Currency Market: RBI ના એક્ટિવ હસ્તક્ષેપથી રૂપિયામાં શાનદાર રિકવરી, અમેરિકન ડોલર સામે 18 પૈસા મજબૂત થઈ 96.18 પર પહોંચ્યો

Currency Market: શુક્રવારે કરન્સી માર્કેટમાં ભારતીય ચલણ માટે ખૂબ જ રાહતના સમાચાર આવ્યા છે. શરૂઆતી કારોબારમાં અમેરિકન ડોલર સામે રૂપિયામાં સારી એવી રિકવરી જોવા મળી છે. વૈશ્વિક બજારમાં ક્રૂડ ઓઈલના ભાવમાં આવેલી નરમાશ, ભૌગોલિક રાજકીય તણાવ ઘટવાના સંકેતો અને ખાસ કરીને રિઝર્વ બેન્ક (RBI) ના સક્રિય હસ્તક્ષેપને કારણે રૂપિયો 18 પૈસા મજબૂત થઈને 96.18 ના સ્તર પર પહોંચી ગયો છે.

રૂપિયાની ઓપનિંગ અને અગાઉની સ્થિતિ

ઇન્ટરબેન્ક ફોરેન એક્સચેન્જ માર્કેટમાં, શુક્રવારે રૂપિયો અમેરિકન ડોલર સામે 96.30 ના સ્તરે ખુલ્યો હતો અને જોતજોતામાં 96.18 સુધી પહોંચી ગયો હતો. અગાઉ ગુરુવારે પણ રૂપિયાએ તેના ઐતિહાસિક નીચલા સ્તરેથી રિકવરી કરતા 50 પૈસાના ઉછાળા સાથે 96.36 ના સ્તર પર ક્લોઝિંગ આપ્યું હતું.

રૂપિયામાં આવેલી આ મજબૂતી પાછળના મુખ્ય કારણો

વૈશ્વિક તણાવમાં ઘટાડાના સંકેત: અમેરિકાના સેક્રેટરી ઓફ સ્ટેટ માર્કો રુબિયોએ ઈરાન મુદ્દે ચાલી રહેલી કૂટનીતિક વાતચીત યોગ્ય દિશામાં હોવાનો સંકેત આપ્યો છે. જોકે, તેમણે બહુ વધારે પડતા આશાવાદી ન થવાની ચેતવણી પણ આપી છે, પરંતુ તેમના નિવેદનથી બજારને તત્કાળ રાહત મળી છે.

ક્રૂડ ઓઈલમાં રાહત: આ વૈશ્વિક રાહતને કારણે બ્રેન્ટ ક્રૂડ ઓઈલ 104 ડોલરની આસપાસ શાંત પડ્યું હતું, જેનાથી રૂપિયા પરનું દબાણ ઘટ્યું હતું. હાલમાં ગ્લોબલ ઓઈલ બેન્ચમાર્ક બ્રેન્ટ ક્રૂડ ફ્યુચર્સ 1.59 ટકા વધીને પ્રતિ બેરલ 104.21 ડોલર પર ટ્રેડ કરી રહ્યું છે.

RBI નું શાનદાર મેનેજમેન્ટ: CR ફોરેક્સ એડવાઈઝર્સના MD અમિત પાબારીના જણાવ્યા અનુસાર, 26 મેના રોજ RBI દ્વારા 5 બિલિયન ડોલરના બાય-સેલ સ્વેપ ઓક્શનની યોજના છે. આ પગલાથી બેન્કિંગ સિસ્ટમમાં રૂપિયાની લિક્વિડિટી વધશે અને માર્કેટનો ભરોસો મજબૂત થયો છે કે સંકટ સમયે RBI માર્કેટને સંભાળવા પૂરી રીતે તૈયાર છે.