SBIએ કસ્ટમર્સને કર્યા એલર્ટ, ડીપફેક વીડિયો દ્વારા હાઇ રિટર્ન આપવાનો ખોટો દાવો

ભારતીય સ્ટેટ બેન્ક (SBI)એ પોતાના ખાતાધારકો અને સામાન્ય લોકોને સોશિયલ મીડિયા પર ફેલાતા ડીપફેક સ્કેમ વીડિયો અંગે સાવધાન રહેવા જણાવ્યું છે. બેન્કે એક જાહેર સૂચના જારી કરીને આવા ડીપફેક વીડિયો સામે ચેતવણી આપી છે. આ વીડિયોમાં ખોટો દાવો કરવામાં આવે છે કે SBIએ ભારત સરકાર અને કેટલીક મલ્ટિનેશનલ કંપનીઓ સાથે મળીને આર્ટિફિશિયલ ઈન્ટેલિજન્સ (AI) આધારિત રોકાણ પ્લેટફોર્મ શરૂ કર્યું છે, જે રોકાણકારોને મોટું રિટર્ન આપે છે. SBIએ સ્પષ્ટ કર્યું છે કે આવા દાવા સંપૂર્ણપણે ખોટા છે અને આવી કોઈ યોજના અસ્તિત્વમાં નથી.

SBIની કસ્ટમર્સને સલાહ

SBIએ કસ્ટમર્સ અને સામાન્ય લોકોને સલાહ આપી છે કે કોઈપણ માહિતીની સત્યતા ફક્ત બેન્કની અધિકૃત વેબસાઈટ, અધિકૃત સોશિયલ મીડિયા એકાઉન્ટ્સ અથવા નજીકની શાખા દ્વારા જ ચકાસવી. બેન્કે લોકોને આવા ડીપફેક વીડિયોના ખોટા વાયદાઓથી બચવા અને તેનો શિકાર ન બનવા અપીલ કરી છે. SBIએ પોતાના અધિકૃત X (અગાઉ ટ્વિટર) એકાઉન્ટ પર એક વીડિયો શેર કરીને જણાવ્યું છે કે, “અમે અમારા કસ્ટમર્સ અને જનતાને સોશિયલ મીડિયા પર વાયરલ થતા ડીપફેક વીડિયો અંગે ચેતવણી આપીએ છીએ. આ વીડિયોમાં SBI, ભારત સરકાર અને મલ્ટિનેશનલ કંપનીઓ સાથે મળીને AI આધારિત રોકાણ યોજના શરૂ કરવાનો ખોટો દાવો કરવામાં આવે છે. આવી કોઈ યોજના નથી, સાવધાન રહો.”