Budget 2026: પરિણીત યુગલો માટે ખુશખબર! મોદી સરકાર આપી શકે છે મોટું 'ટેક્સ ગિફ્ટ', જાણો શું છે જોઈન્ટ ટેક્સેશન સિસ્ટમ

Budget 2026: મોદી સરકાર આગામી યુનિયન બજેટ 2026 પહેલા મિડલ ક્લાસ અને ખાસ કરીને પરિણીત કરદાતાઓ માટે એક મોટી યોજના બનાવી રહી છે. મીડિયા રિપોર્ટ્સ અનુસાર, નાણાં મંત્રાલય એક 'ઓપ્શનલ જોઈન્ટ ટેક્સેશન સિસ્ટમ' શરૂ કરવા પર વિચાર કરી રહ્યું છે. સરળ ભાષામાં કહીએ તો, આ સિસ્ટમ હેઠળ પતિ અને પત્ની બંનેને મળીને એક જ ઈન્કમ ટેક્સ રિટર્ન ભરવાની છૂટ મળી શકે છે.

આ પ્રસ્તાવનો સૌથી મોટો ફાયદો એવા પરિવારોને થશે જેમાં કમાનાર સભ્ય માત્ર એક જ છે જેમ કે માત્ર પતિ નોકરી કરે છે અને પત્ની ગૃહિણી છે. અત્યાર સુધી આવા પરિવારોમાં કમાનાર વ્યક્તિ પર ટેક્સનો બોજ વધારે રહેતો હતો, પરંતુ નવી સિસ્ટમથી તેમને મોટી રાહત મળી શકે છે.

અત્યારે શું છે ટેક્સના નિયમો?

હાલની ભારતની ટેક્સ સિસ્ટમ મુજબ, વ્યક્તિ પરિણીત હોય કે અપરણિત, ટેક્સના નિયમો બધા માટે સરખા છે. પતિ અને પત્ની બંને અલગ-અલગ વ્યક્તિ ગણાય છે અને બંનેના અલગ PAN કાર્ડ હોય છે. બંનેએ પોતાની આવક પર અલગ-અલગ ટેક્સ ભરવો પડે છે અને છૂટ પણ અલગ મળે છે. સમસ્યા ત્યાં આવે છે જ્યારે પત્નીની કોઈ આવક નથી હોતી. આવા કેસમાં પત્નીને મળતી બેઝિક ટેક્સ છૂટની લિમિટનો ઉપયોગ થઈ શકતો નથી અને તે વ્યર્થ જાય છે.

આ સમસ્યાને ઉકેલવા માટે ઇન્સ્ટિટ્યૂટ ઓફ ચાર્ટર્ડ એકાઉન્ટન્ટ્સ ઓફ ઇન્ડિયા (ICAI) એ સરકારને સૂચન કર્યું છે કે ભારતમાં પણ જોઈન્ટ ટેક્સ ફાઈલિંગનો વિકલ્પ હોવો જોઈએ. અમેરિકા અને જર્મની જેવા વિકસિત દેશોમાં આ સિસ્ટમ પહેલેથી જ લાગુ છે, જ્યાં આખા પરિવારને એક 'સિંગલ ઈકોનોમિક યુનિટ' ગણવામાં આવે છે. આનાથી પરિવાર પરનો કુલ ટેક્સ બોજ ઘટી જાય છે.

જોઈન્ટ ટેક્સેશનથી શું ફાયદા થશે?

જો સરકાર બજેટ 2026 માં આ પ્રસ્તાવ મંજૂર કરે છે, તો કરદાતાઓને નીચે મુજબના મોટા ફાયદા થઈ શકે છે:

બેઝિક છૂટમાં વધારો: જોઈન્ટ ટેક્સેશન હેઠળ પતિ અને પત્નીની કુલ આવક પર એકસાથે ટેક્સ લાગશે. રિપોર્ટ્સ મુજબ, આવા કેસમાં બેઝિક ટેક્સ છૂટની લિમિટ વધારવામાં આવી શકે છે.

ડિડક્શનનો લાભ: હોમ લોનનું વ્યાજ, મેડિકલ ઈન્સ્યોરન્સ અને અન્ય ભથ્થાઓ માટે મળતી કપાત (Deductions) ને વધારે સારી રીતે એડજસ્ટ કરી શકાશે.

સ્ટાન્ડર્ડ ડિડક્શન: જો પતિ-પત્ની બંને કમાતા હોય, તો પણ તેઓ અલગ-અલગ સ્ટાન્ડર્ડ ડિડક્શન માટે યોગ્ય ગણાઈ શકે છે.

સરચાર્જમાં મોટી રાહતની શક્યતા

હાઈ ઈન્કમ ગ્રુપ માટે પણ એક સારા સમાચાર છે. અત્યારે 50 લાખ રૂપિયાથી વધુની આવક પર સરચાર્જ લાગે છે. જો જોઈન્ટ ટેક્સેશન સિસ્ટમ આવે, તો આ લિમિટ વધારીને 75 લાખ રૂપિયા અથવા તેનાથી વધુ કરવામાં આવી શકે છે. આનાથી ઊંચા ટેક્સ બ્રેકેટમાં આવતા પરિવારોને લાખો રૂપિયાની બચત થઈ શકે છે.

બજેટની તારીખો

કેન્દ્રીય નાણાં મંત્રી નિર્મલા સીતારમણ 1 ફેબ્રુઆરી, 2026ના રોજ સંસદમાં યુનિયન બજેટ રજૂ કરશે. બજેટ સત્ર 28 જાન્યુઆરીથી શરૂ થશે અને 2 એપ્રિલ સુધી ચાલશે. જો આ 'જોઈન્ટ ટેક્સેશન' નો પ્રસ્તાવ લાગુ થશે, તો તેને ભારતીય ટેક્સ સિસ્ટમમાં એક ઐતિહાસિક અને ક્રાંતિકારી ફેરફાર માનવામાં આવશે.

આ પણ વાંચો- Trump Tariff: શું રશિયન તેલ ખરીદવા બદલ ભારત પર લાગશે 500% ટેક્સ? ટ્રમ્પના મંત્રીના નિવેદનથી સામે આવ્યું સત્ય