ભાવને લઈને વાત બગડી! વર્લપૂલ ઇન્ડિયાની 1 અબજ ડોલરની ડીલ કેન્સલ, જાણો કેમ રોકાણકારોના પૈસા ડૂબ્યા

Whirlpool India: હોમ એપ્લાયન્સિસ બનાવતી જાણીતી અમેરિકન કંપની વર્લપૂલ કોર્પ અને ગ્લોબલ પ્રાઇવેટ ઇક્વિટી ફર્મ એડવેન્ટ ઇન્ટરનેશનલ વચ્ચેની મોટી ડીલ રદ થઈ ગઈ છે. સૂત્રોના જણાવ્યા અનુસાર, બંને કંપનીઓ વચ્ચે વર્લપૂલના ભારતીય યુનિટના હિસ્સાના વેચાણ માટે વાતચીત ચાલી રહી હતી, પરંતુ વેલ્યુએશન પર સહમતિ ન સધાતા આ $1 અબજ ડોલરની સંભવિત ડીલ હવે આગળ વધશે નહીં.

શા માટે આ ડીલ મહત્વની હતી?

આ વર્ષે જાન્યુઆરીમાં વર્લપૂલ કોર્પે જાહેરાત કરી હતી કે તે દેવું ચૂકવવા માટે તેની ભારતીય શાખા, વર્લપૂલ ઓફ ઇન્ડિયામાં પોતાનો 51% હિસ્સો ઘટાડીને લગભગ 20% કરવા માંગે છે. કંપનીને આશા હતી કે આ હિસ્સાના વેચાણથી તેને $55 થી $60 કરોડ ડોલર (અંદાજે 4500-5000 કરોડ)ની રોકડ મળશે, જેનો ઉપયોગ તે પોતાના દેવાનો બોજ હળવો કરવા માટે કરવાની હતી. એડવેન્ટ ઇન્ટરનેશનલ આ ડીલમાં સૌથી આગળ હતી અને વર્લપૂલ ઇન્ડિયામાં 31% હિસ્સો ખરીદવા માટે તૈયાર હતી.

ડીલની ગણતરી કેવી રીતે કામ કરતી?

ભારતીય શેરબજારના નિયમો અનુસાર, જો એડવેન્ટ 31% હિસ્સો ખરીદી લેતી, તો તેને ફરજિયાતપણે વધુ 26% હિસ્સો ખરીદવા માટે ઓપન ઓફર લાવવી પડતી. આનાથી કંપનીમાં તેનો કુલ હિસ્સો 57% થઈ જતો, અને તેને કંપની પર સંપૂર્ણ નિયંત્રણ મળી જતું. આ સમગ્ર પ્રક્રિયાને કારણે ડીલનું કુલ મૂલ્ય $1 અબજ ડોલર (અંદાજે 8300 કરોડ) સુધી પહોંચી જવાની ધારણા હતી.

ડીલ કેમ તૂટી ગઈ?

આ ડીલ રદ થવા પાછળનું મુખ્ય કારણ વેલ્યુએશન પરનો મતભેદ છે. સૂત્રો મુજબ, એડવેન્ટ ઓછી કિંમતે ડીલ કરવા માંગતી હતી કારણ કે વર્લપૂલ હાલમાં ભારતીય બજારમાં LG અને સેમસંગ જેવી કંપનીઓ તરફથી સખત સ્પર્ધાનો સામનો કરી રહી છે. આ પડકારોને કારણે એડવેન્ટે નીચું વેલ્યુએશન ઓફર કર્યું.