ડોનાલ્ડ ટ્રમ્પના ભાષણથી વૈશ્વિક શેરબજારમાં હાહાકાર! એશિયાથી અમેરિકા સુધી મોટો કડાકો, સોના-ચાંદીના ભાવ પણ ગગડ્યા

Global Markets crash: અમેરિકાના રાષ્ટ્રપતિ ડોનાલ્ડ ટ્રમ્પે તાજેતરમાં ઈરાન યુદ્ધ અંગે દેશને સંબોધન કર્યું હતું. તેમના આ ભાષણની અસર આખી દુનિયાના નાણાકીય બજારો પર પડી છે. ઓસ્ટ્રેલિયાથી લઈને જાપાન સુધીના શેરબજારોમાં મોટો કડાકો જોવા મળ્યો છે. મિડલ ઈસ્ટમાં ચાલી રહેલા સંઘર્ષ અને ભૌગોલિક રાજકીય અનિશ્ચિતતા વચ્ચે રોકાણકારોએ જોખમ લેવાનું ટાળ્યું છે અને બજારમાંથી પોતાના પૈસા પાછા ખેંચવાનું શરૂ કરી દીધું છે.

રોકાણકારોને નિરાશા કેમ મળી?

ખરેખર, રોકાણકારોને એવી આશા હતી કે ટ્રમ્પ પોતાના ભાષણમાં યુદ્ધ ખતમ કરવા અંગે કોઈ ચોક્કસ સંકેત આપશે. પરંતુ તેમને નિરાશા જ હાથ લાગી. કોઈ સ્પષ્ટ સંકેત ન મળવાને કારણે રોકાણકારોએ 'જોખમથી બચવાનો' રસ્તો અપનાવ્યો, જેના કારણે બજારમાં ભારે વેચવાલી (Sell-off) શરૂ થઈ ગઈ.

એશિયાઈ બજારોમાં ભારે કડાકો

ટ્રમ્પના સંબોધન બાદ એશિયાના શેરબજારોમાં તીવ્ર ઘટાડો નોંધાયો છે. જાપાનનો નિક્કેઈ-225 (Nikkei-225) ઈન્ડેક્સ 1.5% તૂટ્યો છે. દક્ષિણ કોરિયાના કોસ્પી (Kospi) ઈન્ડેક્સમાં 2.6% નો મોટો ઘટાડો નોંધાયો છે, જેનાથી ત્યાંની અગાઉની તેજી સંપૂર્ણપણે ધોવાઈ ગઈ. હોંગકોંગનો હેંગ સેંગ (Hang Seng) ઈન્ડેક્સ 1% ગગડ્યો છે. આ ઉપરાંત શાંઘાઈ, સિંગાપોર, તાઈપેઈ અને સિડનીના બજારોમાં પણ વેચવાલીનો માહોલ રહ્યો હતો.

સોના અને ચાંદીની ચમક પણ ફિક્કી પડી

સામાન્ય રીતે જ્યારે વિશ્વમાં કોઈ સંકટ આવે ત્યારે સુરક્ષિત રોકાણ તરીકે સોનાની માંગ વધતી હોય છે, પરંતુ આ વખતે બજારમાં કંઈક અલગ જ હલચલ જોવા મળી. સોનાનો ભાવ ઘટીને $4,700 પ્રતિ ઔંસની નીચે આવી ગયો, જ્યારે ચાંદી પણ $73 પ્રતિ ઔંસના લેવલથી નીચે ગગડી ગઈ. નિષ્ણાતોનું માનવું છે કે રોકાણકારો પોતાની પોઝિશનને નવેસરથી મેનેજ કરી રહ્યા છે, જેના કારણે આ ઘટાડો જોવા મળ્યો છે.