બજેટ પહેલા દેશ માટે સારા સમાચાર: રોકેટ ગતિએ ભાગશે ભારતની ઈકોનોમી, 7.4%ના દરે GDP વધવાનું સરકારનું અનુમાન

India GDP Growth: દેશના સામાન્ય બજેટ રજૂ થાય તે પહેલા જ કેન્દ્ર સરકારે અર્થવ્યવસ્થાને લઈને એક મોટું અને હકારાત્મક અનુમાન જાહેર કર્યું છે. સરકાર દ્વારા જાહેર કરવામાં આવેલા એડવાન્સ એસ્ટિમેટ્સ મુજબ, ચાલુ નાણાકીય વર્ષમાં ભારતનો આર્થિક વિકાસ દર એટલે કે GDP ગ્રોથ 7.4% રહેવાની ધારણા છે.

શા માટે વધી રહી છે ઈકોનોમીની સ્પીડ?

સત્તાવાર ડેટા પર નજર કરીએ તો આ તેજી પાછળના મુખ્ય કારણોમાં મેન્યુફેક્ચરિંગ અને સર્વિસ સેક્ટરમાં જોવા મળી રહેલી શાનદાર ગ્રોથ છે. આ ઉપરાંત, દેશમાં ઘરેલુ ખર્ચ વધ્યો છે અને ફિક્સ્ડ એસેટ્સમાં પણ મજબૂત રોકાણ થયું છે. આ તમામ પરિબળો ભેગા મળીને અર્થવ્યવસ્થાને વેગ આપી રહ્યા છે. ઉલ્લેખનીય છે કે, આ આંકડો નાણાકીય વર્ષ 2024-25 માટેના 6.5% ના અંદાજ કરતા ઘણો વધારે છે, જે દેશ માટે ખુશીની વાત છે.

મંત્રાલયે શું કહ્યું?

આ અનુમાન દર્શાવે છે કે નોમિનલ ટર્મ્સમાં, ચાલુ વર્ષ દરમિયાન ભારતની GDPમાં 8%નો વધારો થવાની આશા છે. આ આંકડાઓ એટલા માટે મહત્વના છે કારણ કે સરકાર ટેક્સની આવક, રાજકોષીય ખાધ અને લોન વગેરેનું ગણિત આના આધારે જ માંડે છે. તમને જણાવી દઈએ કે આ આંકડા FY27 ના કેન્દ્રીય બજેટની ગણતરી માટે પાયારૂપ સાબિત થશે.

રિઝર્વ બેંકનું શું માનવું છે?

ભારતીય રિઝર્વ બેંકે પણ ગયા મહિને અર્થતંત્ર અંગે પોઝિટિવ સંકેત આપ્યા હતા. RBI ના અંદાજ મુજબ, મજબૂત ઇન્ડસ્ટ્રીયલ ગ્રોથ, સારી ખેતી અને ગામડાઓ તેમજ શહેરોમાં વધેલી માંગને કારણે આ વર્ષે ભારતનો રિયલ GDP 7.3% વધી શકે છે.

RBIએ ડિસેમ્બર ક્વાર્ટર માટે 7% અને માર્ચ ક્વાર્ટર માટે 6.5% ગ્રોથનું અનુમાન લગાવ્યું હતું. સપ્ટેમ્બર ક્વાર્ટરમાં અર્થતંત્રના મજબૂત પ્રદર્શનને કારણે આખા વર્ષની અપેક્ષાઓ વધી ગઈ છે. થોડા સમય પહેલા મુખ્ય આર્થિક સલાહકાર વી. અનંત નાગેશ્વરને પણ કહ્યું હતું કે વર્ષના પહેલા છ મહિનામાં 8% ની જોરદાર વૃદ્ધિ અને માળખાગત સુધારાઓને લીધે આ નાણાકીય વર્ષમાં ભારતીય અર્થવ્યવસ્થા 7% કે તેથી વધુ દરે આગળ વધે તેવી પૂરી શક્યતા છે.

આ પણ વાંચો-Mission Moon: 2040 સુધીમાં ચંદ્ર પર પગ મૂકશે ભારતીય! ISRO એ તૈયાર કર્યો ભવ્ય રોડમેપ, જાણો શું છે માસ્ટર પ્લાન?