખરેખ રાખી શકાશે.

AI અને નોકરીઓ પર ફોકસ

બજેટમાં AI પર ખાસ ભાર મૂકવામાં આવ્યો છે. ભારતમાં કોમ્પ્યુટ પાવર અને ડેટા સેન્ટર વધવાથી AI ટૂલ્સ બનાવવા સરળ બનશે. સરકાર ઈચ્છે છે કે AI નો ઉપયોગ માત્ર કંપનીઓ પૂરતો સીમિત ન રહેતા શિક્ષણ, સ્વાસ્થ્ય અને ખેતી જેવા ક્ષેત્રોમાં પણ થાય. આ ઉપરાંત, ડેટા સેન્ટર વધવાથી ટેક સેક્ટરમાં નવી નોકરીઓની તકો પણ સર્જાશે.

ટૂંકમાં, સરકાર ડિજિટલ ઈન્ફ્રાસ્ટ્રક્ચર માટે મોટું બજેટ ફાળવી રહી છે, જેનાથી ભવિષ્યમાં 5G નેટવર્ક મજબૂત થશે અને ઈન્ટરનેટ કનેક્ટિવિટી વધુ સારી બનશે.

આ પણ વાંચો-Budget 2026: નાના વેપારીઓ માટે ખુશખબર! MSME માટે 10,000 કરોડનું ફંડ જાહેર - બનશે દેશના 'ચેમ્પિયન'