અમેરિકન ટેરિફની દેખાવા લાગી અસર, ટાટા ગ્રૂપની જગુઆર લેન્ડ રોવરે અમેરિકામાં વ્હીકલ એક્સપોર્ટ કર્યું બંધ

ટાટા મોટર્સની સહયોગી કંપની જગુઆર લેન્ડ રોવર (JLR)એ ટેરિફ માળખામાં ફેરફારને કારણે બ્રિટનમાં આવેલા તેના ઉત્પાદન પ્લાન્ટ્સમાંથી અમેરિકા તરફની વ્હીકલનું એક્સપોર્ટ રોકી દીધું છે. JLRના પ્રવક્તાએ જણાવ્યું કે અમેરિકા તેમના લક્ઝરી બ્રાન્ડ્સ માટે મહત્ત્વનું બજાર છે અને તેઓ તેમના વેપારી ભાગીદારો સાથે નવી વેપારી શરતો પર કામ કરી રહ્યા છે. કંપનીએ ટૂંકા ગાળાના પગલાંરૂપે એપ્રિલ મહિનામાં એક્સપોર્ટની ખેપ રોકી દીધી છે અને મધ્યમથી લાંબા ગાળાની યોજનાઓ તૈયાર કરી રહી છે.

અમેરિકા JLR માટે મોટું બજાર

આ નિર્ણય ટ્રમ્પ પ્રશાસને આયાતી કારો પર 25 ટકા ટેરિફ લાગુ કર્યા બાદ 3 એપ્રિલથી અમલમાં આવ્યો છે. JLRનું કહેવું છે કે તેમની લક્ઝરી બ્રાન્ડ્સ ગ્લોબલ લેવલે આકર્ષણ ધરાવે છે અને તેઓ બદલાતી બજાર પરિસ્થિતિઓનો સામનો કરવા સક્ષમ છે. કંપનીની પ્રાથમિકતા હવે વિશ્વભરના કસ્ટમરને સર્વિસ પૂરી પાડવાની અને અમેરિકાની નવી વેપારી શરતોનો ઉકેલ શોધવાની છે. નાણાકીય વર્ષ 2024માં JLRના કુલ વેચાણનો લગભગ 23 ટકા હિસ્સો અમેરિકી બજારમાંથી આવ્યો હતો, જે તમામ વ્હીકલ બ્રિટનથી એક્સપોર્ટ કરવામાં આવ્યા હતા.

ભારતની સ્થિતિ વધુ સારી

2 એપ્રિલથી અમેરિકાએ ભારત પર વધારાનો 26 ટકા આયાત શુલ્ક લાદ્યો છે. જ્યારે વિયેતનામ પર 46 ટકા, ચીન પર 34 ટકા, ઇન્ડોનેશિયા પર 32 ટકા અને થાઇલેન્ડ પર 36 ટકા શુલ્ક લાગુ કરવામાં આવ્યું છે. ભારતીય એક્સપોર્ટર્સ અમેરિકામાં સ્પર્ધાત્મક દેશોની સરખામણીએ ઓછા ઇમ્પોર્ટ ડ્યુટીનો સામનો કરી રહ્યા છે, જેના કારણે તેઓ નવા અમેરિકી ટેરિફનો સામનો કરવા માટે વધુ સારી સ્થિતિમાં છે. ભારત રોકાણ આકર્ષીને, ઉત્પાદન વધારીને અને અમેરિકા તરફ એક્સપોર્ટ વધારીને આનો લાભ ઉઠાવી શકે છે.

આ ઘટનાઓ દર્શાવે છે કે ગ્લોબલ ટ્રેડમાં ટેરિફની નીતિઓ કંપનીઓ અને દેશોની એક્સપોર્ટ રણનીતિ પર ઊંડી અસર કરી રહી છે. JLR હવે અમેરિકી બજાર માટે નવા ઓપ્શન શોધવા પર ધ્યાન કેન્દ્રિત કરી રહી છે.

આ પણ વાંચો- One State One RRB scheme: 15 ક્ષેત્રીય ગ્રામીણ બેન્કોનું થશે વિલય, સરકાર લાવી રહી છે 'એક રાજ્ય-એક RRB' સ્કીમ