ભારત-અમેરિકા વચ્ચે ટ્રેડ ડીલમાં અટક્યો આખરી પેચ, પિયુષ ગોયલે જણાવ્યું ક્યારે થશે કરાર ફાઇનલ

ભારત અને અમેરિકા વચ્ચે લાંબા સમયથી ચાલી રહેલી બહુચર્ચિત ટ્રેડ ડીલને લઈને એક મોટું અપડેટ સામે આવ્યું છે. કેન્દ્રીય વાણિજ્ય અને ઉદ્યોગ મંત્રી પિયુષ ગોયલે સ્પષ્ટ કરી દીધું છે કે બંને દેશો વચ્ચે સૂચિત દ્વિપક્ષીય વેપાર સમજૂતીને અંતિમ સ્વરૂપ આપવા માટે ભારત એક ખાસ શરત પૂરી થવાની રાહ જોઈ રહ્યું છે.

જેવું અમેરિકા ભારતને અન્ય હરીફ દેશોની સરખામણીમાં વધુ સારો આયાત ડ્યૂટીમાં છૂટ આપશે, તરત જ આ ટ્રેડ ડીલ ફાઇનલ કરીને તેની સંપૂર્ણ માહિતી જાહેર કરવામાં આવશે. એટલે કે અત્યારે આ ડીલમાં સૌથી મોટો પેચ અમેરિકન ટેરિફ રેટને લઈને જ અટકેલો છે.

અમેરિકા તરફથી સારા ટેરિફ રેટની રાહ

તાજેતરમાં વાણિજ્ય મંત્રાલય દ્વારા આયોજિત એક વર્કશોપમાં પિયુષ ગોયલે જણાવ્યું હતું કે, ભારત ઈચ્છે છે કે અમેરિકન બજારમાં ભારતીય સામાનને અન્ય હરીફ દેશોની સરખામણીમાં સારી ટેરિફ સુવિધા મળે. ઉલ્લેખનીય છે કે, 24 જુલાઈથી અમેરિકાએ ભારત સહિત અનેક દેશોના ઉત્પાદનો પર વધારાનો 10 ટકા ટેરિફ લગાવી દીધો છે. ટેરિફના આ બદલાયેલા માહોલને કારણે જ બંને દેશો વચ્ચે હજુ વાટાઘાટો ચાલી રહી છે.

ટ્રેડ ડીલની આ વાતચીતને ઝડપથી આગળ વધારવા માટે પિયુષ ગોયલ સપ્ટેમ્બરના અંતમાં અમેરિકાના પ્રવાસે જશે. તેઓ ત્યાં G20 વેપાર મંત્રીઓની બેઠકમાં ભાગ લેશે અને સાથે જ અમેરિકાના વેપાર પ્રતિનિધિ જેમિસન ગ્રીર સાથે ખાસ દ્વિપક્ષીય બેઠક પણ કરશે. આ બેઠકમાં ભારત-અમેરિકા ટ્રેડ ડીલનો મુદ્દો સૌથી અગત્યનો રહેશે. ભારત માટે આ કરાર એટલા માટે પણ મહત્વનો છે કારણ કે નાણાકીય વર્ષ 2025-26 માં ભારતે અમેરિકાને લગભગ 87 અબજ ડોલરના સામાનની નિકાસ કરી છે.

હરીફ દેશો કરતા સારો ટેરિફ કેમ જરૂરી છે?

અમેરિકન બજારમાં ભારતને બાંગ્લાદેશ, વિયેતનામ, થાઈલેન્ડ અને ઇન્ડોનેશિયા જેવા દેશો સાથે સીધી હરીફાઈ કરવી પડે છે. જો ભારતીય સામાન પર આ દેશો કરતા ઓછો ટેક્સ લાગશે, તો ભારતીય કંપનીઓને કિંમતોના મામલે મોટો ફાયદો મળશે. પિયુષ ગોયલે ભારપૂર્વક કહ્યું કે, માત્ર ટેરિફનો આંકડો જોવો પૂરતો નથી, પરંતુ અસલ વાત એ છે કે ભારતીય ઉત્પાદનો પર હરીફ દેશોની સરખામણીમાં કેટલો ચાર્જ લગાવવામાં આવી રહ્યો છે.

ભારતનું FTA નેટવર્ક થઈ રહ્યું છે મજબૂત

વેપારને પ્રોત્સાહન આપવા અંગે માહિતી આપતા ગોયલે જણાવ્યું કે ભારતે ઘણા દેશો સાથે ફ્રી ટ્રેડ એગ્રીમેન્ટ કર્યા છે. બ્રિટન, મોરેશિયસ, ઓમાન, UAE અને ઓસ્ટ્રેલિયા સાથે આ કરારો લાગુ પણ થઈ ગયા છે. જ્યારે ન્યૂઝીલેન્ડ સાથે ટૂંક સમયમાં કરાર અમલમાં આવવાની આશા છે. આ ઉપરાંત યુરોપિયન યુનિયન સહિત અન્ય દેશો સાથે પણ વાતચીત ચાલી રહી છે.

નિકાસ વધારવાનો સરકારનો મેગા પ્લાન

સરકારે નિકાસ ક્ષેત્રે બહુ મોટા લક્ષ્યાંકો નક્કી કર્યા છે. ચાલુ વર્ષ માટે ભારતે 1 ટ્રિલિયન ડોલરની નિકાસનો લક્ષ્યાંક રાખ્યો છે. ચાલુ નાણાકીય વર્ષના શરૂઆતના 4 મહિનામાં જ નિકાસ લગભગ 317 અબજ ડોલર રહી છે, જે ગયા વર્ષના આ જ સમયગાળાના 280 અબજ ડોલર કરતા ઘણી વધારે છે. સરકારનું વિઝન 2030 સુધીમાં ભારતની કુલ નિકાસને 2 ટ્રિલિયન ડોલર સુધી પહોંચાડવાનું છે.

આ પણ વાંચો-'જોરાવર ટેન્ક' વધારશે ભારત અને બેલ્જિયમની તાકાત, બંને દેશો વચ્ચે થઈ ઐતિહાસિક ડીલ, જાણો પીએમ મોદીએ શું કહ્યું